Kabagawan 7 - Hanunuu

¹ Anak, tupada ti manga pagsabihun niku sa kanmu. Tanuman inda sa kanmu kaisipan ag

² buwata ti manga pag-isugu niku sa kanmu, hampay lumawig kanmu buhi. Dahanan kaayad ti manga pag-itudlu niku sa kanmu parihu sa pagdahan nimu sa kanmu mata.

³ Itanum inda sa kanmu kaisipan hampay balaw gid nimu malimtan.

⁴ Kilalan-un nimu ga kanmu patar-ari babayi ti kadunungan ag ti pag-intindi ga kanmu ampud.

⁵ Dahil makapakarayu inda sa kanmu sa daut pag babayi makagarya kay pamagaw.

Ti Daut pag Babayi

⁶ Kas-a nanlinggaha aku sa kanmi balay,

⁷ ag nakitan niku ti manga kalay-awan lalaki unman may alam sa buhi. Ti usa sa kanda unman may intindi.

⁸ Maglakaw siya atabug sa may pagsalakan pag dalan nu naan asan ti balay usa ka daut pag babayi.

⁹ Ati katpung malambung yi ag madlum yi.

¹⁰ Bag-u sinulang siya babayi kay rutay parihu sa sulung babayi baraydan. Nakagayak yi siya daan nu hintay kay buwatun sa tunda pag lalaki.

¹¹ Inda pag babayi mabagaw ag unman magkay-a. Unman siya magtahan sa balay.

¹² Pirmi siya sa luwas manga dalan ngatay sa manga pagsalakan, ag nu kas-a sa manga buruybuyahan.

¹³ Pagka nakitan niya ti lalaki, hinagkung niya siya ag inarkan. Ag nagbagaw siya unman may kay-a,

¹⁴ “Tinupad niku kainda kang taratu manhandug, ag may manga taguban ati sa balay ginan sa ihinandug niku pag hayup.

¹⁵ Nakan hinanap niku kawu, ag mayad gid nakitan niku kawu.

¹⁶ Sinuhian yi niku kang igyaan rutay may tuhay-tuhay pag kulay ginan waya sa Ihiptu.

¹⁷ Pinaulian niku inda manga pamanglu mira, aluwi, ag sinamun.

¹⁸ Nakan abala, mangululidan kita; manpakasulung kita sa kabayaan tugka surip,

¹⁹ dahil unman sitay kang asawa. Linmakaw siya sa arayu.

²⁰ Mayamu pag kuwarta kay dinara, manga duwa waya ka duminggu bag-u siya muli.”

²¹ Nakan nagarya niya ti lalaki sa panab-anan niya matagsing ag makagarya pag manga bagaw.

²² Sinmunud ti lalaki sa kanya parihu sa baka pagguyudun tag sa iriyawan ngatay parihu sa karasyaw atabug sa suduk

²³ hampay matyun siya sa pamana. Parihu diman siya sa usa ka manuk magdaldali atabug sa suduk, unman niya alam kamatayan maaw kay patabgan.

²⁴ Nakan manga anak, patingihi niyu mayad kang pagsabihun.

²⁵ Danga kamu pagarya sa tunda pag kalasi babayi; danga kamu patalang sa kanya.

²⁶ Mayamu yi pag manga lalaki ti nidamhak dahil sa kanya.

²⁷ Nu umati kamu sa kay balay, parihu lang sa nangatag kamu sa rugar manga namatay.