Kabagawan 20 - Hanunuu

¹ Ti mag-inum makalangu makapasamuk sa tawu ag kurang sa intindi.

² Nu magkaisug ti hari parihu siya sa mag-ngurub liyun. Nakan nu galitun nimu siya, matyun gid niya kawu.

³ Ikadayaw tawu nu mag-aman sa kaguluhan; ti kurang kay intindi lang ti magkaibug sa gulu.

⁴ Ti bugyahin mag-aradu sa udas tig-taranum unman gid may maani sa udas tig-arani.

⁵ Mahimu ti kaisipan tawu parihu sa abasad pag danum, dapat magkasalman inda madunung pag tawu.

⁶ Mayamu ti magsabi tapat sida, dapat masarigan aw nguna sida?

⁷ Ti matadlung pag tawu magpangabuhi unman may ikasabi. Mapalad kay manga anak magsunud sa kanya.

⁸ Nu magsintinsiya ti hari, pagpihuun gid niya nu si unu ti nakabwat kadautan.

⁹ Unman may makasabi malinis yi gid kay tagipusuun, unman yi gid siya may kasalanan.

¹⁰ Pagkadat-an Panginuun ti manga magdaya sa pagkilu ngatay sa pagtakal.

¹¹ Ti buwat usa ka kalay-awan magpatunay sa kay ugali, nu ngatay siya matadlung ngatay unman.

¹² Pinakan-an kita Panginuun mata hampay kumakit hanggan tuli hampay mamatingi.

¹³ Nu sigi lang kawu sa turug, lun-usun kawu, dapat nu mamangun kawu ag manarabahu, manyamu kanmu karan-unun.

¹⁴ Pagpuyaan manugbili kay pagbilihun hampay makatawad siya. Dapat nu mabili yi niya, balaw yi niya pagpuyaun, nu unman pag-ipadayaw waya ngani niya.

¹⁵ Mayamu ti gintu ag ti mahalaga pag manga batu, dapat pira-pira lang pag manga tawu ti magbagaw may kadunungan.

¹⁶ Nu may tawu nagtaratu bayadan niya sa kanmu ti utang usa ka tawu balaw niya kilala, siguraduha makab-ul kawu garantiya sa kanya, hampay makapihu kawu bayadan niya.

¹⁷ Magkasarapan magkaun ti tawu sa karan-un nab-ul niya sa daya, dapat sa uryan bumaliw inda parihu sa baras sa kay bibig.

¹⁸ Paghagad kawu patigayun sa kanmu gayak ngatay bag-u kawu manlaban sa girahan.

¹⁹ Ti mabagaw magpanultul lihim, nakan pag-aman sa katunda pag tawu.

²⁰ Mamatay una si unu ti magsumpa sa kay gurang, parihu siya sa sulu mapsa sa karaw-an kadudulman.

²¹ Balaw yi papalad ti mana nu bin-ul nimu maaga.

²² Danga kawu magbalus. Pagsarig kawu sa Panginuun, ag awatan niya kawu.

²³ Pagkadat-an Panginuun ti manga magdaya sa pagkilu. Balaw inda mayad pag buruwatun.

²⁴ Ti Panginuun imaw ti nag-ayaw kanta buhi, nakan balaw nita alam nu hintay kanta patabgan.

²⁵ Nu manaratu kawu sa Diyus isipa dapu kaayad, hampay balaw manisi sa uryan.

²⁶ Nu magsintinsiya ti madunung pag hari, pagpihuun gid niya maalaman nu si unu ti nagbuwat kadautan, ag rargu niya pagparusahan.

²⁷ Ipinakaun Panginuun sa kanta ti kunsinsiya hanggan ti kaisipan hampay mausisa nita kanda pagkatawu.

²⁸ Ti mayad ag tapat pag hari balaw midamhak, pumarargu di siya sa kay maghari.

²⁹ Kadayawan manga kalay-awan kanda kabisugan, ag kadayawan manga gurangun kanda pagkagurangun.

³⁰ Nu kas-a mayad parusahan kita hampay bumag-u kanta nalub-anan.