Kabagawan 31 - Hanunuu

Ti manga Kabagawan ni Hari Limwil

¹ Inda ti manga kabagawan ni Hari Limwil taga Masa. Inda ti itinudlu sa kanya niya ina:

² Anak niku, iinanak kawu bilang sagut sa kang manga darangin. Magbilin aku sa kanmu danga

³ pag-uyanga kanmu kabisugan hanggan kuwarta sa manga babayi, dahil sida ti dahilan pagkadamhak manga hari.

⁴ Limwil, balaw mahimu mag-inum makalangu ti manga hari. Balaw dapat magkaibug ti manga takinan sa makalangu pag manga irinmun.

⁵ Dahil nu malangu yi sida, magkalimut sida sa manga kasuguan, ag paglapastanganun nida ti karampatan manga pugri.

^6-7 Pabay-ani mag-inum ti manga tawu naduraan pag-asa ag magkakurian kay tagipusuun, hampay malimtan nida kanda kakurian ag manga kaarimputuhan.

⁸ Apinan nimu ti karampatan manga tawu kaawaawa, balaw makadipinsa sa kanda sadili.

⁹ Pagsintinsiya kawu sa balaw may pagkilingan, ag apini ti karampatan manga pugri.

Ti Mayad pag Asawa Babayi

¹⁰ Makuri hanapun ti mayad pag asawa babayi. Mahalaga waya siya kaysa mahalaga pag manga batu.

¹¹ Magtiwala gid kay asawa lalaki sa kanya, ag udyi may ikasabi sa kanya.

¹² Habang magkabuhi siya, pudu kaayadan ti pagbuwatun niya sa kay asawa ag balaw kadautan.

¹³ Masipag siya maghabul pisahan dilana hanggan linu.

¹⁴ Parihu siya sa barku manga manug-ahinti; magdara siya karan-unun una ginan waya siya sa arayu pag rugar.

¹⁵ Surip waya gid siya mag-ipulaw hampay man-alistu karan-unun para sa kay magtal-anakan, ag hampay sabihan kay manga suruguun babayi nu hintay kanda buwatun.

¹⁶ Madunung siya magpili kay bililyun pag daga. Bag-u kay pagpatanuman ubas ginan sa kuwarta kay natipun.

¹⁷ Mabaskug siya, masipag ag mabilis sa buruwatun.

¹⁸ Mayad siya magnigusyu, ag magtarabahu siya tugka sa yabi.

¹⁹ Siya diman ti magbuwat pisahan hampay buwatun rutay.

²⁰ Maraawat siya sa manga pugri hanggan sa manga magpangailangan.

²¹ Nu tag-ramig, unman siya magkataranta dahil may madamul siya pag manga rutay para sa kay magtal-anakan.

²² Siya diman ti magbuwat manga pansapin sa kanda kama. Ag kay manga rutay marinu ag mahalaga.

²³ Kilala kay asawa bilang usa sa manga manugpamahala sa kanda rugar.

²⁴ Magbuwat diman siya rutay hanggan huragkus, ag pag-ipabili niya inda sa manga manug-ahinti.

²⁵ Marig-un siya ag paggalangun, ag unman siya magkadala sa kay patabgan.

²⁶ Magbagaw siya may kadunungan, ag magtudlu siya may kaayadan.

²⁷ Masipag siya, ag pag-alagaan gid niya mayad kay magtal-anakan.

²⁸ Pagdayawun siya niya manga anak hanggan niya asawa, magkun,

²⁹ “Mayamu ti mayad pag asawa babayi, dapat kawu ti pinakamayad sa kanda tanan!”

³⁰ Ti makagararya makadaya, ag ti karinuan maglawuy lang. Dapat ti babayi maggalang sa Panginuun imaw ti mahimu dayawun.

³¹ Kailangan balusan siya sa kay mayad pag manga binwat ag parangalan sa kadamlan.