Kabagawan 1 - Hanunuu

Ti Kahalagahan manga Kabagawan

¹ Inda ti manga kabagawan ni Sulumun kay anak ni Dabid, ti hari Israil.

² Sa panab-anan inda pag manga kabagawan, magkaimaw kawu kadunungan hanggan pan-intindi sa manga bagaw makapakaun adal sa buhi.

³ Makatadlung diman inda sa kanmu ugali agud dumunung kawu magkabuhi mapininsarun, makatadlungan ag may katapatan.

⁴ Makapakaun inda kadunungan sa manga unman may alam, ag makapakaun kadunungan sa manga kalay-awan nu kabitay magpasya tama.

⁵ Sa panab-anan pagpatingi, ti madunung lalu waya gid dumunung ag maawatan ti manga may inadalan,

⁶ hampay masalman nida ti kahulugan manga sarabihun, manga pahalimbawa, hanggan manga patigmahun manga madunung.

⁷ Nu ti usa ka tawu magkaibug dumunung kailangan paggalang siya sa Panginuun. Ti tawu kurang kay intindi unman magkaibug kadunungan ag balaw niya gustu tumadlung kay ugali.

Paanyu sa Pag-aman sa Daut pag manga Tawu

⁸ Anak, patingihi ti manga tudlu nimu gurang hanggan ti pagtadlung sa kanmu ugali,

⁹ dahil makapakaun inda kadayawan parihu sa sangbaw binwat sa busang kayu ag makaparinu parihu sa unu sa liug.

¹⁰ Anak, danga kawu magsunud sa manga maggarya manga tawu makasalanan

¹¹ ngatay magkuyug sa kanda nu sumabi sida, “Abala, pagkuyug kawu sa kanmi; puutan nita ti manga tawu unman may kasalanan ag matyun nita sida.

¹² Buhi sida kainda ag mayad kay bilug dapat matyun nita sida; miparihu sida sa manga tawu miamut sa ulian manga namatay.

¹³ Makab-ul kita kanda mahalaga pag manga kasiyunan, bag-u kanta manga balay pun-un nita manga pinangaghas.

¹⁴ Abala yi, pagkuyug sa kanmi, ag hurayun nita kanta manga naagaw.”

¹⁵ Anak, danga gid kawu magkuyug sa kanda; pag-aman kawu sa kanda.

¹⁶ Dahil maliksi sida sa pagbuwat daut hanggan sa pagmatay tawu.

¹⁷ Unman may pulus ti magpauli suduk nu kanmu darakpun pag manuk magbantay.

¹⁸ Alam manuk masduk siya, dapat tunda pag daut manga tawu unman nida alam kuntay sida ngapu ti masduk sa kanda magsuduk sa iba. Mag-alagad sida kanda maratyun dapat sida ngapu ti mamatay.

¹⁹ Katunda ngani ti patabgan manga tawu mag-apu kasiyunan sa daut pag paraan. Mamatay sida sa katunda pag buruwatun.

Ti Patabgan Magbugya sa Kadunungan

^20-21 Ti kadunungan parihu sa tawu magtudlu bagaw Diyus sa manga baklayan, sa manga buruybuyahan, sa manga palingki, hanggan sa manga puwirtahan banwa. Magkun siya,

²² “Kamu pag manga unman may alam, tugka waya lugud kapira kamu katunda? Kamu pag manga magpuya, tugka waya lugud kapira kamu pag magbaya sa magpuya? Kamu pag manga kurang sa intindi, tugka waya lugud kapira kamu magdayu sa kadunungan?

²³ Pagpatingi kamu sa kang magtamyaw sa kanyu. Taynguna, sabihun niku sa kanyu kang pag-isipun. Ipaalam niku sa kanyu kang sarabihun laban sa kanyu:

²⁴ Dahil balaw niyu pinakidnugan kang magtawag sa kanyu kuntay pagpakarani kamu sa kangku,

²⁵ ag dahil ipinasipala niyu ti tanan niku manga paanyu hanggan pagtamyaw sa kanyu,

^26-27 kasarin-an niku kamu nu rumas-ug sa kanyu ti kadamhakan ga bagyu; puyaan niku kamu nu rumas-ug sa kanyu ti kakurian hanggan ti madala pag manga pangyayari ga untug.

²⁸ Bag-u manawag kamu sa kangku, dapat balaw niku kamu sagutun. Hanapun niyu aku, dapat unman niyu aku makitan.

²⁹ Dahil magbugya kamu pagtudluan ag pinili niyu ti balaw paggalang sa Panginuun.

³⁰ Binugyahan niyu kang manga paanyu ag ikinadaut kang pagtigayun sa kanyu.

³¹ Nakan anihun niyu ti burak niyu manga pagbuwatun hanggan paggayakun daut.

³² Dahil ti malinabagun manga unman may alam imaw ti makamatay sa kanda, ag ti patawhay-tawhay manga unman may buut makapadamhak sa kanda.

³³ Dapat ti magpatingi sa kangku mabuhi may kahusayan. Balaw siya maunu ag unman siya may kadalaan.”