Kabagawan 28 - Hanunuu

¹ Ti daut pag tawu magpalagiw una unman may maglagas sa kanya, dapat ti matadlung pag tawu maisug parihu sa liyun.

² Nu ti usa ka nasyun makasalanan, pirmi pag-ilisan kanda takinan. Dapat pumarargu marig-un ti usa ka nasyun nu kay takinan madunung.

³ Ti pugri pag tawu mag-api sa kay kaparihu pugri parihu sa mabaskug pag uran magwayung sa manga halaman.

⁴ Ti manga unman magtupad sa Kasuguan magdayaw sa manga daut, dapat ti manga magtupad, maglaban sa manga daut.

⁵ Ti daut pag manga tawu unman makaintindi sa katadlungan, dapat ti manga magdangup sa Panginuun nakaintindi gid inda mayad.

⁶ Mayad waya ti pugri magpangabuhi unman may ikasabi kaysa mayaman balaw mayad kay magpangabuhi.

⁷ Ti madunung pag anak magsunud sa Kasuguan, dapat ti anak mag-upud sa manga balaw mayad kay ugali magpakay-a sa kay gurang.

⁸ Nu magyaman kawu sa panab-anan pagpatubu kuwarta, kanmu kayamanan miatag sa tawu maraawat sa pugri.

⁹ Una si unu ti unman tumupad sa Kasuguan, pagkadat-an Diyus una kay darangin.

¹⁰ Ti tawu maggayak pumatalang sa matadlung pag tawu masduk sa kay sadili pag gayak. Dapat ti tawu magpangabuhi unman may ikasabi makatanggap kaayadan.

¹¹ Mag-isip ti manga mayaman madunung yi gid sida, dapat ti pugri pag tawu may pan-intindi alam nu unu gid siya pag kalasi tawu.

¹² Nu manga matadlung ti pumanguna, magbarayaan ti manga tawu, dapat nu manga daut ti pumanguna, magpatagu sida.

¹³ Unman gid kawu umunlad nu balaw nimu isabi kanmu manga kasalanan, dapat nu itultul nimu inda ag dayuun, kaawaan kawu Diyus.

¹⁴ Mapalad ti tawu pirmi maggalang sa Panginuun, dapat ti tawu maganit kay tagipusuun midamhak.

¹⁵ Ti daut pag tawu magpanguna sa manga pugri bilang wadi mag-ngurub liyun ngatay usu maghanap kay turukbun.

¹⁶ Subra maisug ti manugpanguna unman may pan-intindi. Ti manugpanguna balaw magkaibug yumaman sa daut pag paraan lumawig kay buhi.

¹⁷ Ti tawu pag-usigun niya pangahawag dahil sa kay pagmatay sa usa ka tawu malagiw una naan tabug tugka sa mamatay. Danga niyu siya pag-awati.

¹⁸ Ti tawu magpangabuhi unman may ikasabi balaw maunu, dapat ti tawu balaw hustu kay pagbuwatun midamhak rargu.

¹⁹ Ti masipag pag manugtanman may abunda pag karan-unun, dapat ti mag-uyang kay udas sa unman may pulus pag manga buruwatun kumuri kay kahamtangan.

²⁰ Papaladan gid Diyus ti masarigan pag tawu, dapat ti tawu magmadali yumaman parusahan.

²¹ Balaw mayad nu may pagkilingan kawu. Dapat may manga tawu magbuwat inda dahil magkadara sida sa suhul, una diit lang inda.

²² Ti tawu maraibgun sa kuwarta magdali yumaman, dapat unman niya alam kumuri ngap maaw siya.

²³ Pasalamatan waya kawu tawu aban sa uryan nu tamyawun nimu siya kaysa dayaw-dayawun nimu siya.

²⁴ Ti tawu magpanakaw sa kay gurang ag magsabi balaw inda kasalanan, kaibahan siya manga manmamatay tawu.

²⁵ Ti makasadili pag tawu makapaumpisa lang sa kaguluhan, dapat ti tawu magsarig sa Panginuun umunlad.

²⁶ Unman may intindi ti tawu magsarig lang sa kay sadili. Ti tawu magpangabuhi may kadunungan balaw maunu.

²⁷ Ti tawu marapakaun sa manga pugri balaw gid kurangun, dapat ti unman mag-awat sa manga pugri makatanggap mayamu pag manga saad.

²⁸ Magpatagu ti manga tawu nu ti manga daut pag tawu ti magpanguna. Dapat nu midamhak sida, ti manga matadlung maan ti pumanguna.