Kabagawan 5 - Hanunuu

Paandam Laban sa Magpanguragin

¹ Anak, patingihi kaayad kang manga bagaw may kadunungan,

² hampay dumunung kawu magpasya sa hustu hanggan magbagaw may kadunungan.

³ Ti bagaw daut pag babayi matagsing parihu sa daykut, ag masarap parihu sa lana ulibu.

⁴ Dapat sa uryan kay itayak sa kanmu kakurian ag karukuan.

⁵ Nu paangay kawu sa kanya, darahun niya kawu sa rugar manga namatay; dahil kay paglakawan pag dalan atabug sa kamatayan.

⁶ Unman niya pagbatiun ti dalan atabug sa buhi. Balaw matadlung kay paglakawan ag unman ngani niya inda alam.

⁷ Nakan manga anak, patingihi niyu aku ag sunda.

⁸ Pagpakarayu kamu sa katida pag babayi. Danga kamu magpakarani sa kay balay.

⁹ Dahil barang mapuyaan kanyu pagkatawu ag miatag sa iba, ag mamatay kamu sa kamang manga tawu unman may pangaawa.

¹⁰ Ti tanan niyu kayamanan hanggan iba waya pag pinangabudlayan bul-un lang manga taga iba rugar.

¹¹ Mangarunghung kamu nu hirimugtasun yi kanyu arup, nu dilikadu yi gid ti buu bilug niyu.

¹² Ag sumabi kamu, “Malu ngani dahil unman niku binati ti manga pagtadlung sa kang sadili.

¹³ Unman aku nagpatingi sa kang manga manugtudlu.

¹⁴ Nakan kainda, atay aku hirimugtasun sa atubangan kadamlan.”

¹⁵ Kailangan sa kanmu lang asawa kawu pag mag-ulid. Nu sa danum, sa kanmu lang sadili bulbugan kawu pag magbuul kanmu irinmun.

¹⁶ Danga nimu pabay-anan matulad sa bulbugan una si unu pag babayi ti makabuul ag makainum.

¹⁷ Kailangan ti mag-asawa para lang sa usa kag sa usa, danga maglabut sa iba.

¹⁸ Mana kanmu asawa bumaliw ga bulbugan papalad para sa kanmu. Pagbaya kawu sa naasawa nimu sa kalay-awan.

¹⁹ Marinu siya ag maangay parihu sa karasyaw, nakan mawili kawu pirmi sa kanya ag makabaya sa kay pagmahal.

²⁰ Anak, danga kawu magpadara mahalay pag babayi. Balaw dapat kawu magpaminsan sa iba asawa.

²¹ Dahil mag-akitan Panginuun ti tanan nimu pagbuwatun; una naan kawu katpung maghiling siya.

²² Ti buruwatun daut pag tawu imaw diman waydi ti sumuduk mismu kay sadili.

²³ Tumalang siya dahil sa kay kakurangan, ag mamatay siya dahil balaw siya magpatadlung.