Istir 4 - Hanunuu

Nanhagad Awat si Murdukyu sa kan Istir

¹ Pagka naalaman ni Murdukyu kay gayak ni Haman laban sa manga Hudiyu, ginitas niya kay rutay bilang pagpakakit kay karukuan. Bag-u nanrutay siya saku, namauli dapug sa kay ulu, ag nag-atag sa karaw-an banwa magpamurahaw sa lumi.

² Dapat hanggan lang ati tugka siya sa luwas puwirtahan balay hari, dahil balaw pag pasnuan makasaka ti may sulung rutay saku.

³ Ti manga nakadnug sa sugu hari pag manga Hudiyu sa kada purubinsiya nanrukuan gid, nanlulumian ag nanwarawawan. Mayamu gid sa kanda ti nanulung saku ag napaigya sa dapug.

⁴ Pagka naalaman ni Rayna Istir ti nangyari sa kan Murdukyu sa panab-anan niya manga suruguun babayi ag manga takinan manug-alaga sa kanya, nanruku gid siya. Pinadaran-an niya rutay si Murdukyu hampay ilisan kay sulung rutay saku, dapat unman inda niya tinanggap.

⁵ Nakan ipinatawag ni Istir si Hatak, usa siya ka takinan hari ti kinatiwalaan man-intindi sa kanya. Ipinaati niya si Hatak sa kan Murdukyu hampay alamun nu hayga nagkatida siya.

⁶ Nakan inatihan ngani ni Hatak si Murdukyu sa palasa karaw-an banwa sa katpadan sabian balay hari.

⁷ Sinabi sa kanya ni Murdukyu ti tanan nangyari ag nu pira ti itinaratu ipakaun ni Haman sa taraguan kayamanan kaharian Susa, hampay lang matyun niya ti manga Hudiyu.

⁸ Pinakan-an siya ni Murdukyu usa ka kupya kasuguan hari ti ipinaalam sa manga taga Susa, agud ipakakit sa kan Istir. Sinabihan diman niya si Hatak kuntay tultulan tanan sa kan Istir ti nangyari, bag-u sabihi pag-atag sa hari hampay manpakihampang para sa kay manga kadugu.

⁹ Nagbalik si Hatak sa kan Istir ag itinultul ti tanan sinabi ni Murdukyu.

¹⁰ Ipinabalik maan ni Istir si Hatak atag sa kan Murdukyu ag ipinasabi inda:

¹¹ “Alam tanan sa buu kaharian una si unu ti pumakarani sa hari sa sugkadan turukawan, lalaki man ngatay babayi, balaw pagpatawagun pihu gid matyun, purya lang nu itudlu hari kay sugkud gintu sa tunda pag tawu. Ag usa yi aku ka bulan balaw pag patawagun hari.”

¹² Pagka nasabi yi sa kan Murdukyu ti bilin ni Istir,

¹³ inda waydi kay sabi atag sa kan Istir, “Danga nimu isipun kawu lang ti maribri sa tanan Hudiyu dahil sa balay hari kawu pag mag-uli.

¹⁴ Nu ipasipala lang nimu inda pag manga mangyari, pihu may umawat di iba sa manga Hudiyu, dapat kawu hanggan kanmu manga katawuhan mamatay. Barang nakan kawu binwat rayna hampay miribri nimu kanmu kaparihu manga Hudiyu.”

¹⁵ Inda waydi kay pagsabihun ni Istir tabug sa kan Murdukyu,

¹⁶ “Paglakaw yi kawu, tipuna nimu ti tanan Hudiyu atay sa Susa ag danga kamu maghandum karan-unun para sa kangku. Danga kamu magkaun ngatay mag-inum danum sa sulud 3 ka sirang. Aku hanggan kang manga suruguun babayi unman diman manhandum karan-unun. Pagkatapus, atabug aku sa hari una labag sa kasuguan hari. Ag nu matyun aku, nakaalistu di aku mamatay.”

¹⁷ Nakan linmakaw ngani si Murdukyu sinunud niya ti pag-ipabuwat ni Istir.