Kabagawan 16 - Hanunuu

¹ Tawu ti maggayak, dapat Panginuun ti magpasya nu matupad tunda pag gayak ngatay unman.

² Kanta hantup kang-ud yi gid ti tanan nita pagbuwatun, dapat ti Panginuun lang ti makapihu nu hintay kanta paghingabtun.

³ Intirgahan sa Panginuun ti tanan nimu pagbuwatun, ag manalu kawu sa tanan nimu gayakun.

⁴ May turunu ti tanan linalang Panginuun, una ti manga daut pag tawu itinagka niya midamhak.

⁵ Pagkadat-an Panginuun ti tanan palabi-labihun, ag pihu gid parusahan sida.

⁶ Nu pagmahalun nita tapat ti Panginuun, patawadun niya kanta manga kasalanan. Nu paggalangun nita siya, makaaman kita sa kadautan.

⁷ Nu pagbayaun Panginuun kanta ugali, una manga kalaban buwatun niya kaibahan nita.

⁸ Mas mayad waya ti diit pag kasiyunan pinangabudlayan hustu kaysa mayamu pag kasiyunan ginan sa daut pag paraan.

⁹ Tawu ti maggayak, dapat ti Panginuun ti magpatupad sa inda pag gayak.

¹⁰ Nu paggiyahan Diyus pag hari ti maghusga, pihu gid tama.

¹¹ Pagbayaun Panginuun ti balaw madaya pag manugnigusyu.

¹² Pagkayagtingan hari ti magbuwat daut, hampay pumarargu kay magpamahala nu matadlung kay pagbuwatun.

¹³ Magbaya ti manga hari sa manga tawu balaw magpudil; pagmahalun nida ti manga tawu magtultul kay tutuu.

¹⁴ Nu mangisug ti hari mahimu may matyun siya, nakan ti madunung pag tawu magsikap gid balaw magalit ti hari.

¹⁵ Nu magbaya ti hari sa usa ka tawu, balaw niya siya matyun; pakakitan niya siya kaayadan parihu sa uran sa udas tigturubu manga tanum.

¹⁶ Mas mayad ti magkaimaw kadunungan hanggan intindi kaysa magkaimaw gintu ag pilak.

¹⁷ Ti tawu magkabuhi sa matadlung magpakarayu sa daut, ag ti magdahan sa kay sadili arayu sa kadamhakan.

¹⁸ Ti pagpadayaw-dayaw tawu makapadamhak sa kanya.

¹⁹ Mayad man ti magkabuhi mapinakumbabaun kaibahan ti manga pugri kaysa manhururayan manga tinakawan pag bagay kaibahan ti manga mayabang.

²⁰ Ti tawu magpatingi nu pagtudluan umalwan. Mapalad ti magsarig sa Panginuun.

²¹ Ti madunung pag tawu pagkilalan-un may intindi, ag nu madunung siya magbagaw mayamu ti maanad sa kanya.

²² Nu kawu may kadunungan, mayad ag ikalawig inda nimu buhi, dapat nu kurang kanmu intindi, parusahan kawu dahil sa kanmu pagkakurang-kurang.

²³ Ti madunung pag tawu magdahan gid sa kay baragawun, nakan magdunung ti iba sa kanya.

²⁴ Ti makawiwili pag manga bagaw parihu sa daykut; makapasulung ag makapabisug inda sa buhi tawu.

²⁵ Kanmu isip sa matadlung kawu pag dalan, dapat sa kay suru maaw inda kamatayan.

²⁶ Ti lun-us magsugu sa tawu hampay tumarabahu.

²⁷ Ti daut pag tawu maggayak kadautan kay manga pagbagawun makapadamhak ga apuy makapali.

²⁸ Ti maralibak pag tawu pagpun-an arawayan ag magdaut sa pagkarausa.

²⁹ Paggaryahun makaransa pag tawu kay kaparihu sa pagbuwat kadautan.

³⁰ Pag-aman kamu sa manga tawu magkayuum-yuum ag magkindat-kindat dahil barang may daut sida gayak.

³¹ Ti pagkagurangun usa ka kabayaan matanggap tawu nangabuhi sa matadlung.

³² Mas mayad ti tawu mapinakumbabaun kaysa tawu makapangyarihan. Mas mayad ti tawu mapinigilun sa kay sadili kaysa tawu magsakup sa usa ka banwa.

³³ Maglunggungan ti manga tawu hampay maalaman nida nu hintay kanda buwatun, dapat ti Panginuun di tinagpasnu.