Kabagawan 23 - Hanunuu

-6-

¹ Nu mangaun kawu kaibahan ti usa ka takinan, pagdahan kawu sa kanmu kimut.

² Nu mayamu kawu magkaun, pigili kanmu sadili.

³ Danga pagkaibgi ti masarap pag karan-unun inalistu niya, dahil barang pagsubukan lang niya kanmu ugali.

-7-

⁴ Danga pagpakuriani kanmu sadili sa subra pag panhingbut yumaman. Bagkus ngap, pigili kanmu sadili ag isip-isipa nu hintay ti mayad.

⁵ Ti kuwarta madura sa usa lang ka pidpiraw, ga may pakpak ag maglayang tag sa arayu parihu sa agila.

-8-

⁶ Danga kawu magkaun ngatay magkaibug sa karan-unun inalistu mairang pag tawu, una masarap waya inda.

⁷ Dahil ti katunda pag tawu magbantay nu kabitay kayamu kanmu kaun. Sumabi siya, “Sigi, kaun waya.” Dapat balaw maaw pasunaid kay pagbagawun.

⁸ Nakan isuka nimu kanmu kinaun ag bumaliw unman may pulus kanmu manga pagdayaw sa kanya.

-9-

⁹ Danga kawu maghampang sa manga kurang kay intindi pag tawu, una waya may kadunungan kanmu pagbagawun uman diman inda may pulus para sa kanda.

-10-

¹⁰ Danga nimu pag-agawa ti daga manga balu sa panab-anan paghalin manga muhun.

¹¹ Dahil ti Panginuun imaw kanda makamaskihan pag manug-apin. Siya ti man-apin sa kanda laban sa kanmu.

-11-

¹² Pagpatingi kawu nu pagtadlungun kanmu ugali hampay dumunung kawu.

-12-

^13-14 Danga kawu magpabaya sa pagtamyaw sa kanmu anak. Ti pagbakul balaw niya ikamatay nu unman ikaribri di ngap niya sa kamatayan.

-13-

^15-16 Anak, makabaya gid aku nu dumunung kawu ag magbagaw tutuu.

-14-

¹⁷ Danga kawu maghirak sa manga makasalanan bagkus ngap paggalang kawu sa Panginuun.

¹⁸ Ag pihu gid may mayad kawu patabgan, ag balaw mibuyu kanmu paghingabtun.

-15-

¹⁹ Anak, pagpatingi kawu sa manga pag-itudlu niku sa kanmu. Pagpakidunung kawu ag sunda ti hustu pag dalan.

^20-21 Danga kawu maghuwad sa manga paralangu ag daluk sa karan-unun, dahil ti ga kanda pag kalasi tawu madali kumuri. Pirmi sida magkaturug, nakan aban manrutay wadi sida paris.

-16-

²² Pagpatingi kawu sa kanmu manga gurang dahil nu balaw sa kanda unman kawu natawu sitay sa kalibutan. Danga sida pagkadat-i nu gurangun yi.

²³ Pagsikap kawu makatanggap katutuuhanan, kadunungan, ag mayad pag-ugali hanggan pan-intindi. Ag danga gid nimu inda pagbalyuhan sa una hintay pag bagay.

^24-25 Makabaya gid kanmu gurang nu matadlung ag madunung kawu. Ikabaya gid nida sida kanyu ama ina.

-17-

²⁶ Anak, patingihi aku kaayad ag sunda kang pagpangabuhi.

²⁷ Dahil ti baraydan pag babayi makapadamhak sa kanmu parihu sa abasad pag ukang.

²⁸ Parihu siya sa tulisan mag-alagad kay mablay, ag siya kay dahilan magpaulam mayamu asawa lalaki sa kanda manga asawa babayi.

-18-

²⁹ Si unu pag tawu ti unman may halaga kay buhi, magpan-away, magpanriklamu, magkabiyagan sa halip kay di mana maamanan, ag makararagang kay mata?

³⁰ Siya imaw ti tawu paralangu, mahilig magsamit sa tuhay-tuhay pag irinmun.

³¹ Danga kawu magkadara sa maisug pag irinmun, marinu bantayun sa ungut ag masarap inmun.

³² Dahil nu malangu yi kawu, tumuhay kanmu pakiramdam, ga sa kinagat kawu may dalit pag ulay.

³³ Una wadi unu kanmu makitan, ag balaw kawu makaisip mayad.

³⁴ Kanmu mag-asaydan ga ati kawu sa karaw-an dagat mahuwayan sa babaw palu barku.

³⁵ Sumabi kawu, “May nanhampak ag sinmuntuk sa kangku, dapat unman aku may nasaydan. Kapira waya aku pag mahungpawan hampay makainum maan aku?”