Kanta 110 - Hanunuu

Kanta 110 Ti Panginuun ag ti Pinili Niya pag Hari

Ti isinurat ni Dabid pag kanta.

¹ Magkun ti Panginuun sa kang Panginuun, “Pagtukaw kawu sitay baliwa sa kang sikun tugka sa maipasirung niku sa kanmu ti manga kalaban nimu.”

² Ginan sa Siun, padakaun Panginuun kanmu kaharian, ag harian nimu kanmu manga kalaban.

³ Sa sirang manggira kawu sa kanmu manga kalaban, buluntad mangawat sa kanmu ti nasakupan nimu. Kanmu kalay-awan pag manga nasakupan umatag sa kanmu sa banal pag bantud ga tun-ug kada surip.

⁴ Nanumpa ti Panginuun, balaw gid mauman kay naisipan, kawu manughandug hanggan aban, parihu sa pagkamanughandug ni Milkisidik.

⁵ Ti Panginuun asan sa kanmu arani; parusahan niya ti manga hari sa udas ipakakit niya kay pangagalit.

⁶ Parusahan niya ti manga nasyun, mayamu kay panmatyun. Parusahan niya ti manga takinan sa buu kalibutan.

⁷ Kawu, Mahal Hari, manginum sa sapa sa saruy dalan, nakan bumalik kanmu kabisugan ag marapanalu kawu.