Kabagawan 11 - Hanunuu

¹ Pagkadat-an Panginuun ti manga magdaya sa magkilu, dapat kay pagbayaun ti magkilu sa tama.

² Kakay-ahan ti patabgan mayabang; dapat kadunungan ti mapinakumbabaun.

³ Ti katapatan manga matadlung imaw ti maggiya sa kanda, dapat ti kalikuan manga madaya imaw ti magdaut sa kanda.

⁴ Ti kasiyunan balaw makaawat sa sirang pagsintinsiya Diyus, dapat ti matadlung kay buhi imaw ti maribri sa kamatayan.

⁵ Ti matadlung pag magpangabuhi tawu unman may ikasabi makapaalwan sa kay magkabuhi, dapat ti magpangabuhi sa daut midamhak dahil sa kay daut buwat.

⁶ Ti pangabuhi tawu matadlung imaw ti rumibri sa kanya, dapat ti pagkaibgan tawu madaya imaw ti pumadamhak sa kanya.

⁷ Nu mamatay ti manga daut pag tawu, madura kanda pagsarigan, kanda manga pagkaibgan bumaliw unman may pulus.

⁸ Pag-iribri Diyus sa kakurian ti manga matadlung, dapat ti manga daut pag tawu kay pagpabay-anan.

⁹ Pagdautun balaw maka-diyus pag tawu kay kaparihu sa panab-anan niya pagbagawun. Mag-iribri ti matadlung pag manga tawu sa panab-anan nida kadunungan.

¹⁰ Maghuruyawan sa kabayaan ti manga mag-uli sa usa ka banwa nu pagpapaladan ti manga matadlung ag katunda diman nu magkaramatay ti manga daut pag tawu.

¹¹ Mag-unlad ti banwa sa panab-anan manga matadlung, dapat mawayak inda sa panab-anan bagaw manga daut pag tawu.

¹² Ti tawu unman may pan-intindi magpuya sa kay kaparihu, dapat ti tawu may pan-intindi balaw magpuya.

¹³ Ti ragayrayan pag tawu magpanultul lihim, dapat ti masarigan pag tawu makatiwalaan lihim.

¹⁴ Midamhak ti usa ka nasyun nu unman may manugtamyaw, dapat nu mayamu ti manugtamyaw, pihu gid marapanalu.

¹⁵ Madala ti magtaratu manbayad sa utang iba, nakan nu balaw nimu gustu makurian danga inda pagbuwata.

¹⁶ Abwat ti pamantayan manga tawu sa babayi mayad kay ugali; dapat ti maisug pag tawu tugka lang mangapu kayamanan.

¹⁷ Nu mayad kawu sa iba, ikamayad nimu inda, dapat nu madaug-daug kawu, makadamhak inda sa kanmu.

¹⁸ Ti daut pag tawu unman makatanggap tutuu pag pirimyu, dapat ti magbuwat matadlung makatanggap tutuu pag pirimyu.

¹⁹ Ti tawu magbuwat matadlung parargu mabuhi, dapat ti magbuwat daut mamatay.

²⁰ Pagkadat-an Panginuun ti manga tawu liku kanda pag-iisip, dapat pag-ikabaya niya ti manga tawu kanda pangabuhi unman may ikasabi.

²¹ Pihu gid parusahan ti manga daut pag tawu, dapat ti manga matadlung unman.

²² Ti marinu pag babayi unman may alam parihu lang sa singsing gintu sa dungus babuy.

²³ Ti pagkaibgan manga matadlung pudu ikaayad, dapat ti pagkaibgan manga daut pag tawu kaguluhan.

²⁴ Ti maraayaw pag tawu lalu di magyamu kanda kayamanan, dapat ti manga makasadili lalu di magkuri.

²⁵ Ti maraayaw pag tawu mag-unlad. Ti maraawat sa iba awatan diman.

²⁶ Pagsaadan manga tawu ti magtagu kay paninda hampay itinda nu mahal yi kay halaga, dapat pagdayawun manga tawu ti unman magtagu.

²⁷ Ti tawu maghahanap sa kaayadan makakit kaayadan, dapat ti tawu maghanap kaguluhan makakit ngap.

²⁸ Mibuyu ti tawu magsarig sa kayamanan, dapat ti tawu matadlung umunlad parihu sa halaman manlangba.

²⁹ Ti manga luku-luku magdara gulu sa kanda sadili ulian, unman gid may manahun aban sa uryan. Bumaliw sida suruguun manga tawu matinudukun.

³⁰ Ti manga pagbuwatun tawu matadlung makaawat sa iba agud mayad ag lumawig kanda buhi. Ag madara niya ti manga tawu sa kay kadunungan.

³¹ Nu ti manga matadlung sa kalibutan magtanggap kapalit sa kanda manga pagbuwatun, lalu yi gid balusan ti manga daut pag tawu hanggan ti manga makasalanan.