Kabagawan 29 - Hanunuu

¹ Ti tawu magpaganit waya gid kay tagipusuun una pira yi ginan siya tamyawun midamhak lang rargu ag unman yi makabangun waya.

² Nu manga matadlung ti pumanguna, magbarayaan ti manga tawu; dapat nu manga daut yi ti pumanguna, magpanruku gid sida.

³ Ti tawu magkaibug sa kadunungan magpakaun kabayaan sa kay ama. Ti tawu marakuyug sa manga babayi baraydan mag-uyang lang siya kay kuwarta.

⁴ Nu pagkaibgan hari ti katadlungan, pagparig-unun niya kay kaharian; dapat nu pagkaibgan niya ti suhul, pag-ipadamhak niya kay kaharian.

⁵ Ti tawu magpabalhinguun magdayaw sa kay kaparihu, may paggayakun daut.

⁶ Ti daut pag tawu masduk sa kay sadili pag kasalanan, dapat ti matadlung pag tawu manganta may kabayaan.

⁷ Pagkilalan-un matadlung pag tawu ti karampatan manga pugri. Balaw inda masalman manga daut pag tawu.

⁸ Ti manga tawu magpuya makapaumpisa kaguluhan sa usa ka banwa, dapat ti madunung pag manga tawu makapakaun kahusayan.

⁹ Unman gid may patabgan nu ihabla madunung pag tawu ti usa ka unman may intindi pag tawu, dahil magpakabagaw lang siya ag manpuya.

¹⁰ Pagkadat-an ag pagkaibgan matyun manga manugmatay ti manga tawu magpangbuhi matadlung ag unman may ikasabi.

¹¹ Ti kurang kay intindi pag tawu unman makapigil sa kay pangagalit, dapat ti madunung pag tawu makapigil di sa kay sadili.

¹² Nu ti usa ka takinan magpaniwala sa manga kapudilan, ti tanan niya manga manugsirbi bumaliw daut.

¹³ Ti pugri hanggan ti magpan-api parihu pinakan-an Panginuun pamantay.

¹⁴ Nu matadlung ti paghatul usa ka hari sa manga pugri, pumarargu kay paghari.

¹⁵ Ti pagbakul hanggan pagtamyaw sa anak makapakaun intindi sa kanya, dapat nu pabay-anan lang siya, makapakaun siya kakay-ahan sa kay ina.

¹⁶ Nu manga daut ti mandumara, magdugang ti kadautan. Dapat inda sida midamhak, ag makitan inda manga matadlung.

¹⁷ Pagtamyawa kanmu anak, ag pakan-an niya kawu kahusayan ag kabayaan.

¹⁸ Nu unman may patigayun Diyus maggiya sa usa ka nasyun, unman inda may kahusayan. Mapalad ti manga tawu magtupad sa manga pag-itudlu Diyus.

¹⁹ May manga suruguun unman nimu mapatigayunan sa panab-anan lang bagaw, dahil una magkasalman nida kawu, unman sida magsagut.

²⁰ Mayad waya ti patabgan unman may intindi pag tawu kaysa tawu paharus-harus lang sa bagaw.

²¹ Nu pagpasugtan lang nimu kanmu suruguun ginan sa anak waya siya, aban sa uryan bumaliw dahilan nimu siya.

²² Ti tawu madali magalit makapaumpisa sa kaguluhan, ag pirmi lang siya magsalan.

²³ Ti kayabangan tawu makapakaun sa kanya kakay-ahan, dapat ti pagpakumbaba tawu makapakaun sa kanya kadayawan.

²⁴ Ti tawu kasabwat sa magtakaw pag-ipadamhak niya kay sadili. Una ipinasumpa siya pagtultul kay tutuu, unman gid siya magtultul.

²⁵ Mahawag nu madalain kita. Dapat nu magsarig lang kita sa Panginuun, balaw gid kita maunu.

²⁶ Mayamu ti maghagad kahilingan sa usa ka takinan, dapat ti Panginuun lang gid ti makapakaun katadlungan.

²⁷ Pagkadat-an manga matadlung ti manga daut, ag pagkadat-an manga daut ti manga matadlung.