Kanta 10 - Hanunuu

Kanta 10 Darangin hampay Awatan Panginuun

¹ Panginuun, hayga lugud arayu kawu? Hayga lugud magpatagu kawu sa udas kakurian?

² Dahil sa palabi-labihun manga daut, pagpakurianan nida ti manga makuri. Mana sa kanda ngap pag mangyari kanda paggayakun daut sa iba.

³ Dahil pag-ipadayaw nida kanda daut pag manga kagustuhan. Sida pag manga daluk magsaad ag magpuya sa kanmu, Panginuun.

⁴ Dahil sa kayabangan manga daut pag tawu, unman sida magdangup sa kanmu. Unman gid sida mag-isip tungkul sa kanmu.

⁵ Abunda pirmi sida, ag pag-ipasipala lang nida kanmu pagsintinsiya. Pagpuyaan waya nida ti tanan nida kalaban.

⁶ Mag-isip sida balaw gid sida maampara, nu unman pirmi sida masulung ag unman may daut mangyari sa kanda.

⁷ Kanda pagbagawun pudu palabi-labihun, kapudilan hanggan pamadala. Magbagaw diman sida daut pag manga bagaw masakit sa iba.

⁸ Sa manga banwa mag-alagad sida ati sa kanda paratag-an magpuut sa manga unman may kamalay-malay pag lumalawuy hampay matyun nida.

⁹ Mag-alagad sida mataguan parihu sa liyun, hampay dakpun ti manga pugri, nu madakup yi rargu nida pagguyudun.

¹⁰ Sa panab-anan nida kusug pagpulidun nida ti manga kaawaawa tugka sa unman yi makabangun.

¹¹ Kanda isip unman sida pagpansinun Diyus ag unman mag-akitan kanda manga pagbuwatun.

¹² Malu duy, Panginuun Diyus, parusahi yi ti manga daut! Danga pagpabay-ani ti manga pugri.

¹³ Diyus, hayga kawu pagpuyaan manga daut? Magkun waya sida balaw kunu nimu sida parusahan.

¹⁴ Dapat nakitan nimu ti manga mag-agwanta hanggan ti manga magkakurian, ag alistu kawu umawat sa kanda. Magpakarani sa kanmu ti manga kaawaawa parihu sa manga ulila, ag pag-awatan nimu sida.

¹⁵ Bul-a nimu ti kabisugan daut pag manga tawu. Parusahi sida sa kanda manga kadautan tugka sa apasan yi nida inda.

¹⁶ Panginuun, kawu ti hari unman may katapusan. Madura ti daut pag manga nasyun sa kalibutan kanmu linalang.

¹⁷ Panginuun, nasaydan nimu ti darangin manga pugri. Patingihi nimu sida ag pabisuga.

¹⁸ Pakan-i nimu katadlungan ti manga ulila hanggan ti manga pag-apihun, hampay balaw yi sida pagpadalaun tawu ginan diman waydi sa daga.