Kanta 108 - Hanunuu

Kanta 108 Darangin para sa Awat Diyus

Ti isinurat ni Dabid pag kanta.

¹ Diyus, magsarig gid aku sa kanmu. Kantahan niku kawu manga pagdayaw sa buu niku tagipusuun.

² Mipulaw aku madlum surip, ialistu niku kang manga garamitun may manga bakyang sa pagdayaw sa kanmu.

³ Panginuun, dayawun niku kawu sa karaw-an nimu manga nasakupan. Kantahan niku kawu sa karaw-an manga taga iba pag nasyun.

⁴ Nakan kanmu pagmahal ag katapatan balaw gid masukat; mas abwat waya inda sa kalangitan.

⁵ Diyus, ipakakit nimu kanmu kamaskihan sa kalangitan hanggan sa buu kalibutan.

⁶ Ribrihan kami sa panab-anan nimu kamaskihan. Saguta kang darangin hampay makaribri kami imaw ti kanmu manga pagmahalun.

⁷ Diyus, magkun kawu ati sa kanmu Balay, “Manalu aku; tungaun niku ti Sikim ag ti Karatagan Sukut ag ipamakaun sa kang manga nasakupan.

⁸ Kangku ti Gilyad hanggan ti Manasis. Ti Ipraim ga kang pinagka kalu baul, ag ti Huda kang pinagka sugkud hari.

⁹ Ti Muab kang pinagka suruguun, ga palanggana urugasan uyahun, kamang ag lulud. Pag-iyamut niku kang lapak sa Idum, agud ipakakit kangku diman sida. Magringgit aku sa panalu laban sa Pilistiya.”

¹⁰ Si unu ti mandara sa kangku sa Idum ag siyun sa banwa sangput manga alad batu?

¹¹ Bukun aw lugud kawu, Diyus, nagbugya sa kanmi ag unman yi mag-iba sa kanmi manga sundalu?

¹² Awati kami laban sa kanmi manga kalaban, dahil unman may pulus ti awat tawu.

¹³ Manalu kami sa panab-anan nimu awat, nimi Diyus, dahil taluhun nimu kanmi manga kalaban.