Kanta 106 - Hanunuu

Kanta 106 Ti Kaayadan Diyus sa Kay Nasakupan

¹ Dayawa ti Panginuun! Pasalamati ti Panginuun dahil mayad siya; kay pagmahal balaw may katugkaan.

² Unman may makatultul ngatay makadayaw lubus sa makamaskihan pag manga binwat Panginuun.

³ Mapalad ti tawu magbuwat tama ag matadlung sa tanan pag udas.

⁴ Panginuun, alalahana aku nu mag-awat kawu sa kanmu nasakupan; ribrihan diman aku nu magribri kawu sa kanda,

⁵ hampay matanggap diman niku ti kaabundahan nimu pinili pag nasyun ag hampay makasamit diman aku kanda kabayaan, ag makapaminsan aku sa kanda pagdayaw sa kanmu.

⁶ Nagkasala kami parihu sa kanmi manga ginurang; daut gid kanmi binwat.

⁷ Katpung ati sa Ihiptu kanmi manga ginurang, balaw nida binati kanmu makadululaw pag manga buwat. Balaw nida inalaala kanmu pagmahal ipinakakit sa kanda pira ka pag ulit, ag naglaban sida sa kanmu sa Marara pag Dagat.

⁸ Dapat irinibri nimu sida hampay madayaw kawu ag makitan nida kanmu kamaskihan.

⁹ Binilinan Panginuun ti Marara pag Dagat kuntay mak-at, ag nak-at ngani; ag giniyahan niya kay nasakupan sa pagdipay sa dagat ga maglakaw lang sida sa pangawakawaan.

¹⁰ Irinibri niya sida sa kamang manga kalaban.

¹¹ Tinabunan danum kanda manga kalaban ag balaw gid may nakaribri sa kanda.

¹² Nakan nagpaniwala sida sa kay manga taratu ag nagkanta sida manga pagdayaw sa kanya.

¹³ Dapat nalimtan rargu nida kay binwat ag unman sida mag-alagad sa kay patigayun.

¹⁴ Ati sa pangawakawaan, sinubukan nida ti Diyus dahil sa kanda masyadu pag pangaibugun sa karan-unun.

¹⁵ Nakan ipinakaun niya sa kanda ti kanda paghagadun, dapat pinadaran-an waydi niya sida sakit imaw ti nagpalumuy sa kanda.

¹⁶ Ati sa kanda pag kampu sa pangawakawaan, naghirak sida kan Muysis ag kan Aarun. Si Aarun imaw ti itinalaga hampay sumirbi sa Panginuun.

¹⁷ Nakan ngani nabka ti daga ag nalagpak si Datan ag si Abiram bag-u kanda manga magtal-anakan.

¹⁸ Ag may apuy waya gid imaw ti nagsunug sa kanda daut pag manga manugsunud.

¹⁹ Ati sa Hurib, nagbuwat ti manga Israilita gintu pag baka ag sinamba nida inda pag diyus-diyusan.

²⁰ Kanda makamaskihan pag Diyus inilisan nida usa ka histuda tudu baka magharab ilamnun.

^21-22 Nalimtan nida ti Diyus imaw ti nagribri sa kanda ag nagbuwat makadululaw hanggan lilingutan pag buwat ati sa Ihiptu, ti daga manga linahi ni Kam ati sa Marara pag Dagat.

²³ Rinuris yi mana Diyus kay nasakupan nu balaw nagpakaraw-an si Muysis kay manugsirbi, agud manpakihampang sa kanya kuntay pigili niya kay pangagalit hampay balaw niya sida ipadamhak.

²⁴ Dinayu waya gid nida ti mayad pag daga dahil unman sida magpaniwala sa taratu Diyus.

²⁵ Nagriklamu sida sa sulud nida manga turda, ag unman sida magsunud sa Panginuun.

²⁶ Nakan nagsumpa ti Diyus kuntay panmatyun niya sida sa pangawakawaan,

²⁷ ag wayakun niya kanda manga linahi sa tuhay pag manga nasyun nu naan magkaramatay sida.

²⁸ Isinagda nida kanda sadili sa diyus-diyusan si Baal imaw ti ati sa Bantud Piyur ag nagkaun sida manga handug ihinandug sa manga namatay.

²⁹ Pinaisug nida ti Panginuun dahil sa kanda daut pag manga binwat, nakan ngani nagras-ug sa kanda ti sarut.

³⁰ Dapat nagpakaraw-an si Piniis nakan inmapas ti sarut.

³¹ Ti binwat ni Piniis pag-ibilang matadlung, alalahanun inda manga tawu hanggan aban.

³² Ati sa bulbugan Miriba, pinaisug manga Israilita ti Panginuun, ag naarimputu si Muysis sa kanda manga binwat.

³³ Dahil ginalit nida si Muysis, nakabagaw siya manga bagaw unman niya inisip mayad.

³⁴ Unman minatay manga Israilita ti manga nasakupan sa Kanaan angay sa isinugu sa kanda Panginuun.

³⁵ Bagkus ngap, nagpausa sida sa inda pag manga nasakupan ag sinunud nida kanda pagbuwatun.

³⁶ Sinamba nida kanda manga diyus-diyusan ag imaw ti nagdara sa kanda sa kadamhakan.

³⁷ Isinagda nida kanda manga anak sa manga labang,

³⁸ imaw ti manga diyus-diyusan Kanaan. Dahil sa kanda nagmatay sa kanda ud may namuangan pag manga anak, inuringan nida ti daga Kanaan

³⁹ hanggan kanda sadili. Dahil sa kanda binwat, nagpudil sida sa Diyus parihu sa usa ka babayi magpanguragin.

⁴⁰ Nakan nagalit ti Panginuun sa kay pag-apuun pag nasakupan, ag pagkadat-an niya sida.

⁴¹ Ipinahintulut niya sida sa manga kalaban nida pag manga nasyun, ag sinakup sida nida manga kalaban pag manga nasyun.

⁴² Binwat panawuhun sida nida manga kalaban.

⁴³ Mayamu ulit irinibri sida Diyus, dapat pagpalabihun waya gid nida maglaban sa kanya, nakan ngani pinakaababa sida dahil sa kanda kasalanan.

⁴⁴ Dapat nu magtawag sida sa Diyus, pag-awatan diman niya sida sa kanda manga kakurian.

⁴⁵ Pag-alalahanun Diyus kay kasunduan sa kanda, ag dahil sa kay daka pag mahal sa kanda nagbag-u kay naisipan balaw yi niya sida parusahan.

⁴⁶ Pinahintulut niya kaawaan sida manga nagbihag sa kanda.

⁴⁷ Ribrihan kami, Panginuun nimi Diyus, ag tipuna maan kami sa kanmi daga ginan sa manga nasyun, hampay makapasalamat kami ag makadayaw sa kanmu banal pag ngaran.

⁴⁸ Pagdayawun ti Panginuun, ti Diyus Israil, unman may katapusan. Ti tanan pag nasakupan magsagut magkun, “Amin!” Dayawun ti Panginuun!