Kabagawan 30 - Hanunuu

Ti manga Kabagawan ni Agur

¹ Inda ti manga kabagawan ni Agur kay anak ni Haki taga Masa. Sinabi niya inda sa kanda ni Ityil ag ni Ukal:

² “Aku ti unman may namuangan sa tanan pag tawu. Kang kaisipan ga balaw yi tawu.

³ Unman gid aku nangadal dumunung, ag unman aku may kaalaman tungkul sa Diyus.

⁴ May tawu aw lugud nakadayik sa langit ag nakadugsun sa kalibutan? May tawu aw lugud nakadakup durus ngatay nakasaput danum sa kay rutay? May tawu aw lugud nakapauli manga katugkaan kalibutan? Nu may kilala kawu, tultuli aku kay ngaran hanggan kay ngaran niya manga anak.

⁵ Kada bagaw Diyus masarigan gid. Panangga sa manga maghagad awat sa kanya.

⁶ Danga pagdugangi kay manga bagaw, dahil nu buwatun nimu inda, tamyawun kawu niya ag patutuuhanan niya pudilun.”

⁷ Panginuun, may duwa aku ka bagay hagadun sa kanmu. Nu mahimu ipakaun nimu inda sa kangku habang buhi waya aku.

⁸ Kay una, awati aku danga aku magpudil. Kay ikadwa, danga aku pagpayamana ngatay pagpahirapa, nu unman pakan-i lang aku kang-ud niku pag pangangailangan.

⁹ Dahil nu yumaman aku, barang itanggi niku kawu, ag sabihun niku, “Si unu lugud ti Panginuun?” Ag nu pugri aku, barang manakaw aku ag mapakay-a niku kawu.

Dugang pag manga Kabagawan

¹⁰ Danga pagpuyai ti usa ka suruguun sa atubangan niya amu, dahil barang saadan niya kawu ag mangagwanta kawu.

¹¹ May manga kalay-awan unman magdarangin kuntay papaladan Diyus kanda manga gurang, bagkus ngap pagsaadan waya nida.

¹² May manga tawu kanda pamantay sa kanda sadili unman yi gid magsalan, dapat kay tutuu mauring kanda buhi.

¹³ May manga tawu masyadu gid marapadayaw, nu magbantay ga si unu yi gid.

¹⁴ May manga tawu diman maramuun, masyadu maapi-api sa kanda maggiit sa manga pugri.

¹⁵ Ti manga tawu maramuun parihu sa linta. Pirmi lang magsabi siya magkun, “Pakan-i aku!” May tulu ngatay upat ka bagay ti unman may kadayuan:

¹⁶ ti ulian manga namatay, ti baug pag babayi, ti daga unman may danum, ag ti apuy.

¹⁷ Ti tawu magpuya ag unman magsunud sa kay gurang tindukun manga uwak kay manga mata, ag kan-un manga agila kay bangkay.

¹⁸ May tulu ngatay upat ka bagay ti makadululaw para sa kangku ag unman niku magkasalman:

¹⁹ Nu kabitay makalayang ti agila sa kahawaan, nu kabitay makayapang ti ulay sa kabatuhan, nu kabitay ti barku makayataw sa dagat, ag nu kabitay ti lalaki magkaibug sa babayi.

²⁰ Kaindaay ti pagbuwatun babayi magpanguragin: Mag-ulid siya sa iba pag lalaki, pagkatapus magkun siya unman siya may nabwat daut.

²¹ May tulu ngatay upat ka bagay ti unman maagwanta manga tawu sa kalibutan:

^22-23 Ti suruguun nagbaliw hari, ti kurang kay intindi may abunda pag karan-unun, ti maaburiduhin pag babayi nakapangasawa, ag ti suruguun pag babayi inmublus sa kay amu babayi.

²⁴ May upat ka hayup dariit atay sa kalibutan dapat may kadunungan:

²⁵ Ti manga tigasaw, una sida malumuy, magtipun sida kanda karan-unun nu turungun,

²⁶ ti manga badyir, una unman sida mabaskug, magbuwat sida kanda ulian sa kabatuhan,

²⁷ ti manga apan, una unman sida may takinan, magdarasnan sida nu maglayang,

²⁸ ti manga suksuk, una mahimu dakpun nimu kamang, makitan sida sa manga balay hari.

²⁹ May tulu ngatay upat ka linalang ga si unu nu maglakaw:

³⁰ ti liyun, pinakamabisug sa tanan pag hayup ag unman may pagkadalaan,

³¹ ti magsarisid pag sulug manuk, ti lalaki pag kambing, ag ti hari magdumara sa kay manga sundalu.

³² Nu sa kanmu kayabangan magpadayaw kawu ag maggayak daut, apasi yi inda!

³³ Man-aw lugud nu pagkalkalugun nimu ti malaput pag gatas bumaliw inda mantikilya? Ag unman aw lugud nu hampakun nimu ti irung usa ka tawu mandugu inda? Nakan nu galitun nimu ti usa ka tawu, makapaumpisa inda kaguluhan.