Kabagawan 22 - Hanunuu

¹ Mayad man piliun ti malumpiyu pag ngaran kaysa mayamu pag kayamanan. Ti paggalang manga tawu sa kanmu mas mahalaga waya kaysa pilak ag gintu.

² Ti mayaman ag pugri parihu lang linalang Panginuun.

³ Mag-aman ti madunung pag tawu nu masulang niya ti kadilikaduhan, dapat unman mag-aman ti tawu kurang kay intindi, nakan mag-agwanta siya.

⁴ Ti paggalang sa Panginuun ag ti pagpakumbaba makapakaun sa kanmu kayamanan, kadayawan, ag malawig pag buhi.

⁵ Maglakaw ti manga daut pag tawu sa dalan madugi ag may manga suduk. Pag-aman kawu sa tunda pag dalan nu pagdahanan nimu kanmu buhi.

⁶ Tudlui ti anak sa hustu pag-ugali, ag alalahanun niya inda una gurangun yi siya.

⁷ Ti manga pugri sa sirung kapangyarihan manga mayaman, ag ti manga mag-utang panawuhun manga magpautang.

⁸ Ti magpamgas kadautan umani kadamhakan, ag umapas yi kay magpadamhak sa iba.

⁹ Papaladan Diyus ti manga marapakaun karan-unun sa manga pugri.

¹⁰ Nu palayasun ti manga tawu marapuya, madura yi ti kaguluhan, ti arawayan ag ti araringan.

¹¹ Bumaliw kakilala hari ti tawu malumpiyu kay tagipusuun ag magbagaw maalumanay.

¹² Pagbantayan mayad Panginuun ti manga madunung pag tawu, dapat pagdautun niya ti manga gayak manga pudilun.

¹³ Ti bugyahin pag tawu unman magluwas sa kay balay dahil may liyun kunu sa luwas barang tukbun siya.

¹⁴ Ti pagbagawun daut pag babayi parihu sa abasad pag ukang, ti manga pagkadat-an Panginuun magkalagpak siyun.

¹⁵ Ugali yi manga anak ti maghakut, dapat tumadlung inda pag ugali nu parig-anan sida.

¹⁶ Ti mag-ayaw sa mayaman ngatay mag-api sa pugri hampay yumaman miuli gid sa kapugrihan.

Ti 30 ka Mahalaga pag manga Kabagawan

¹⁷ Inda waya ti manga pagsabihun madunung pag tawu. Patingihi inda kaayad habang pag-itudlu niku inda sa kanmu,

¹⁸ dahil makabaya gid kawu nu maalaman nimu ag masaulu inda.

¹⁹ Pag-itudlu niku inda taynguna sa kanmu hampay sumarig kawu sa Panginuun.

²⁰ Nagsurat aku 30 ka kabagawan makapakaun kadunungan ag paanyu sa kanmu.

²¹ Sa panab-anan inda maalaman nimu nu hintay ti katutuuhanan, ag masagut nimu insaktu ti manga paingana tawu sa kanmu.

-1-

²² Danga nimu pagtakawi ti manga pugri, ag danga sida pag api-apiha sa hurusayan,

²³ dahil ti Panginuun ti manug-apin sa kanda. Una hintay ti buwatun niyu daut sa kanda buwatun diman Panginuun sa kanyu.

-2-

²⁴ Danga kawu mag-upud sa tawu madali magkagalit,

²⁵ dahil barang bumaliw diman kawu ga kanya, ag masduk kawu sa inda pag ugali.

-3-

²⁶ Danga kawu magtaratu manbayad utang iba,

²⁷ dahil nu unman kawu makabayad, bul-un nida una kanmu paraigyaan.

-4-

²⁸ Danga nimu pag-ighita ti muhun ipinauli nimu manga ginurang kaybi.

-5-

²⁹ Ti tawu mayad magtarabahu sumirbi sa hari ag balaw sa kay kaparihu lang tawu.