Istir 6 - Hanunuu

Kinilala si Murdukyu

¹ Igu yabi, unman makaturug si Hari Aswiru, nakan ipinab-ul niya ti ribru tungkul sa tultulanun niya kaharian ag ipinabasa habang magpatingi siya.

² Nabasa ngap ti tultulanun tungkul sa nasulayan ni Murdukyu sa gayak nida ni Bigtana ni Tiris sa pagmatay sa kan Hari Aswiru. Sida ni Bigtana ni Tiris ti takinan hari. Sida ti guwardiya sabian sulud-sulud hari.

³ Sa ati pagnabasa, nagpaingana ti hari, “Unu pag pirimyu ngatay parangal ti binwat ngatay ipinakaun sa kan Murdukyu dahil sa mayad niya pag binwat sa kangku?” Magkun ti suruguun hari, “Unman duy, Mahal Hari.”

⁴ Nitpung waydi ati pag udas, magsaka si Haman sa may sabian hari hampay hilingun sa hari kuntay bitayun si Murdukyu sa matarum pag kayu kay ipinabwat. Nagpaingana ti hari, “Si unu asan sa sugkadan?”

⁵ Sinmagut ti manga suruguun hari, “Si Haman duy.” Magkun ti hari, “Paataytaga nimu siya.”

⁶ Pagka sinmaka ngani si Haman, pinaingana siya hari, “Hintay ti mayad niku buwatun sa tawu pagkaibgan kilalahun?” Kay isip ni Haman siya yi ti pagtukuyun hari ti kilalahun.

⁷ Nakan magkun siya, “Kaindaay duy ti buwatun nimu, Mahal Hari:

⁸ Ipab-ul nimu ti usa sa kanmu manga rutay panhari kay nisulung yi, bag-u ti usa sa kanmu pag sakyan pag kabayu may tanda hari kay ulu.

⁹ Pagkatapus, sugua ti usa sa kanmu abwat pag may kangaranan kuntay parutayi niya tunda pag tawu panhari pag rutay ag pasakyan siya sa kabayu hari, bag-u ipalibut sa buu banwa habang magringgit kay manga kaibahan, ‘Inda ti pagbuwatun hari sa tawu pagkilalahun’ ”

¹⁰ Magkun ti hari sa kan Haman, “Malu, ipab-ul nimu ti usa sa manga rutay hanggan kabayu niku, bag-u buwata nimu sa kan Murdukyu usa ka Hudiyu ti tanan nimu sinabi, ti matukawan sa sabian niku balay hari. Pihua gid matupad nimu ti tanan nimu sinabi.”

¹¹ Nakan bin-ul ngani ni Haman ti rutay hari bag-u ipinasulung sa kan Murdukyu, ipinasakay sa kabayu hari ag ipinalibut sa banwa habang magringgit si Haman, “Inda ti pagbuwatun hari sa tawu pagkilalahun.”

¹² Igu natapus, binmalik maan si Murdukyu sa sabian balay hari. Si Haman waydi susun nuli may pahamung kay uyahun dahil sa kay-a ag daka pag isug.

¹³ Pagka rinmas-ug siya sa kay balay, itinultul niya sa kay asawa sa kan Siris hanggan sa kay manga kakilala ti tanan nangyari. Magkun kay asawa sa kanya hanggan kay manga manugpatigayun pag kakilala, “Amat-amat kawu magkatalu ni Murdukyu. Dayu nimu siya matalu dahil usa siya ka Hudiyu. Pihu gid matalu di kawu.”

¹⁴ Magharampangan di waya sida, rinmas-ug ti pira ka takinan hari bag-u tinaban si Haman sa inalistu yapun ni Istir.