Kabagawan 18 - Hanunuu

¹ Ti tawu makasadili magpablag sa kayamuan ag magsalumpang sa tanan mayad pag kaisipan.

² Ti kurang kay intindi pag tawu unman gid may gustu dumunung; kay lang gustu imaw ti pagtultul kay sadili naisipan.

³ Ti pagbuwat kadautan ag makakaray-a pag manga bagay makapakaun kakay-ahan.

⁴ Ti bagaw madunung pag tawu makapakaun kadunungan sa iba; parihu inda sa magbulus danum ginan sa abasad pag bulbugan.

⁵ Balaw mayad tigkampi sa nagkasala ag ti unman pag-ayaw katadlungan sa unman may kasalanan.

⁶ Ti manga pagbagawun unman may intindi pag tawu makapaumpisa arawayan ag makapakaun kakurian sa kay sadili.

⁷ Ti bagaw luku-luku pag tawu imaw diman ti makadaut sa kay sadili.

⁸ Ti libak parihu sa karan-unun masarap taltaun ag tulnun.

⁹ Ti bugyahin pag tawu parihu sa tawu marapuya.

¹⁰ Ti Panginuun parihu sa marig-un pag bantayaw, darangpan manga matadlung sa udas kakurian.

¹¹ Ti isip mayaman kay kayamanan imaw makadipinsa sa kay sadili parihu sa abwat pag alad batu masangputan sa banwa.

¹² Ti pagpadayaw-dayaw makapadamhak, dapat ti pagpakumbaba makaparangal.

¹³ Unman may alam ag makakaray-a ti tawu magsagut unman dap magpatingi.

¹⁴ Sa tawu may mag-asaydan tatag naisipan lang ti makapabisug, dapat nu maduraan siya pag-asa unman yi may miawat sa kanya.

¹⁵ Ti tawu madunung ag may intindi maghingbut waya umamat kay kadunungan.

¹⁶ Madali kawu makapakarani sa makapangyarihan pag tawu nu may dara kawu pamakaun sa kanya.

¹⁷ Ti un-an nanultul sa husgadu bilang ga imaw ti tutuu, tugka sa kalaban maan ti man-usisa sa kanya.

¹⁸ Ti lunggungan makaampara sa aratwan ag makaayus sa kasaba duwa ka makapangyarihan pag tawu.

¹⁹ Makurian kawu manhagad patawad sa kanmu patar-ari nadaut kay buut sa kanmu. Ga makuri waya inda buwatun kaysa mansalakay sa nasangputan alad batu pag banwa. Nu kabitay kakuri dautun ti kandadu talakup sabian balay hari, katunda diman kakuri amparahun ti aratwan duwa ka tawu.

²⁰ Anihun nimu ti burak nimu manga pagbagawun.

²¹ Ti bagaw tawu makaribri sa buhi ngatay ngap makamatay. Nakan nu parabagaw kawu, pagdahan kawu dahil anihun nimu ti burak nimu manga pagbagawun.

²² Nu nakaasawa kawu, nakatanggap kawu mayad pag bagay, ag magpakakit inda mayad ti Panginuun sa kanmu.

²³ Magpaawa-awa ti pugri, dapat marasakit ti sagut mayaman.

²⁴ May magkakilala unman magdugay, dapat may magkakilala diman mas higit waya kaysa magtar-arian.