Kabagawan 19 - Hanunuu

¹ Mayad waya ti pugri magpangabuhi matadlung kaysa kurang kay intindi pag tawu marapudil.

² Una waya kawu masigasid nu unman may alam, unman diman tunda may kabuluhan. Nu daldaliun waydi kawu madali magsalan.

³ May manga tawu pag-ipadamhak nida kanda sadili dahil unman may intindi, bag-u ti Panginuun waya kanda pagsisihun.

⁴ Ti mayaman mayamu kay kakilala, dapat ti pugri pagpabay-anan niya kakilala.

⁵ Ti pudilun pag kastigus parusahan, ag una si unu pag pudilun balaw makaribri sa parusa.

⁶ Mayamu ti magpakarani sa manga tawu kilala hampay mayadun sida, ag ti kada usa maki-upud sa manga maraayaw pag kakilala.

⁷ Nu pugri kawu, unman kawu pagpansinun nimu katawuhan, lalu waya gid hanggan kanmu manga kakilala. Nu pagkailanganun nimu sida, unman nimu makitan sida.

⁸ Magmahal sa kay sadili ti tawu maghingbut dumunung, ag ti magpahalga sa pan-intindi umabunda.

⁹ Ti pudilun pag kastigus parusahan, ag una si unu ti mamudil midamhak.

¹⁰ Balaw angay sa kurang kay intindi pag tawu ti mangabuhi mayaman, ag lalu yi gid balaw angay sa suruguun ti mandumara sa manga takinan.

¹¹ Nu marapasunaid kawu, magpakakit lang madunung kawu. Ag nu magpatawad kawu sa nagkasala sa kanmu, makapakaun inda kadayawan sa kanmu.

¹² Ti pangagalit hari parihu sa ngurub liyun, dapat kay kaayadan parihu sa tun-ug magpakaun danum sa manga halaman.

¹³ Ti kurang kay intindi pag anak magdara kadamhakan sa kay ama. Ag ti asawa pirmi lang mag-isug sa kay asawa masamuk parihu sa magtiktik bubung.

¹⁴ Mana sa gurang ti balay hanggan ti iba pag manga bagay, dapat Panginuun lang ti makapakaun matinudukun pag asawa babayi.

¹⁵ Nu bugyahin kawu ag pirmi lang turug, lun-usun gid kawu.

¹⁶ Ti magsunud sa sugu Diyus parargu mangabuhi, dapat ti balaw magsunud mamatay.

¹⁷ Nu mag-awat kawu sa pugri, parihu lang sa nagpaudam kawu sa Panginuun, dahil Panginuun ti bumayad sa kanmu.

¹⁸ Tadlungan kanmu manga anak habang may panahun waya. Nu unman nimu sida pag-itadlung, pag-ipadamhak nimu kanda buhi.

¹⁹ Pabay-ani managut sa kay pagbuwatun ti tawu madali magalit, dahil nu awatan nimu siya, ulitun maan niya inda.

²⁰ Patingihi ti manga patigayun sa kanmu ag tanggapa ti manga pagtadlung sa kanmu ugali hampay sa uryan dumunung kawu.

²¹ Mayamu kanta gayak, dapat ti kagustuhan Panginuun di ti masunud.

²² Ti pagkaibgan nita sa tawu, makatiwalaan. Mas mayad waya ti pugri pag tawu kaysa pudilun.

²³ Ti maggalang sa Panginuun makapakaun malawig pag buhi ag kasulungan hanggan karibrihan sa kadautan.

²⁴ May manga tawu masyadu gid bugyahin una di mangaun magbugya waya.

²⁵ Kailangan parusahan ti manga magpuya hampay kanda kaparihu unman may alam dumunung. Ti madunung pag tawu magdunung waya gid nu pagsungyawun.

²⁶ Makakaray-a ti anak magpuya sa kay ama ag magpalayas sa kay ina.

²⁷ Anak, nu unman kawu manpatingi sa manga pagtadlung sa kanmu ugali, pagdayuun nimu ti manga tudlu makapakaun kadunungan.

²⁸ Ti pudilun pag kastigus magdaut sa katadlungan, ag ti daut pag tawu magbaya gid magbuwat kadautan.

²⁹ Pihu gid parusahan ti manga unman may intindi pag tawu magpuya.