Kabagawan 2 - Hanunuu

Ti Kahalagahan Kadunungan

¹ Anak, tanggapa ag dahani sa kanmu tagipusuun kang manga pag-itudlu hanggan pag-isugu sa kanmu.

² Patingihi nimu nu hintay ti makapakaun kadunungan hanggan pan-intindi sa kanmu.

³ Hingabta gid magkaimaw kawu pan-intindi,

⁴ parihu ga maghanap kawu pilak ngatay itinagu pag kayamanan.

⁵ Nu buwatun nimu inda, maalaman nimu nu kabitay ti maggalang sa Panginuun, ag masalman nimu ti tungkul sa kanya.

⁶ Dahil ti Panginuun imaw ti magpakaun kadunungan. Sa kanya diman ginan ti kaalaman hanggan pan-intindi.

^7-8 Pag-alagaan niya ti magkabuhi matadlung hanggan matinupadun. Pagpakan-an diman niya sida kapanaluhan.

⁹ Nu mamatingi kawu sa kangku, maalaman nimu nu hintay ti mayad buwatun: ti tama, ti matadlung, hanggan ti maangay.

¹⁰ Nakan lalu di dumunung kawu, ag makapakaun inda kasulungan sa kanmu.

¹¹ Nu makaintindi kawu ag madunung magpasya sa hustu, makadahan inda sa kanmu.

¹² Ipakarayu kawu kadunungan sa daut pag ugali hanggan sa manga tawu magbagaw daut.

¹³ Tunda pag manga tawu nagbugya sa mayad pag ugali ag nagsunud sa ugali kadudulman.

¹⁴ Magbaya sida sa pagbuwat daut. Magkabayaan sida sa kanda daut pagbuwatun.

¹⁵ Balaw mayad kanda pag-ugaliun; balaw matadlung kanda paglakawan.

¹⁶ Ti kadunungan makapakarayu diman sa kanmu sa daut pag babayi maggarya sa panab-anan niya marinu pag manga baragawun.

¹⁷ Tunda pag babayi nagtayak sa inasawa niya pag lalaki katpung kalay-awan; kinalimtan niya kay taratu sa Diyus katpung ipinaasawa siya.

¹⁸ Sa tutuu, nu umatag kawu sa kay balay ga atabug diman kawu sa kamatayan. Dahil tunda ti dalan atabug sa rugar manga namatay.

¹⁹ Una si unu ti umatag sa kanya unman yi umuli; malimtan yi niya ti dalan sa rugar manga buhi.

²⁰ Nakan huwada ti pagpangabuhi mayad pag manga tawu; pagkabuhi kawu matadlung.

²¹ Dahil ti tawu magkabuhi sa hustu ag unman may ikasabi parargu mangulian sitay sa kalibutan.

²² Dapat ti manga daut pag tawu ag maradaya palayasun. Pangayitun sida parihu sa manga ilamnun.