Kabagawan 9 - Hanunuu

Ti Kadunungan ag Kalukuhan

¹ Ti kadunungan parihu sa usa ka tawu nagpatindug daka ag marinu pag balay.

² Nanpamasaruhan siya. Iinalistu niya ti manga karan-unun hanggan manga irinmun.

³ Bag-u sinugu niya kay manga suruguun babayi umati sa abwat pag manga rugar sa banwa hampay ibarita ti kaindaay:

⁴ “Kamu pag manga kurang sa kadunungan, pagban-awan niku kamu sa usa ka daka pag karan-an.

⁵ Pagsitay kamu pagkaun karan-unun ag pag-inum sa inalistu para sa kanyu.

⁶ Duraa yi niyu ti kalukuhan hampay lumawig kanyu buhi ag may kadungan.”

⁷ Nu sungyawun nimu ti tawu magpuya, surugun kawu niya. Nu sungyawun nimu ti daut pag tawu, saktan niya kawu.

⁸ Danga pagsungyawa ti tawu magpuya dahil kagalitan kawu niya. Sungyawa ti madunung pag tawu ag mahalun kawu niya.

⁹ Nu tudluan nimu ti madunung, lalu waya gid siya dumunung. Nu tudluan nimu ti matadlung pag tawu, madugangan waya gid kay alam.

¹⁰ Ti paggalang sa Panginuun imaw ti gimpuunan kadunungan. Ag ti magkilala sa Banal pag Diyus may imaw intindi.

¹¹ Sa panab-anan kadunungan, lumawig kanmu buhi.

¹² Nu madunung kawu, makapakaun inda kaayadan sa kanmu sadili, dapat nu pagkadat-an nimu ti kadunungan, pagpakurian lang nimu kanmu sadili.

¹³ Ti unman may alam parihu sa usa ka babayi maingay, unman may dunung, ag unman may kaalaman.

¹⁴ Matukawan siya sa sabian niya balay ngatay sa abwat pag manga rugar sa banwa,

¹⁵ magtawag sa manga maglawuy atabug sa kanda manga tarabahu.

¹⁶ Magkun siya, “Abala kamu pag manga unman may kadunungan.” Ag magkun waya siya sa manga unman may intindi,

¹⁷ “Mas masarap ti tinakaw pag danum ag mas masarap ti tinapay karan-unun nu pagkan-un sa lihim.”

¹⁸ Dapat unman may alam tunda pag manga tawu ti mag-atag sa kanya kuntay sida magkaramatay. Ti manga nakaati yi sa kanya ati yi kainda sa ulian manga namatay.