Istir 9 - Hanunuu

Natalu manga Hudiyu Kanda manga Kalaban

¹ Nagras-ug ti ika-13 pag sirang sa ika-12 pag bulan Adar. Inda ti sirang pagpatupad sa kasuguan hari. Sa inda pag sirang, inisip manga kalaban manga Hudiyu maruris yi gid nida lubus ti manga Hudiyu. Pat-ay baliktad ti nangyari, dahil sida ngap ti rinuris manga Hudiyu.

² Sa ati pag sirang, nagmirinsanan ti manga Hudiyu sa kanda manga banwa ag purubinsiya sakup ni Hari Aswiru hampay matyun una si unu ti pumanghas mumatay sa kanda. Dapat unman waydi may nagpanghas dahil dala sa kanda ti manga tawu.

³ Binaliwahan waya sida manga takinan manga purubinsiya, ag manga gubirnadur, ag iba waya pag suruguun hari sa kada rugar dahil magkadala diman sida sa kan Murdukyu.

⁴ Dahil makapangyarihan yi si Murdukyu sa balay hari ag pagkilalan-un sa buu kaharian. Ag mag-amat di magdugang kay kapangyarihan.

⁵ Minatay manga Hudiyu ti tanan nida kalaban sa ati katpung pag sirang sa panab-anan baladaw. Binwat nida ti tanan nida gustu buwatun sa manga magkagalit sa kanda.

⁶ Sa banwa lang Susa, 500 lalaki kanda minatay.

⁷ Minatay diman nida ti manga anak ni Haman: sida ni Parsandata, ni Dalpun, ni Aspata,

⁸ ni Purata, ni Adalya, ni Aridata,

⁹ ni Parmasta, ni Arisay, ni Ariday ag ni Baysata.

¹⁰ Dapat balaw bin-ul manga Hudiyu ti kasiyunan nida manga kalaban.

¹¹ Tunda diman pag sirang, naalaman hari ti bilang manga minatay sa banwa Susa.

¹² Magkun ti hari sa kan Rayna Istir, “Sa Susa di waya 500 lalaki ti minatay manga Hudiyu, ag minatay diman nida ti sampulu ka anak ni Haman. Hintay nguna ti nangyari sa iba ka banwa ag purubinsiya? Ag hintay waya taynguna kanmu gustu hilingun ag ipakaun niku sa kanmu.”

¹³ Magkun si Istir, “Mahal Hari, nu gustu duy nimu, pasnui waya nimu maapinan manga Hudiyu kanda sadili tugka aldaw pag sirang, ga kanda diman pagbuwatun taynguna. Ag ibitin sa kayu ti manga bangkay sampulu ka anak ni Haman.”

¹⁴ Nakan nagsugu ti hari kuntay buwata ti paghilingun ni Istir. Ipinaalam sa manga taga Susa ti sugu hari ag ipinakaun ti sampulu ka bangkay manga anak ni Haman.

¹⁵ Pagka sa surip, sa ika-14 pag sirang sa bulan Adar, nagmirinsanan maan ti manga Hudiyu sa Susa ag nakamatay waya sida 300 lalaki. Dapat unman diman sida nag-apu manga kasiyunan nida manga kalaban.

^16-17 Dapat katpung ika-13 pag sirang sa bulan Adar, nagmirinsanan ti manga Hudiyu sa tuhay-tuhay pag purubinsiya kaharian hampay apinan kanda sadili laban sa kanda manga kalaban. Ag nakamatay sida 75,000 tawu, dapat unman gid sida naggaraw kanda manga kasiyunan. Pagkasurip, ika-14 pag sirang sa bulan Adar, nagpahari sida ag nagdaus pista.

¹⁸ Dapat sa Susa, sigi di ti pagmatay manga Hudiyu sa kanda manga kalaban. Pagka sa ika-15 pag sirang sa bulan Adar, nagpahari sida ag nagdaus pista.

¹⁹ Inda ginan kay umpisa nakan ti manga Hudiyu sa manga purubinsiya magdaus pista sa ika-14 pag sirang sa bulan Adar. Sa tunda pag sirang, mag-arayawan sida manga pamakaun.

Ti Pista Purim

²⁰ Isinurat ni Murdukyu ti tanan nangyari, ag nagpadara siya surat sa tanan Hudiyu una sa arani una sa ararayu pag manga purubinsiya sakup ni Hari Aswiru.

²¹ Sa inda pag surat, pagsabihun ni Murdukyu sa manga Hudiyu kailangan alalahanun nida ti ika-14 hanggan ti ika-15 pag sirang sa bulan Adar.

²² Inda hampay alalahanun ti sirang nida karibrihan sa kanda manga kalaban, ti karukuan nida nabalyuhan kasulungan ag ti lulumian nabalyuhan kabayaan. Nakan sinabi sa kanda ni Murdukyu sa surat kailangan pagdaus sida pista, pagbaya sa tunda pag sirang, ag pag-arayawan manga pamakaun sa kada usa lalu sa manga makuri kay kahamtangan.

²³ Tinupad manga Hudiyu kay bilin ni Murdukyu, kuntay pag-alalahana di inda pag pista timpu-timpu.

Gimpuunan nu hayga may Pista Purim

²⁴ Si Haman kay anak ni Hamidata usa ka Agagiyu, kalaban manga Hudiyu ti naggayak matyun ti tanan manga Hudiyu. Nakan nanlunggungan sida nu kapira pag tupadun ti manmatay. Kay paraan lunggungan iningarnan “Pur”.

²⁵ Pat-ay pagka naalaman hari tunda paggayak sa panab-anan ni Rayna Istir, namasurat ti hari usa ka sugu kuntay ti daut pag gayak ni Haman laban sa manga Hudiyu kailangan buwatun ngap sa kanya. Ag binitay si Haman hanggan kay manga anak lalaki. Kainda ngani ti nangyari.

²⁶ Inda kay dahilan nakan kanda pag-alalahanun pag pista kay ngaran Purim. Ginan sa bagaw “Pur”, kay kahulugan lunggungan. Ag dahil sa kan Murdukyu surat ag angay sa kanda nalakawan,

²⁷ nangarasunduan sida tanan manga Hudiyu kuntay kanda alalahanun inda pag duwa ka sirang timpu-timpu parihu sa sinabi ni Murdukyu, ag pinagkasunduan diman nida tupadun nida manga linahi hanggan tanan manga niabay bilang Hudiyu.

²⁸ Inda pag duwa ka sirang kailangan alalahanun kada magtal-anakan Hudiyu sa kada linahi nida, sa tanan banwa hanggan purubinsiya. Danga inda pagkalimti ngatay pag-apasi una nida manga linahi.

²⁹ Hampay lalu waya mapag-un kay surat ni Murdukyu angay sa Pista Purim, nanurat diman si Rayna Istir kay anak ni Abihail, tungkul siyun tapil sa kagustuhan kahim-ungan ag kahusayan tanan manga Hudiyu.

³⁰ Bag-u ipinadara ni Murdukyu sa 127 ka purubinsiya sakup kaharian ni Hari Aswiru. Ti surat nagdulut kahusayan ag kaariwayahan sa manga Hudiyu,

³¹ ag itinalaga ti pagdaus Pista Purim sa itinagka pag udas, angay sa sugu ni Murdukyu hanggan ni Rayna Istir. Kailangan nida inda sundun parihu sa pagsunud linahi nida sa manga surundanun tungkul sa unman maghandum karan-unun hanggan pagpanrukuan.

³² Ag kay sugu ni Istir imaw ti magparig-un sa pagtupad sa Pista Purim isinurat sa ribru tultunun.