Kabagawan 26 - Hanunuu

¹ Nu kabitay balaw mahimu umuran yilu nu turungun ngatay pirmi umuran nu tig-arani, unman diman mahimu dayawun ti luku-luku pag tawu.

² Ti saad unman dumlut sa kanmu nu unman kawu may kasalanan. Parihu inda sa manuk malayangan lang balaw mag-apun.

³ Kailangan laptikun ti kabayu ag busalan ti asnu. Katunda diman ti kurang kay intindi, kailangan parusahan siya hampay sumunud.

⁴ Danga pagsaguta ti kurang kay intindi pag tawu nu maghampang siya hangal-hangal sa kanmu, dahil barang bumaliw diman kawu ga kanya.

⁵ Dapat nu kas-a mayad diman nu sagutun nimu siya, hampay maalaman niya balaw maaw siya madunung parihu sa kay pag-isipun.

⁶ Nu pag-ipadara nimu kanmu tultulanun sa unman may intindi pag tawu, parihu lang ga pagpuldun nimu kanmu lulud; maghanap lang kawu kadamhakan.

⁷ Nu kabitay ti pilay pag lulud unman may pakinabang, katida diman ti kabagawan tawu unman may intindi.

⁸ Kabuangan nu ihigut nimu sa lastiku kanmu pamala batu; katunda diman nu dayawun nimu ti luku-luku pag tawu.

⁹ Ti kabagawan pagbagawun unman may intindi pag tawu makapadamhak parihu sa madugi pag kayu paghiyaptan langu.

¹⁰ Salan nu panaun nimu ti una lang si unu; katunda diman nu ipatarabahu nimu ti lumawawuy una si unu pag unman may intindi.

¹¹ Nu kabitay pagbalikan idu kay suka, pag-ulitun diman unman may intindi pag tawu kay pagkakurang-kurang.

¹² Mas mayad waya ti patabgan kurang kay intindi pag tawu kaysa tawu mag-isip sa kay sadili madunung siya.

¹³ Ti bugyahin pag tawu unman magluwas sa kay balay dahil barang may liyun sa luwas.

¹⁴ Ti bugyahin pag tawu palisud-lisud lang sa kay parahuwayan parihu sa sabian palisud-lisud sa bisagra.

¹⁵ May manga tawu masyadu bugyahin una di mangaun magbugya.

¹⁶ Mag-isip ti bugyahin pag tawu mas madunung waya siya kaysa pitu ka tawu makapakaun hustu pag katuwiran.

¹⁷ Mahawag nu magpasalbug kawu sa arawayan iba; parihu lang sa nandakup kawu idu sa tuli.

^18-19 Ti tawu magdaya sa kay kaparihu, ag rargu niya sabihun surug-surug lang niya ati, parihu siya sa kurang-kurang pag tawu magpamana maglabdab pag ugyung makamatay.

²⁰ Magkapsa ti apuy nu tabu yi ti kayu, katunda diman mag-apas ti arawayan nu unman may paralibak.

²¹ Nu kabitay ti uring makapabaga, ag ti kayu makapalabdab sa apuy, katunda diman ti paraaway makaumpisa sa gulu.

²² Ti libak parihu sa karan-unun masarap taltaun ag tulnun.

²³ Nu pag-itagu nimu ti daut pag kaisipan sa panab-anan mahusay pag pamagaw, parihu kawu sa anglit pinayidan pilak.

²⁴ Ti kalaban marinu magbagaw, dapat maaw mag-isip siya mandaya.

²⁵ Una marinu siya nu magbagaw, danga kawu magpaniwala sa kanya, dahil daut gid subra kay manga pag-isipun.

²⁶ Mahimu magpabalhinguun siya hampay mitagu niya kay pangagalit, dapat makitan diman tanan kay daut pag manga buwat.

²⁷ Ti magkutkut ukang hampay malagpak ti iba, siya ngap ti malagpak. Ti maglilid batu hampay malilidan ti iba, siya ngap ti malilidan.

²⁸ Ti pudilun magkagalit sa kay pinudilan, ag ti tawu hangal-hangal makapadamhak sa kanmu.