Kanta 111 - Hanunuu

Kanta 111 Pagdayaw sa Diyus

¹ Dayawun ti Panginuun! Pagpasalamatan niku ti Panginuun sa buu niku tagipusuun sa pagtiripun manga tawu matadlung.

² Makadululaw ti manga binwat Panginuun; pag-isipun gid inda tanan magkaibug sa kay binwat.

³ Ti manga binwat Diyus magpaburayhaw kay kamaskihan ag kadayawan; ag kay katadlungan parargu sa unman may katapusan.

⁴ Pag-ipaalaala gid niya sa kanta kay makadululaw pag manga binwat. Marapakaun siya ag maawaun;

⁵ pag-ayawan niya karan-unun ti manga maggalang sa kanya, ag pag-alalahanun niya pirmi kay kasunduan.

⁶ Pag-ipakakit niya sa kay manga nasakupan nu kabitay kay kamaskihan sa kay manga binwat, sa panab-anan pagpakaun sa kanda manga daga taga iba nasyun.

⁷ Tapat ag matadlung siya sa tanan niya pag buwatun, ag masarigan ti tanan niya pag manga sugu.

⁸ Inda kay manga sugu parargu sa unman may katapusan, ag ipinakaun niya inda may katapatan ag katadlungan.

⁹ Linukat niya kay nasakupan, ag nagbuwat siya kasunduan sa kanda sa unman may katapusan. Banal siya ag makadululaw kay ngaran.

¹⁰ Nu ti usa ka tawu magkaibug sa kadunungan, kailangan maggalang siya sa Panginuun. Ti tanan magsunud sa kay manga sugu may kang-ud pag pan-intindi. Pagdayawun siya sa unman may katapusan.