Kabagawan 12 - Hanunuu

¹ Ti tawu magkaibug magpatadlung kay ugali magkaibug dumunung, dapat ti balaw magkaibug patadlung luku-luku.

² Pagkaawaan Panginuun ti mayad pag tawu, dapat pagparusahan niya ti maggayak daut.

³ Ti magbuwat kadautan unman gid may karig-unan, dapat ti matadlung pag tawu may karig-unan parihu sa kayu abasad kay gamut.

⁴ Ti mayad pag asawa babayi ikadayaw ag ikabaya niya asawa, dapat ti makakaray-a pag asawa parihu sa sakit mag-arit-it sa manga but-ul niya asawa.

⁵ Hustu ti pag-isipun tawu matadlung, dapat ti patigayun daut pag tawu pandaraya.

⁶ Ti manga bagaw daut makamatay, dapat ti manga bagaw matadlung makaribri.

⁷ Ipadamhak ti manga daut pag tawu ag madura sida, dapat ti manga matadlung hanggan kanda manga linahi parargu mangabuhi.

⁸ Pagdayawun ti madunung pag tawu, dapat pagpuyaan ti tawu liku kay naisipan.

⁹ Marinu waya ti tawu kasarangan lang, magbayad sa kay suruguun, kaysa tawu marapadayaw unman diman maaw may makaun.

¹⁰ Ti matadlung pag tawu mayad mag-alaga sa kay hayup, dapat ti daut pag tawu maisug ag unman magkaawa sa kay manga hayup.

¹¹ Ti masipag pag manugtanman may abunda pag karan-unun. Ti mag-uyang kay udas sa unman may pulus pag buruwatun kurang kay intindi.

¹² Ti pirmi pagkaibgan buwatun daut pag tawu imaw ti balaw mayad, nakan balaw mayad kanda kahamtangan, dapat ti matadlung mapag-un parihu sa kayu abasad kay gamut.

¹³ Ti baragawun daut pag tawu imaw ngap ti makapakaun sa kanya kaguluhan, dapat ti matadlung pag tawu mag-aman sa kaguluhan.

¹⁴ Ti kada usa makatanggap pirimyu angay sa kay sinabi ngatay binwat.

¹⁵ Ti kurang kay isip pag tawu kanya lang pag-isip ti tama, dapat ti madunung pag tawu magpatingi sa patigayun.

¹⁶ Madali magkagalit ti tawu unman may intindi nu pagpuyaan siya, dapat ti madunung pag tawu unman magpansin nu pagpuyaan siya.

¹⁷ Ti masarigan pag kastigus magsabi tutuu, dapat ti unman masarigan pag kastigus magpudil.

¹⁸ Ti manga bagaw balaw inisip bag-u bagawun masakit parihu sa baladaw, dapat ti manga bagaw inisip mayad bag-u bagawun makapaayad.

¹⁹ Ti tutuu pag bagaw pumarargu tugka aban, dapat ti bagaw pudil unman dumugay.

²⁰ Daya ti sa tagipusuun tawu maggayak daut, dapat kabayaan ti sa tagipusuun tawu maggayak kaayadan.

²¹ Unman may daut mangyari sa manga matadlung, dapat sa manga daut pag tawu, mayamu gid ti malakawan daut.

²² Pagkadat-an Panginuun ti manga pudilun, dapat pagbayaun niya ti matapat.

²³ Ti madunung pag tawu unman magpadayaw sa kay kadunungan, dapat ti kurang kay intindi pag tawu pag-ipakakit gid niya kay kalukuhan.

²⁴ Ti masipag pag tawu bumaliw takinan, dapat ti bugyahin pag tawu bumaliw suruguun.

²⁵ Ti kaaburiduhan makaparuku sa kabayaan tawu, dapat ti mayad pag manga bagaw makapasulung sa kanya.

²⁶ Ti matadlung pag tawu makagiya sa kay kakilala, dapat makapatalang ti daut pag tawu.

²⁷ Balaw matanggap tawu bugyahin kay paghingabtun, dapat ti masipag pag tawu mayad kay patabgan.

²⁸ Ti matadlung pagpangabuhi, parargu kawu mabuhi, ag miribri sa kamatayan.