Istir 10 - Hanunuu

Ti Kapangyarihan ni Hari Aswiru ag ni Murdukyu

¹ Ti tanan manga tawu sa buu kaharian ni Aswiru pinabayad niya buhis, hanggan ti manga mag-ulian sa puru karaw-an dagat.

² Nakasurat di sa Ribru Tultulanun Hari Midya ag Pirsiya ti kapangyarihan ni Hari Aswiru hanggan ti tanan niya binwat, una kay nagpakaun katungkulan sa kan Murdukyu hanggan ti daka pag kadayawan kay iinayaw niya sa kanya.

³ Si Murdukyu pangadwa sa kan Hari Aswiru. Bantug gid siya sa kay kaparihu manga Hudiyu. Pag-igalang siya dahil binwat niya ti ikaayad niya kasimanwa Hudiyu ag siya ti tagahampang sa hari nu sida may kailangan.