Kanta 109 - Hanunuu

Kanta 109 Ti Dangup Tawu Asan sa Kakurian

Ti isinurat ni Dabid pag kanta para sa manugpanguna sa magkanta.

¹ Diyus, kang pagdayawun, saguta kang magtawag sa kanmu.

² Dahil pagbangdanan aku daut ag pudilun pag manga tawu. Magbagaw sida kapudilan tungkul sa kangku.

³ Pirmi nida aku pagsabihan daut una unman may kadahilanan.

⁴ Una mag-upud aku sa kanda, pagkalabanun nida aku; dapat pag-idarangin niku sida.

⁵ Pagbalusan nida aku daut sa kang mayad pagbuwatun sa kanda, ag pagbalusan nida aku pangagalit sa kang magmahal sa kanda.

⁶ Magkumun sida, “Manhanap kita daut pag tawu kumalaban ag mandimanda sa kanya sa hurusayan.

⁷ Nu bistahun yi siya, mana lumuwang may kasalanan siya. Ag mana kay darangin baliwun kasalanan.

⁸ Mana balaw dumugay kay buhi ag iayaw yi lang sa iba kay katungkulan.

⁹ Mana mamatay yi siya hampay maulila kay manga anak ag maburanday kay asawa.

¹⁰ Mana una naan yi lang tabug maglakaw kay manga anak magpalimus, ag mana paighitun sida una sa kanda ginuba pag ulian.

¹¹ Mana bul-un niya kinautangan ti tanan niya kasiyunan, ag mana bul-un manga day-uhan kay binudlayan.

¹² Mana unman yi may maawa sa kanya ag sa kay manga anak naulila nu mamatay yi siya.

¹³ Mana magkaramatay kay manga linahi hampay malimtan yi sida sa dumasun pag sinulput.

^14-15 Mana balaw patawadun ag balaw kalimtan Panginuun kay kasalanan niya manga ginurang ag manga sinulput; ag mana ipahintulut Panginuun para malimtan yi sida sa kalibutan.

¹⁶ Dahil balaw gid niya pag-isipun ti pagbuwat mayad, bagkus ngap, pag-unuunuhun niya ag pagmatyun ti manga makuri, manga pugri, ag manga naduraan pag-asa.

¹⁷ Gustu niya saadan ti iba — mana sa kanya inda mangyari. Balaw siya magkaibug magpapalad sa iba — mana balaw waydi may manpapalad sa kanya.

¹⁸ Unman may apas kay magsaad sa iba; ga rutay yi inda kay pag-isulung. Mana kay magpakasaad bumalik sa kanya parihu sa pagsuyuk danum sa kay bilug ngatay parihu sa pagsuyup lana sa kay manga but-ul.

¹⁹ Ag mana pumirmaminti inda sa kanya bilang ga sa rutay masulungan sa kay bilug ngatay bilang ga hawud mahawudan pirmi sa kanya.”

²⁰ Panginuun, mana imaw inda ti kanmu iparusa sa manga magbangdan ag magbagaw daut sa kangku.

²¹ Dapat awati aku, Panginuun Diyus, hampay galangun kawu. Ribrihan aku dahil sa kanmu kaayadan ag pagmahal.

²² Dahil makuri ag pugri aku, ag magkabyatan gid kang naisipan.

²³ Mag-amat-amat yi magkadura kang buhi parihu sa aninu nu yabi. Bilang ga parihu aku sa apan kinayig.

²⁴ Magpanlumuy kang tuud dahil sa unman maghandum karan-unun. Masyadu yi aku maniwang.

²⁵ Nagbaliw aku puruyaun niku manga kalaban. Mag-il-ilung sida nu mag-akitan nida aku.

²⁶ Awati aku, Panginuun, niku Diyus; ribrihan aku angay sa kanmu pagmahal.

²⁷ Ag maalaman niku manga kalaban kuntay kawu, Panginuun, ti nagribri sa kangku.

²⁸ Pagsaadan nida aku, dapat kawu magpapalad sa kangku. Mangay-a sida nu girahun nida aku, dapat aku ti kanmu manugsirbi makabaya.

²⁹ Sida ti magbangdan sa kangku matabunan kakay-ahan parihu sa rutay matabunan sa bilug.

³⁰ Pasalamatan gid niku ti Panginuun; dayawun niku siya sa atubangan mayamu pag manga tawu.

³¹ Dahil pagbaliwahan niya ti manga tawu arawatan hampay makaribri sida sa manga magparusa sa kanda sa kamatayan.