Kanta 105 - Hanunuu

Kanta 105 Ti Diyus ag ti Kay Nasakupan

¹ Pasalamati niyu ti Panginuun; sambaha niyu siya! Tultulan sa manga tawu kay manga binuwat.

² Kantahi niyu siya manga pagdayaw; itultul ti tanan pag makadululaw niya manga buwat.

³ Dayawun niyu kay banal pag ngaran. Pagmasulung kamu manga magdangup sa kanya.

⁴ Pagsarig kamu sa Panginuun ag sa kay kabisugan. Pagpakarani kamu pirmi sa kanya.

^5-6 Kamu manga pinili Diyus manga linahi ni Abraham ti manugsirbi Diyus, manga linahi diman ni Hakub, alalahana niyu kay makadululaw pag manga buwat, kay manga lilingutan, ag kay manga paghatul.

⁷ Siya ti Panginuun kanta Diyus, ag magsintinsiya siya sa buu kalibutan.

⁸ Pag-alalahanun niya pirmi kay kasunduan. Balaw gid niya pagkalimtan kay taratu tugka sa linibu pag sinulput tawu.

⁹ Inda pag taratu binwat niya sa kan Abraham ag itinaratu diman niya sa kan Isaak.

¹⁰ Ipinarargu niya inda pag kasunduan sa kan Hakub, pag ingarnan diman Israil, ag pumarargu inda pag kasunduan tugka aban.

¹¹ Magkun siya sa kada usa sa kanda, “Ipakaun niku sa kanmu ti daga Kanaan bilang maranahun nimu hanggan nimu manga linahi.”

¹² Kaybi pira-pira waya ti nasakupan Diyus, ag manga day-uhan waya sida sa daga Kanaan.

¹³ Pasalyu-salyu sida sa manga nasyun ag manga kaharian.

¹⁴ Dapat balaw pagpahintulutan Diyus unu-unuhun sida. Hampay maalagaan sida, tinamyaw niya ti manga hari maglaban sa kanda. Magkun siya,

¹⁵ “Danga niyu paglabuta kang pinili pag manga manugsirbi; danga niyu pagsakti kang manga purupita.”

¹⁶ Nagpadara ti Diyus kalun-usan sa daga Kanaan. Tinabu niya bin-ul ti tanan nida karan-unun.

¹⁷ Dapat ipinauna yi niya si Husi sa Ihiptu agud awatan sida. Ipinabili ati si Husi bilang usa ka panawuhun.

¹⁸ Tinarikadahan kay lulud ag pinaulian baul kay liug,

¹⁹ tugka sa nangyari kay ipinurupita. Ti tultulanun Panginuun natupad sa kanya magpatutuu kuntay matadlung siya.

²⁰ Pinalpasan siya hari Ihiptu takinan mayamu pag tawu,

²¹ ag binwat siya manugpanguna sa balay hari ag sa tanan niya kasiyunan.

²² Bilang manugpanguna, may karampatan siya magtamyaw sa manga takinan hari ag magpatigayun sa kay manga tagapaanyu.

²³ Pagka dugay nag-atag si Hakub hanggan kay magtal-anakan sa Ihiptu, ti daga manga linahi ni Kam, ag ati sida nangulian bilang manga day-uhan.

²⁴ Pinayamu Panginuun kay manga nasakupan; makuri yi sida taluhun manga taga Ihiptu kanda manga kalaban.

²⁵ Pinahintulutan Panginuun labanan ag lukuhun manga taga Ihiptu kay nasakupan kay manga manugsirbi.

²⁶ Dahil ipinadara niya si Muysis kay manugsirbi ag si Aarun kay pinili.

²⁷ Ipinakakit nida ati sa daga manga linahi ni Kam ti makadululaw pag manga buwat Diyus.

²⁸ Pinadulum Diyus ti Ihiptu; dapat naglaban dingapu ti manga taga Ihiptu sa kay manga sugu.

²⁹ Binwat niya dugu kanda danum, nakan nagkaramatay ti manga isda.

³⁰ Napunu pikaw kanda daga, una ti manga sulud-sulud nida manga hari.

³¹ Sa pag sugu Diyus, napunu insiktu ag alukhuk kanda daga.

³² Sa halip uran, yilu ngap ag kilat ti ipinadara niya sa kanda daga.

³³ Dinaut niya kanda manga tanum ubas hanggan manga puun igus, ag ti iba waya manga kayu.

³⁴ Sa kay sugu, nagras-ug ti manga apan balaw mabilang.

³⁵ Ag kinaun nida ti tanan halaman sa kanda daga hanggan kanda manga ani.

³⁶ Minatay Diyus ti tanan nida panganay pag lalaki.

³⁷ Rargu pinalpasan niya ti manga Israilita sa Ihiptu balaw may naunu, ag may dara waya sida manga pilak ag manga gintu.

³⁸ Nakabaya ti manga taga Ihiptu sa pag-ighit manga Israilita, dahil magkadala sida sa kanda.

³⁹ Pagka naglakaw yi ti manga Israilita, nagpauli ti Diyus rurum maghamuy sa kanda ag apuy pagpakaun rayaw sa kanda sa yabi.

⁴⁰ Naghagad sida karan-unun, pinadaran-an sida Diyus manga pugu, ag binusug niya sida karan-unun mana ginan sa langit.

⁴¹ Pinabka niya ti batu ag binmulwak ti danum. Nagbulus inda sa pangawakawaan ga sapa.

⁴² Binwat inda tanan Diyus dahil balaw niya kinalimtan kay taratu sa kan Abraham kay manugsirbi.

⁴³ Ipinalwas niya ginan sa Ihiptu ti nasakupan kay pinili, masulung ag maghuruyawan sa kabayaan.

⁴⁴ Ag ipinakaun niya sa kanda ti daga manga iba nasyun; minana nida ti binudlayan iba.

⁴⁵ Binwat inda Diyus hampay tupadun nida kay manga surundanun ag kasuguan. Dayawa ti Panginuun.