Istir 2 - Hanunuu

Pinili Rayna si Istir

¹ Pagka nadura kay galit ni Hari Aswiru, naimatun-an maan niya si Rayna Basti hanggan kay binwat, bag-u ti pinirmahan niya pag kasuguan laban sa kanya.

² Magkun ti magsirbi sa kanya pag manga takinan, “Mahal Hari, hayga duy kawu unman maghanap mararinu pag daraga tugnaw?

³ Pagpili duy kawu manga takinan sa kada sakup nimu kaharian pag purubinsiya hampay manhanap mararinu pag daraga tugnaw bag-u darahun sitay tag sa banwa Susa, sa ulian manga kababayihan. Paasikasuhan nimu sida sa kan Hagay, usa sa manga takinan nimu may mataas pag katungkulan, ti manug-alaga sa ulian manga kababayihan. Siya duy ti bahala magpakaun manga pangailangan manga daraga sa pagparinu.

⁴ Ag ti maibgan nimu pag daraga imaw ti ipalit nimu sa kan Basti bilang rayna.” Naibgan hari inda pag patigayun nakan sinunud niya.

⁵ Ati katpung pag manga panahun, may usa ka Hudiyu mag-uli sa banwa Susa, kay ngaran si Murdukyu kay anak ni Hair, laki ni Simiy anak ni Kis ginan sa lahi ni Binhamin.

⁶ Usa siya sa manga binihag ni Hari Nabukudunusur dinara atabug sa Babilunya ginan sa Hirusalim, kaibahan ni Hari Hihuyakin taga Huda.

⁷ Si Murdukyu may pinsan daraga. Pagka inda naulila kay inalagaan hanggan sa dinmaka ag kay magpahalimbawa ga kay yi gid suud anak, kay ngaran si Hadasa pag-ingarnan diman waydi Istir. Marinu diman waydi kay histuda bilug.

⁸ Pagka ibinarita yi ngani ti sugu hari tungkul sa mararinu pag daraga tugnaw, mayamu pag daraga ti dinara sa balay hari ati sa Susa. Usa yi sa kanda si Istir. Ipinaasikasu sida sa kan Hagay dahil siya ti manug-asikasu sa manga pagdarahun atag pag babayi.

⁹ Nakabaya gid si Hagay sa kan Istir, nakan mayad gid kay nabubut-un sa kanya. Nakan madali gid niya pinakan-an siya karan-unun hanggan kay pangailangan sa pagparinu. Hinanapan di gid marinu pag sulud-sulud ag pinakan-an pitu ka suruguun babayi.

¹⁰ Unman sinabi ni Istir siya Hudiyu, dahil sinabihan siya ni Murdukyu danga mag-alaman.

¹¹ Sirang-sirang diman maglawuy siyun si Murdukyu arani sa alad balay ulian manga daraga hampay magkaalaman niya ti kahamtangan ni Istir, ag nu hintay yi ti magpangyari sa kanya.

¹² Bag-u umatubang ti usa ka babayi sa hari, kailangan matapus niya ti usa ka timpu magparinu. Sa un-an pag unum ka bulan, payidan niya lana mira sa kay bilug, bag-u sa sunud maan pag unum ka bulan, payidan waydi manga pamanglu hanggan iba waya pamarinu kay bilug.

¹³ Bag-u di siya umatag sa hari, pakan-an dapu siya una hintay pag manga rutay hanggan manga unu pamarinu kay pagkaibgan isulung hampay siya makaatubang sa hari.

¹⁴ Yabi di siya bag-u atabug sa hari, pagka aldaw surip darahun siya sa ulian manga asawa hari, ti pagpamahalaan ni Saasgas usa sa manga takinan may abwat pag katungkulan. Siya ti ipinabahala hari sa kay manga asawa. Unman may una si unu ti makabalik sa hari purya lang nu maibgan siya ag patawagun hari.

^15-16 Pagka sa ikasampulu yi pag bulan, ti bulan Tibit, katpung ikapitu pag timpu kay paghari ni Aswiru, rinmas-ug yi ti sirang pag-atubang ni Istir sa hari sa balay hari. Sinunud ni Istir kay bilin ni Hagay, ti takinan manug-alaga sa kanda sa ulian manga babayi. Isinulung niya ti rutay kay sinabi ni Hagay sulungan, tunda bay ngani pagbaya ag pagdayawun gid siya manga nakakit sa kanya, bag-u di siya dinara sa balay hari.

¹⁷ Pagkaibgan gid hari si Istir subra waya sa iba manga daraga kay magbaya sa kan Istir. Kinurunahan niya siya ag binwat rayna kailis ni Basti.

¹⁸ Nagbulwat gid daka pag karan-an ti hari hampay pahalagahan si Istir. Binan-awan niya ti tanan manga takinan hanggan ti iba waya niya manugsirbi. Ipinahayag niya sa buu kaharian kuntay pagpahari ti manga tawu sa ati pag sirang, bag-u nangayaw siya pamakaun sa manga tawu.

¹⁹ Pagka sa ikadwa yi pagtiripun manga daraga, si Murdukyu usa yi ka takinan manugbantay sa sabian balay hari.

²⁰ Unman waya gid pagsabihun ni Istir kuntay siya usa ka Hudiyu, kay gid nakan pag-isipun kay bilin ni Murdukyu. Pagsundun di gid ni Istir si Murdukyu parihu ga kaybi siya pag alagaan waya niya.

²¹ Ati katpung pag manga panahun matukawan si Murdukyu sa sabian balay hari. May duwa ka takinan ti hari, sida ni Bigtan ni Tiris, sida ti bantay sa sabian sulud-sulud hari. Magkagalit sida sa kan Hari Aswiru ag maggayak sida matyun ti hari.

²² Naalaman ni Murdukyu inda pag gayak, nakan sinabi niya inda sa kan Rayna Istir. Sinabi waydi inda ni Istir sa hari ag sinabi diman waydi niya si Murdukyu ti nakadnug tunda.

²³ Ipinausisa tunda hari. Pagka napatutuuhanan tutuu ngani, ipinatuhug niya sida duwa ni Bigtan ni Tiris. Inda pag nangyari ipinasurat hari sa ribru tultulanun kaharian.