Kanta 104 - Hanunuu

Kanta 104 Pagdayaw sa Diyus Manuglalang

¹ Dayawun niku ti Panginuun. Panginuun niku Diyus, makamaskihan gid kawu. Kanmu kapangyarihan ag kadayawan imaw ti kanmu rutay.

² Magkatabunan kawu rayaw ga kanmu rutay ag linadlad nimu ti langit ga turda.

³ Pag-ipatindug nimu kanmu ulian sa tungud waya kalayawan. Binwat nimu ti manga rurum kanmu kalisa sarakyan, ag magsakay kawu pag-ipayag durus.

⁴ Pagbuwatun nimu ti durus kanmu manga manugbarita, ag ti maglabdab apuy kanmu manga suruguun.

⁵ Ipinauli nimu ti kalibutan sa kay patakinan, ag balaw inda matandug hanggan aban.

⁶ Pagtabunan nimu danum ti kalibutan ga rutay, ag maglapaw inda sa kabantudan.

⁷ Sa kanmu magkurarug pag tamyaw, magkak-at ti danum.

⁸ Nagbulus inda sa manga kabantudan hanggan sa karatagan, ag sa iba waya pag manga rugar iinalistu nimu para sa kanda.

⁹ Pinaulian nimu sida manga katugkaan balaw nida lapawan hampay balaw maan matabunan ti kalibutan.

¹⁰ Pinabulus nimu ti manga bulbugan sa manga luung, ag nagbulus ti danum sa tab-anan manga bantud.

¹¹ Nakan ti tanan talun hayup, hanggan ti talun asnu may mainum di danum.

¹² Ag arani sa danum, magpugad ti manga manuk, hanggan sa manga sanga kayu magkanta sida.

¹³ Ginan sa kanmu ulian sa langit, pagpauranan nimu ti manga bantud, ag dahil sa tunda kanmu binwat, magtanggap papalad ti kalibutan.

¹⁴ Pagpatubuun nimu ti manga ilamnun para sa manga hayup, ag ti manga halaman para sa manga tawu hampay may karan-unun sida ginan sa manga naani;

¹⁵ may mainum intus makapasulung sa kanda, may lana imaw ti makapalitis sa kanda uyahun, ag may tinapay imaw ti makapabisug sa kanda.

¹⁶ Magkadanman mayad kanmu manga kayu sidru, Panginuun, sa Libanun kawu gid ngap ti nagtanum.

¹⁷ Magpugad ti manga manuk sa tunda pag manga kayu; ti tagwak magpugad sa manga kayu sipris.

¹⁸ Ti talun kambing mag-uli sa arabwat pag manga bantud, ag ti manga kunihu magpatagu sa manga kabatuhan.

¹⁹ Linalang nimu ti bulan bilang palatandaan sa panahun; ag ti init pag ipasangday nimu sa kang-ud pag udas.

²⁰ Binwat nimu ti linalang nimu ti kadudulman; ag nu yabi maglinakaw ti mayamu pag manga hayup sa katalunan.

²¹ Mag-ngurub ti manga liyun habang magligaw kanda karan-unun ipinakaun nimu sa kanda.

²² Ag nu magsinggit yi ti init mag-uli sida sa kanda paratag-an ag ati pag magpahari.

²³ Ti manga tawu magluwas sa kanda manga balay ag manarabahu tugka marukirum.

²⁴ Panginuun, kay kayamu kanmu manga binwat. Linalang nimu sida tanan angay sa kanmu kadunungan. Ti kalibutan punu nimu linalang.

²⁵ Ti dagat masyadu malapad, ag may mayamu inda pag manga linalang balaw mabilang, daraka ag dariit.

²⁶ Ti manga barku paatabug-paataytag asan sa kalalawdan, ag asan diman maglanguy-languy ti daragun pag Libyatan kanmu linalang.

²⁷ Ti tanan pag buhi linalang magsarig sa kanmu sa kanda karan-unun sa udas kailangan nida.

²⁸ Pagpakan-an nimu sida karan-unun ag pagkan-un nida inda, ag magkabsug sida.

²⁹ Dapat nu pabay-anan nimu sida, magkadala sida; nu bul-un nimu kanda arup, magkamatay sida ag magbalik sa daga sa nagbul-an sa kanda.

³⁰ Pagpakan-an nimu arup ti bag-u pag manga linalang. Sa tunda pag paraan, pagpakan-an nimu bag-u pag manga linalang ti kalibutan.

³¹ Mana kanmu kadayawan, Panginuun, pumarargu sa balaw may katapusan. Mana pagmasulung kawu sa tanan nimu manga linalang.

³² Nu bantayun nimu ti kalibutan, magkatandug inda. Nu tandugun nimu ti manga bantud, mag-anus inda.

³³ Manganta aku sa Panginuun sa buu niku buhi. Manganta aku sa pagdayaw sa kang Diyus hanggan magkabuhi aku.

³⁴ Mana magbaya siya sa kang pag-isip-isipun. Masulung aku sa Panginuun;

³⁵ dapat ti manga daut ag makasalanan rurisun sa kalibutan ag unman yi sida makitan. Dayawun niku ti Panginuun buu tagipusuun. Dayawa ti Panginuun!