Kabagawan 24 - Hanunuu

-19-

¹ Danga kawu maghirak sa manga daut pag tawu ngatay maghingbut makaupud sa kanda,

² dahil kanda pag-isipun ag pagbagawun ikadamhak lang iba.

-20-

^3-4 Sa panab-anan kaalaman, maipatindug ag mapaunlad nimu kanmu ulian. Sa panab-anan kadunungan, mapunu diman nimu inda mahalaga pag kayamanan.

-21-

⁵ Daka gid ti miawat madunung pag tawu hampay bumaskug ti manga manuggira,

⁶ dahil kailangan kanda manga patigayun sa paglaban. Pihu gid manalu nu mayamu ti magpatigayun.

-22-

⁷ Ti kadunungan balaw kurang kay intindi. Unman siya may magkasabi nu makabuluhan yi pag bagay ti paghampangan.

-23-

⁸ Ti pirmi maggayak daut pag tawu kilalan-un manugbuwat kadautan.

⁹ Kasalanan ti una hintay pag buwat kurang kay intindi pag tawu, ag pagkadat-an manga tawu ti maralibak.

-24-

¹⁰ Nu naduraan kawu pagsarig sa udas kakurian, ibug sabihun malumuy kawu.

-25-

¹¹ Danga kawu magpabaya sa pagribri sa manga tawu unman may kasalanan pag sintinsiyahan kamatayan.

¹² Mahimu sumabi kawu unman may alam sa nangyari, dapat alam di Diyus nu magsabi kawu kay tutuu ngatay unman, dahil pagbantayan niya kawu ag alam niya ti asan sa kanmu tagipusuun. Balusan niya kawu angay sa kanmu binwat.

-26-

^13-14 Anak, nu kabitay ti daykut kay katagsing ag kaayad para sa kanmu, katunda diman ti kadunungan. Dahil nu madunung kawu, may mayad kawu pag aratubangun ag balaw mibuyu kanmu manga paghangadun.

-27-

¹⁵ Danga kawu maghuwad sa daut pag tawu, magsalakay lihim sa ulian matadlung pag tawu.

¹⁶ Dahil una waya magpu pitu ka bisis ti matadlung pag tawu, makabangun di maan siya. Dapat nu ti daut pag tawu ti midamhak, udyi siya makabangun waya.

-28-

¹⁷ Danga kawu magbaya nu midamhak kanmu kalaban.

¹⁸ Makitan Panginuun nu magbaya kawu, balaw niya inda pagkaibgan; ag balaw yi lang niya parusahan kanmu kalaban.

-29-

¹⁹ Danga kawu magkasamuk ngatay maghirak sa daut pag manga tawu,

²⁰ dahil unman sida may marinu patabgan ag bumaliw sida parihu sa sulu napsa.

-30-

²¹ Anak, galanga ti Panginuun ag ti hari. Danga kawu mag-upud sa manga tawu maglaban sa kanda,

²² dahil balaw nimu alam nu unu pag kadamhakan ti rargu buwatun Panginuun ngatay hari sa kanda.

Dugang waya pag manga Kabagawan

²³ Inda waya gid ti iba ka manga kabagawan madunung pag tawu: Balaw mayad ti may pagpiliun sa pagpihu sa katadlungan.

²⁴ Nu palpasan nimu ti may kasalanan, saadan kawu ag kagalitan manga tawu.

²⁵ Dapat nu parusahan nimu ti may kasalanan, bayaun kawu manga tawu ag papaladan waya kawu.

²⁶ Ti insaktu pag sagut tanda tutuu pag magkakilala.

²⁷ Alistuhan dap kanmu karabuhian, parihu sa kanmu tanman, bag-u di kawu pagpatindug kanmu balay.

²⁸ Danga kawu magkastigus sa kanmu kaparihu sa unman may kadahilanan, ngatay magbagaw kapudilan laban sa kanya.

²⁹ Danga kawu magsabi, “Balusan niku siya sa kay binwat sa kangku. Buwatun diman niku sa kanya kay binwat sa kangku.”

³⁰ Linmawuy aku sa tanman usa ka bugyahin pag tawu unman may intindi.

³¹ Punu yi inda manga ilamnun ag dugihin pag manga kayu, bag-u daut yi kay alad.

³² Pagka nakitan niku inda nag-isip aku mayad, ag nab-ul niku inda pag adal:

³³ Paturug-turug ag papikit-pikit waya kawu ngalay, kawu pag bugyahin,

³⁴ ag rumas-ug rargu sa kanmu ti kakurian parihu sa armadu tulisan.