Istir 8 - Hanunuu

Pinili si Murdukyu

¹ Sa ati diman pag sirang, ipinakaun ni Hari Aswiru sa kan Rayna Istir kay kasiyunan ni Haman, ti kalaban manga Hudiyu. Sinabi ni Istir sa hari kuntay kay katawuhan si Murdukyu, nakan ipinab-ul siya hari.

² Bin-ul hari kay singsing pantatak, binawi niya ginan sa kan Haman, bag-u kay ipinakaun sa kan Murdukyu. Ag siya ti binwat kaawat ni Istir sa tanan kasiyunan ni Haman.

³ Kas-a waya napakarani si Istir sa kan Hari Aswiru maluhudan ag maglumi sa kay atubangan. Pagpamuhunun niya danga yi pagpararguhan ti daut pag gayak ni Haman usa ka Agagiyu laban sa manga Hudiyu.

^4-5 Itinudlu hari kay sugkud gintu sa kan Istir, nakan tinmindug siya sa atubangan hari ag magkun, “Nu ungud kawu magbaya sa kangku, Mahal Hari, ag nu para sa kanmu tama ag matadlung inda, gustu mana niku pagbuwat kawu usa ka kasuguan hampay pabul-an halaga ti ilinantad pag barita ni Haman, kay anak ni Hamidata, kuntay matyun ti tanan manga Hudiyu sa kanmu kaharian.

⁶ Balaw niku maagwanta makitan pagpapasun kang manga kalahi hanggan manga katawuhan.”

⁷ Magkun si Hari Aswiru sa kan Istir hanggan sa kan Murdukyu pag Hudiyu, “Ipinabitay yi niku si Haman dahil sa kay daut pag gayak matyun ti manga Hudiyu. Nakan ipinakaun yi niku sa kanmu, Istir, ti manga kasiyunan niya.

⁸ Nakan pagbuwat kamu kasuguan sa kang ngaran una hintay kanyu gustu isurat angay sa kanyu pagkaibgan para sa ikamayad niyu manga Hudiyu, bag-u tatakan niyu singsing niku. Dahil una hintay pag kasuratan sa ngaran hari ag tatakan singsing niya dayi mabag-u.”

⁹ Nakan katpung ika-23 sa ikatlu pag bulan Siban, ipinatawag ti manga manugsurat hari. Isinurat nida ti tanan sinabi ni Murdukyu. Tunda pag surat para sa manga Hudiyu, sa manga gubirnadur, sa manga miyur-banwa, ag sa iba waya pag manga suruguun hari sa 127 ka purubinsiya, ginan sa Indiya tugka sa Itiyupya. Isinurat inda sa kada pamagaw tawu sa buu kaharian, hanggan diman sa pamagaw Hudiyu.

¹⁰ Ipinasurat ni Murdukyu sa panab-anan ngaran ni Hari Aswiru ag tinatakan singsing hari. Bag-u di, ipinadara sa panab-anan manga tagapagdara surat sakay sa marabaskug pag kabayu hari.

¹¹ Angay sa tunda pag surat, pinakan-an pahintulut ti tanan manga Hudiyu manmirinsanan ag apinan kanda sadili. May karampatan sida mumatay una sa kantapu nu mag-unuunu sa kanda ti ginan sa iba nasyun ngatay purubinsiya. Pagpahintulutan diman sida bum-ul kasiyunan nida manga kalaban.

¹² Katunda ti buwatun manga Hudiyu sa tanan purubinsiya sakup ni Hari Aswiru, sa ika-13 pag sirang sa ika-12 pag bulan, ti bulan Adar.

¹³ Inda pag surat ipadara sa tanan purubinsiya bilang usa ka kasuguan ag kailangan ipaalam sa tanan, hampay makaalistu ti manga Hudiyu sa pag-apin sa kanda sadili laban sa kanda kalaban sa ati pag sirang.

¹⁴ Nakan angay sa sugu hari, madali ginminan ti manga tagadara surat masakayan sa marabisug pag kabayu hari. Inda pag sugu ipinakalat diman sa buu banwa Susa.

¹⁵ Pagka linmuwas Si Murdukyu sa balay hari, nakasulung siya rutay hari malagti ag malatuy bag-u nakakulimpay rutay linu kulay dungun, ag may kuruna gintu sa kay ulu.

¹⁶ Masyadu gid masulung ti tanan Hudiyu.

¹⁷ Sa kada banwa ngatay purubinsiya naabut kasuguan hari, nagbarayaan gid masyadu ti manga Hudiyu ag nagpista sida. Ag aduk sa ati pag daga ti nagbaliw Hudiyu dahil sa kadalaan nida sa manga Hudiyu.