Kabagawan 17 - Hanunuu

¹ Mayad waya mangaun pira-pira pagkaran-unun may kahusayan kaysa mayamu pagkaran-unun may kaguluhan.

² Ti madunung pag suruguun mandumara sa makakaray-a pag anak niya amu, ag pakan-an siya maranahun kaibahan sa iba waya pag manga anak niya amu.

³ Pagsubukan Panginuun kanta tagipusuun parihu sa gintu ag pilak pag-ipalakaw sa apuy nu ungud lunsay ngatay unman.

⁴ Ti daut pag tawu magkaibug magpatingi sa kay kaparihu niya daut, ag ti pudilun magkaibug magpatingi sa kay kaparihu niya pudilun.

⁵ Ti magpuya sa manga pugri magpahimudil sa Diyus naglalang sa kanda. Parusahan ti tawu magbaya sa daut nangyari sa iba.

⁶ Kadayawan gurangun kanda manga laki, katunda diman kadayawan manga anak kanda manga gurang.

⁷ Balaw angay sa kurang kay intindi ti makabagaw matadlung, lalu waya balaw angay sa takinan ti magbagaw kapudilan.

⁸ Magpaniwala ti iba ti suhul parihu sa salumangka mahimu makabuwat una hintay.

⁹ Nu patawadun nimu kanmu kakilala nagsalan sa kanmu, pumarargu kanyu magkakilala, dapat nu aring-aringun nimu kay kasalanan, madaut kanyu pagka magkakilala.

¹⁰ Ti madunung pag tawu magdunung sa usa lang ka pagtamyaw, dapat ti kurang kay intindi pag tawu unman gid magdunung una waya pira siya ka bisis hampakun.

¹¹ Ti daut pag tawu magkaibug lang pirmi maghanap kaguluhan, nakan padaran-an siya maunuunu pag tawu imaw ti pumarusa sa kanya.

¹² Mas mayad waya masulang nimu ti usa ka simarun pag hayup inagawan anak kaysa tawu luku-luku magbuwat kadautan.

¹³ Nu daut kawu sa manga mayad sa kanmu, pirmi may daut rumas-ug sa kanmu magtal-anakan.

¹⁴ Ti umpisa arawayan parihu sa buslut tangki danum. Tapali inda sa udwaya magdaka.

¹⁵ Pagkadat-an Panginuun ti tawu magsintinsiya sa unman may kasalanan ngatay magsintinsiya palpasan ti may kasalanan.

¹⁶ Unman may pulus ti paggastus sa pagpaadal sa kurang kay intindi pag tawu dahil balaw waydi niya gustu dumunung.

¹⁷ Ti kakilala magmahal sa kanmu sa tanan pag udas, ag nu may katawuhan hampay makaawat sa kanmu sa udas kakurian.

¹⁸ Unman may intindi ti tawu magtaratu manbayad sa utang iba.

¹⁹ Ti magkaibug kasalanan magkaibug diman kaguluhan, ag ti marapadayaw pag tawu maghanap lang siya kadamhakan.

²⁰ Unman gid umunlad ti tawu liku kay kaisipan, ag ti pudilun pag tawu miuli sa kadamhakan.

²¹ Karukuan ag kabiguan ti magkasaydan gurang sa kay anak luku-luku pag ugali.

²² Nu masulung kawu, ikamayad inda nimu bilug, dapat nu marukuun kawu, makapalumuy inda sa kanmu bilug.

²³ Ti daut pag tawu magtanggap suhul hampay balaw miburayhaw ti katadlungan.

²⁴ Ti tawu may pan-intindi mag-isip pirmi nu kabitay waya gid siya dumunung, dapat ti kurang kay intindi pag tawu balaw alam nu hintay kay buwatun.

²⁵ Magpakaun karukuan ag kabiguan sa kay gurang ti kurang kay intindi pag anak.

²⁶ Balaw mayad parusahan ti unman may kasalanan pag tawu ngatay ti makapangyarihan pag tawu magbuwat katadlungan.

²⁷ Magdahan sa baragawun ti madunung pag tawu ag balaw magkadaldali.

²⁸ Una ti manga kurang kay intindi hantupun madunung ag may pan-intindi nu balaw maingay.