Istir 3 - Hanunuu

Naggayak si Haman Rurisun ti manga Hudiyu

¹ Siyun ginan pag manga nangyari, inabwat ni Hari Aswiru ti katungkulan ni Haman kay anak ni Hamidata usa ka Agagiyu. Binwat siya pinagkatakinan sa kay kaharian.

² Sinugu niya ti tanan may katungkulan pagyuk-ub sa kan Haman bilang paggalang sa kanya, dapat ay si Murdukyu dayu manyuk-ub.

³ Pinaingana siya iba ka takinan nu hayga unman siya magsunud sa bilin hari.

⁴ Magsabi siya aku Hudiyu. Sirang-sirang paggaryahun siya niya kaparihu takinan pagyuk-ub sa kan Haman dapat dayu gid siya manyuk-ub. Nakan ngani isinumbung nida sa kan Haman si Murdukyu hampay maalaman nida nu pabay-anan lang aw siya sa kay pagbuwatun, dahil kay sabi usa siya ka Hudiyu.

⁵ Pagka naalaman ni Haman unman magyuk-ub sa kanya si Murdukyu hampay maggalang, nangisug gid siya.

⁶ Lalu waya pagka naalaman niya siya maaw Hudiyu, kay inisip balaw lang si Murdukyu kay ipamatay nu unman tanan yi lang manga Hudiyu sa sakup kaharian ni Hari Aswiru.

⁷ Bulan yi Nisan, ti un-an pag bulan, katpung ika-12 pag timpu kay paghari ni Aswiru, nagsugu si Haman manlunggungan hampay maalaman nu hintay pag sirang hanggan bulan pag-ipatupad kay gayak. (Kanda ginamit sa lunggungan pag-ingarnan “pur”.) Nabunut nida ti ika-13 pag sirang sa ika-12 pag bulan, ti bulan Adar.

⁸ Kay sabi ni Haman sa kan Hari Aswiru, “Mahal Hari, may usa duy ka gurupu manga tawu mag-ulian sa tuhay-tuhay pag purubinsiya niyu kaharian ag may sadili sida kasuguan tuhay waydi sa iba nasyun. Unman sida magsunud sa kanmu pag kasuguan ag unman inda mayad nu kanmu lang pabay-anan.

⁹ Nu kanmu gustu, Mahal Hari, pagsugu kawu matya sida tanan. Ag mangayaw di aku 350 tunilada pilak sa manga takinan nimu kaharian, bag-u ipauli nida inda sa butangan kayamanan hari.”

¹⁰ Pagkatapus, bin-ul hari kay singsing pantatak, bag-u ipinakaun sa kan Haman kay anak ni Hamidata usa ka Agagiyu, ti kalaban manga Hudiyu.

¹¹ Magkun ti hari sa kanya, “Kanmu yi lang kanmu kuwarta, dapat buwata kanmu pagkaibgan buwatun sa manga Hudiyu.”

¹² Nakan ati katpung sa ika-13 pag sirang sa un-an pag bulan, ipinatawag ni Haman ti tanan manga manugsurat hari. Nagpabuwat siya surat sa kanda para sa manga gubirnadur purubinsiya, sa manga banwa hanggan sa iba waya pag manga takinan sa buu kaharian, sa kanda sadili pamagaw. Ti surat binwat sa ngaran ni Hari Aswiru ag tinatakan singsing.

¹³ Inda pag surat ipinadara sa tanan purubinsiya kaharian sa panab-anan tagadara surat. Masuratan siyun ti sugu sa sulud lang usa ka sirang matyun ti tanan manga Hudiyu: ti anak, ti gurangun, ti lalaki hanggan ti babayi, bag-u aghasun diman ti tanan nida kasiyunan. Buwatun inda sa ika-13 pag sirang sa ika-12 pag bulan, ti bulan Adar.

^14-15 Sa sugu hari, madali gid nighit ti manugtibu surat hampay itibu sa kada purubinsiya ti manga kupya kasuguan hari, ag pag-ipaalam inda sa manga tawu hampay makaalistu sida para sa sirang pagmatay sa tanan Hudiyu. Bag-u inda pag sugu ipinaalam diman sa banwa Susa. Mintaras matukawan ag mag-inuman ti hari kaibahan si Haman, magkaragulu waydi ti banwa Susa dahil sa manga magpangyari.