Kabagawan 27 - Hanunuu

¹ Danga kawu magpadayaw tungkul sa buwatun nimu aldaw, dahil balaw nimu alam nu hintay ti mangyari sa kanmu aldaw.

² Danga pagdayawa kanmu sadili; pabay-ani iba ti dumayaw sa kanmu.

³ Mabuyat ti batu hanggan ti baras, dapat mas mabuyat nu galitun kawu kurang kay intindi pag tawu.

⁴ Madala ti tawu magkagalit, dapat lalu waya madala ti tawu mag-imun.

⁵ Mayad waya tamyawun nimu parangkahan ti usa ka tawu kaysa pagmahalun nimu dapat pagpabay-anan diman.

⁶ Ti masakit pag tamyaw usa ka kakilala may mayad pag pakinabang, dapat ti aruk kalaban balaw masarigan.

⁷ Nu busug yi ti usa ka tawu, una ti daykut ga udyi may gana para sa kanya; dapat nu magkalun-us siya, una ti mapait pag karan-unun matagsing para sa kanya.

⁸ Ti tawu naglayas sa kay balay parihu sa manuk naglayas sa kay pugad.

⁹ Nu kabitay ti pamanglu ag ti kamangyan makapasulung sa tawu, ti tapat pag payu usa ka kakilala makapasulung diman.

¹⁰ Danga pagkalimti kanmu kakilala, ngatay ti kakilala nimu ama. Ag nu sa kakurian kawu, balaw yi kawu manhagad awat sa kanmu patar-ari ati sa arayu. Ti arani pag kamalay mas mayad waya kaysa arayu pag patar-ari.

¹¹ Anak, pagpakidunung kawu hampay makabaya diman aku, ag hampay may isagut aku sa magpakay-a sa kangku.

¹² Ti madunung pag tawu mag-aman nu masulang niya ti kadamhakan, dapat unman mag-aman ti tawu balaw madunung, nakan mag-idamhak siya.

¹³ Nu mantaratu ti usa ka tawu siya ti manbayad sa kanmu utang sa tawu balaw niya kilala, siguraduha makabuul kawu sa kanya garantiya, una rutay niya, hampay masiguru nimu manbayad siya.

¹⁴ Nu paringgit kanmu magbati sa surip sa kanmu kamalay, isipun niya saad tunda.

¹⁵ Ti asawa pirmi mag-away sa kay asawa lalaki masamuk parihu sa magtiktik atup nu tig-ururan.

¹⁶ Balaw nimu siya mapatahimik, parihu sa durus balaw nimu maampara ngatay sa lana balaw nimu matawidan.

¹⁷ Nu kabitay pagpatarumun baul kay kaparihu baul, ti tawu katunda diman magdunung sa kay kaparihu.

¹⁸ Nu alagaan nimu ti puun igus, makakaun kawu kay burak. Katunda diman nu alagaan nimu kanmu amu, parangalan kawu niya.

¹⁹ Nu kabitay makitan kanmu uyahun sa danum, makitan diman nimu kanmu pagkatawu sa kanmu tagipusuun.

²⁰ Balaw magkasawaan ti kamatayan; katunda diman ti paghangadun tawu.

²¹ Nu kabitay ti gintu ag ti pilak pagsubukun nu lunsay ngatay unman sa panab-anan apuy, kanta buhi pagsubukun sa panab-anan pagdayaw iba pag tawu sa kanta.

²² Una waya bayuhun nimu ga paray ti unman may intindi pag tawu, balaw gid nimu mab-ul kay pagkabuang-buang.

²³ Bantayi ag alagai kaayad kanmu hayup,

²⁴ dahil ti kayamanan ag ti kapangyarihan unman magdugay.

²⁵ Pamulda ti manga ilamnun; ag habang magtubu maan inda, tabtaba diman ti manga ilamnun sa manga bantud, hampay may karan-unun pirmi kanmu hayup.

²⁶ Makabuwat kawu manga rutay ginan sa bulbul manga karanidu, ag mahimu nimu ipabili ti iba nimu ka manga kambing hampay makabili kawu daga.

²⁷ Makabuul diman kawu mayamu pag manga gatas ginan sa kanmu manga kambing para sa kanmu magtal-anakan hanggan sa kanmu manga suruguun babayi.