Kabagawan 25 - Hanunuu

Ti Iba waya pag manga Kabagawan ni Sulumun

¹ Inda waya gid ti iba pag manga kabagawan ni Sulumun kinupya manga tawuhan ni Hari Isikyas taga Huda:

² Pagparangalan nita ti Diyus dahil sa manga bagay balaw niya ibinarita sa kanta; dapat pagparangalan nita ti manga hari dahil sa manga bagay pag-ipahayag nida sa kanta.

³ Nu kabitay balaw masukat ti kaabwatun langit ag ti kaabasadan daga, unman diman maalaman ti pag-isipun manga hari.

⁴ Kailangan bul-un dapu ti manga huput sa pilak bag-u di hulmahun manugpanday.

⁵ Kailangan paighitun ti manga daut pag manga nasakupan hari hampay pumarargu matadlung kay kaharian.

⁶ Nu sa atubangan hari kawu, danga magpadayaw kanmu sadili ga si unu yi gid kawu sa panab-anan pagtukaw kaibahan sa galalangun pag manga tawu.

⁷ Mayad nu ti hari ti magsabi pagtukaw kawu siyun kaysa sabihan kawu niya danga siyun, ag mangay-a kawu sa atubangan paggalangun pag manga tawu.

⁸ Danga kawu kadaka magtultul sa hurusayan kanmu nakitan. Dahil nu mapatutuuhanan usa ka kastigus salan kawu, hintay wadi kanmu buwatun?

⁹ Nu may aratwan kamu sa kanmu kaparihu, ayusa lang niyu duwa, dapat danga pagtultulan sa iba ti lihim niyu kada usa.

¹⁰ Dahil nu maalaman inda iba, barang pakay-ahun nida kamu, ag kanyu pagkatawu madaut tugka aban.

¹¹ Nu kanmu pagbagawun mag-angay sa panahun, marinu inda parihu sa gintu pag manga mansanas mapaulian sa pilak pag sukadan.

¹² Ti pagtamyaw madunung pag tawu sa usa ka tawu magkaibug magpatingi mas mahalaga waya kaysa manga unu gintu.

¹³ Ti masarigan pag manugtultul makapakaun kabayaan sa kay pagsirbihan, parihu sa maramig pag danum nu turungun.

¹⁴ Ti tawu unman magtupad sa kay taratu parihu sa rurum ag durus unman magdara uran.

¹⁵ Ti marapasunaid ag ti maalumanay magbagaw makapabaya sa manga takinan ag una sa manga maganit kay tagipusuun.

¹⁶ Danga kawu subra magkaun daykut barang mansuka kawu.

¹⁷ Katunda diman nu pirmi kawu magsabang sa kanmu kamalay, barang mangisug siya ag bugyahan kawu niya.

¹⁸ Ti tawu magkastigus kapudilan laban sa kay kaparihu makapadamhak parihu sa baladaw, sa pamakul, ag sa pamana.

¹⁹ Ti magsarig sa tawu balaw masarigan sa udas kakurian unman may pulus parihu sa daut ngipun ngatay sa pilay pag lulud.

²⁰ Nu pagkantahan nimu pamasulung ti tawu sa masyadu pag kakurian, parihu lang ga pag-ubahan nimu siya rutay sa udas tigraramig ngatay pagpaulian nimu langgaw kay biyag.

²¹ Nu kanmu kalaban magkalun-us, pakauna; nu magkauwaw, painma.

²² Dahil nu buwatun nimu inda mangay-a siya sa kay pagbuwatun sa kanmu, ag papaladan kawu Panginuun.

²³ Nu kabitay ti abagatnan magdara uran, ti maralibak magdara kaguluhan.

²⁴ Mayad waya mangulian sa bubung balay kaysa mangulian sa sulud balay kaibahan ti asawa paraaway.

²⁵ Ti mayad pag barita ginan sa arayu pag rugar parihu sa maramig pag danum makaparaw sa tawu magkauwaw.

²⁶ Ti matadlung pag tawu nu magpaangay sa daut pag tawu parihu sa malubug pag bulbugan ngatay mauring pag bubun.

²⁷ Balaw mayad ti subra magkaun sa daykut, katunda diman ti maghingbut dayawun lang kawu pirmi manga tawu.

²⁸ Ti tawu balaw makapigil sa kay sadili madali midamhak parihu sa usa ka banwa unman may alad batu.