Kabagawan 14 - Hanunuu

¹ Ti madunung pag babayi magparig-un sa kay magtal-anakan, dapat ti kurang sa intindi magdaut sa kay magtal-anakan.

² Ti tawu magpangabuhi sa mayad may dala sa Panginuun, dapat ti unman magpangabuhi sa mayad makapuya sa kanya.

³ Ti pagbagawun tawu unman may intindi makapadamhak sa kanya, dapat ti manga pagbagawun madunung pag tawu makadahan sa kanya.

⁴ Nu unman kawu may hayup pangaradu unman kawu may anihun, dapat nu may hayup kawu, ag mabisug waya, mayamu kanmu anihun.

⁵ Ti masarigan pag kastigus magsabi tutuu, dapat ti balaw masarigan pag kastigus magsabi lunsay kapudilan.

⁶ Ti marapuya unman gid magkaimaw kadunungan una waya kabitay kay buwatun, dapat ti may pan-intindi madali dumunung.

⁷ Amanan nimu ti manga unman may intindi dahil unman kawu may madunungan mayad sa kanda.

⁸ Ti tawu madunung mag-intindi nu hintay ti tama ag ti mali alam niya nu unu kay buwatun, dapat ti kabusalan unman may alam pag tawu imaw ti makapatalang sa kanya.

⁹ Unman may hintay sa luku-luku ti makabwat kasalanan, dapat ti tawu matadlung magkaibug mangabuhi sa mayad, gustu niya tanggapun siya Panginuun.

¹⁰ Ti kada tawu lang ti may alam nu kabitay siya kasulung ngatay karuku.

¹¹ Marangga ti ulian manga daut, dapat umabunda ti ulian manga matadlung.

¹² Mahimu ti isip tawu sa matadlung siya pag dalan, dapat kamatayan ngap maaw kay patabgan.

¹³ Mahimu nimu itagu sa pagkasari kanmu karukuan, dapat pagkalawuy sari asan diman ti karukuan.

¹⁴ Ti tawu balusan gid angay sa kay manga binwat, mayad man ngatay daut.

¹⁵ Pagpaniwalaan unman may alam ti tanan niya masaydan, dapat ti madunung mag-intindi pag tawu mag-isip dap nu hintay ti mayad buwatun.

¹⁶ Ti madunung pag tawu magdahan sa kay sadili ag mag-aman sa gulu, dapat ti unman may intindi pag tawu balaw magdahan bagkus ngap harus-harus.

¹⁷ Ti tawu madali magkagalit magbuwat kadautan. Ti tawu maggayak daut pagkagalitan Diyus.

¹⁸ Makitan ti kurang sa intindi sa tawu unman may alam, dapat makitan ti kadunungan sa tawu may alam magtimbang nu naan ti mayad ngatay daut.

¹⁹ Manyuk-ub ag manpaawa-awa ti manga daut pag tawu sa manga matadlung.

²⁰ Unman may magpakiusa sa manga pugri, una kanda manga kamalay, dapat ti manga mayaman mayamu kanda manga kakilala.

²¹ Kasalanan ti magpuya sa kay kaparihu pugri, dapat mapalad ti tawu mainawatun sa pugri.

²² Sumalan lang kawu nu maggayak kawu daut sa kanmu kaparihu, dapat nu maggayak kawu mayad, ti katapatan ag ti tutuu pagmahal asan sa kanmu.

²³ Ti magsikap sa buruwatun may pakinabang, dapat ti magpakabagaw lang kay burak tunda kakurian.

²⁴ Mahalaga ti kadunungan sa manga madunung, dapat unman may halaga ti kurang sa intindi sa manga kurang-kurang.

²⁵ Ti tapat pag kastigus makaribri buhi, dapat ti madaya pag kastigus pudilun.

²⁶ Ti paggalang sa Panginuun makapakaun karig-unan hanggan darangpan niya magtal-anakan.

²⁷ Ti paggalang sa Panginuun ikaayad ag ikalawig nimu buhi, ag makaaman sa kamatayan.

²⁸ Ti kapangyarihan hari angay sa kayamu niya nasakupan; nu unman may nasakupan midamhak ti hari.

²⁹ Ti may pasunaid pag tawu madunung gid, dapat ti tawu madali magalit magpakakit kurang sa intindi.

³⁰ Ti may kahusayan pag naisipan ikaayad bilug, dapat ti hirak parihu sa sakit mag-arit-it sa manga but-ul.

³¹ Ti mag-api sa pugri mag-alukayu sa Diyus imaw ti naglalang sa kanda, dapat ti magkaawa sa pugri pag-ipaabwat ti Diyus.

³² Pag-ipadamhak Diyus ti manga daut pag tawu dahil sa kanda daut pag manga buwat, dapat pag-alagaan niya ti manga matadlung dahil sa kanda pagkamakadiyus.

³³ Ti kadunungan asan sa isip tawu may intindi, dapat ti manga kurang kay intindi unman may alam tungkul sa kadunungan.

³⁴ Umabunda ti usa ka nasyun nu ti manga mag-ulian siyun mangabuhi matadlung, dapat nu bumuwat sida kadautan, mangay-a kanda nasyun.

³⁵ Magbaya ti hari sa madunung pag suruguun, dapat pagkadat-an niya ti magpakay-a sa kanya pag suruguun.