Kabagawan 4 - Hanunuu

¹ Manga anak, patingihi niyu kaayad ti manga tamyaw niyu ama sa kanyu ugali, hampay dumunung kamu.

² Mayad kang pag-itudlu, nakan danga niyu inda pagpasipalahan.

³ Katpung anak waya aku sa pudir niku ama, palangga aku niku ina.

⁴ Tinudluan aku niku ama magkun, “Anak, alagai sa kanmu tagipusuun ti manga pag-itudlu niku sa kanmu. Sunda kang manga sugu sa kanmu hampay parargu kawu mangabuhi.

⁵ Sipagi nimu magkaimaw kawu kadunungan ag intindi. Danga pagkalimti ti manga pagsabihun niku sa kanmu, danga kawu magpablag sa inda.

⁶ Danga pagbugyahi ti kadunungan, bagkus ngap pahalagaan nimu, dahil tunda ti gumiya sa kanmu.

⁷ Ti kadunungan ngatay ti pan-intindi imaw ti pinakamahalaga sa tanan, nakan hingabta gid nimu magkaimaw inda una matabu waya ti tanan nimu kasiyunan.

⁸ Pahalgai ag tanggapa ti kadunungan, dahil makapakaun inda kadayawan sa kanmu.

⁹ Parihu inda sa busang kayu sangbaw makaparinu sa kanmu.”

¹⁰ Anak, patingihi ag tanggapa ti manga pagsabihun niku sa kanmu, hampay lumawig kanmu buhi.

¹¹ Tinudluan yi niku kawu kadunungan, nu kabitay kawu mangabuhi sa tama.

¹² Nakan nu sundun nimu inda, unman may makaampara sa kanmu magkabuhi, ag balaw kawu maunu.

¹³ Danga gid pagkalimti ti manga pagtadlung niku sa kanmu ugali; dahani inda sa kanmu tagipusuun dahil inda kanmu yi pinagkabuhi.

¹⁴ Danga maghuwad sa pagbuwatun manga daut pag tawu.

¹⁵ Amani gid inda ag pagparargu kawu sa kanmu magkabuhi matadlung.

¹⁶ Dahil unman sida makaturug nu unman sida makabwat daut ngatay maipadamhak ti iba.

¹⁷ Ti kadautan hanggan pagpuya ga karan-unun ag irinmun para sa kanda.

¹⁸ Ti pangabuhi tawu matadlung parihu sa pagbutlak init mag-amat di magrayaw habang magdugay.

¹⁹ Dapat ti pagpangabuhi daut pag manga tawu parihu sa kadudulman, unman nida alam nu hayga sida mag-idamhak.

²⁰ Anak, patingihi kaayad ti manga pag-itudlu niku sa kanmu;

²¹ danga nimu inda pagkalimti, ituduk gid nimu inda sa kanmu tagipusuun.

²² Dahil makapakaun inda kabisugan hanggan malawig pag buhi sa manga magkaibug.

²³ Alagai kaayad kanmu isip, dahil nu hintay kanmu pag-isipun imaw diman kanmu buhi.

²⁴ Danga kawu magbagaw daya ngatay kapudilan.

²⁵ Dahanan ti mata nu magbantay.

²⁶ Isip-isipa gid kaayad ti tanan nimu buwatun hampay mayad kay patabgan.

²⁷ Pagpangabuhi kawu matadlung; amani ti pagbuwat daut.