Istir 1 - Hanunuu

Inilisan si Basti sa Kay pagka Rayna

^1-2 May usa ka hari sa Pirsiya kay ngaran si Aswiru. Ati siya pag mag-uli sa kay balay hari sa may alad batu sa may daka pag banwa Susa. Kay sakup niya 127 ka purubinsiya ginan sa Indiya tugka sa Itiyupya.

³ Pagka may tulu yi ka timpu kay pagka hari, nag-alistu siya daka pag karan-an sa kay manga takinan ag sa iba waya niya suruguun sa balay hari. Nandulud diman waydi ti manga takinan manga sundalu taga Pirsiya hanggan taga Midya, una ti may kangaranan pag manga tawu hanggan ti manga takinan manga purubinsiya.

⁴ Tunda pag karan-an inmaput di unum ka bulan kay kadugay. Sa sulud ati katpung pag manga kaudasan, ipinakakit ni Aswiru kay kasiyunan sa kaharian hanggan kay kapangyarihan ag ti kaabundahan niya buhi.

⁵ Pagka siyun ginan nag-alistu maan daka pag karan-an ti hari para yi tunda sa tanan taga Susa, mayaman man ngatay pugri. Tunda pag karan-an ati pag idinaus sa halamanan balay hari, usa ka duminggu kay kadugay.

⁶ Pinarinuan ti gardin kulay malagti hanggan malatuy pag limbun may higut linu kulay dungun. Bag-u itinakud sa kaw-it pilak sa manga tulduk marmul. Kay manga tukawan gintu di hanggan pilak, kay waydi salug inda may manga parinu musaik binwat ginan sa bubug, marmul, kapis ag may iba waya mahalaga pag manga batu.

^7-8 Nag-inum ti manga bisita sa gintu pag-irinman may tuhay-tuhay kay kalasi. Pinasibut-an sida hari sa mahalaga pag-alak. Nagsugu ti hari sa kay manga suruguun pagustuhi lang ti manga bisita.

⁹ Habang mag-alistu ti manga lalaki pag manga bisita, nag-alistu diman karan-an si Rayna Basti para sa manga babayi pag manga bisita ati sa balay hari ni Hari Aswiru.

¹⁰ Pagka sa ikapitu pag sirang handaan, nasayahan ti hari dahil sa nakainum siya. Ipinatawag niya kay pitu ka takinan may mataas pag katungkulan, kay sadili niya manugsirbi. Sida ni Mihuman, ni Bista, ni Harbuna, ni Bigta, ni Abagta, ni Sitar, ag ni Karkas. Bag-u sinugu niya sida

¹¹ paatagan sa kanya si Rayna Basti pag may sangbaw kuruna hampay ipakakit kay karinuan sa manga takinan hanggan sa tanan bisita, dahil marinu gid waydi siya.

¹² Dapat pagka sinabihan si Rayna Basti manga suruguun hari tungkul sa pag-isugu niya, nagbugya siya atabug. Nakan nangisug ti hari.

¹³ Kinaugalian yi hari maghagad payu sa manga madunung pag tawu may kinaalaman sa manga kasuguan hanggan surundanun sa kaharian.

¹⁴ Ti pirmi niya paghagadan payu sida ni Karsina, ni Sitar, ni Admata, ni Tarsis, ni Miris, ni Mirsinas ag ni Mimukan. Sida ti may mataas pag manga katungkulan manga takinan sa kaharian Pirsiya hanggan sa Midya, ag kakilala gid sida hari.

¹⁵ Namaingana ti hari sa kanda, “Angay sa sakit sa lukub kaharian Pirsiya nu hintay ti gustu buwatun sa kan Rayna Basti dahil unman siya nagsunud sa kang sugu sa panab-anan manga suruguun niku?”

¹⁶ Sinmagut si Mimukan, “Mahal Hari, nagkasala gid ungud si Rayna Basti balaw lang sa kanmu nu unman hanggan yi sa manga takinan Pirsiya hanggan Midya ag una sa manga nasakupan buu kaharian.

¹⁷ Kay binwat ni Rayna Basti pihu gid maalaman tanan manga kababayihan sa buu kaharian, humuwad diman waydi sida; Balaw diman waydi sida maniwala sa kanda manga asawa. Dahil mangatadlungan sida kumumun si Rayna Basti ngani unman sinmunud ati katpung sa bilin hari pag-ati sa kanya.

¹⁸ Nakan taynguna ginan, mahimu kainda diman ti buwatun asawa manga takinan Pirsiya hanggan Midya, nu mabaritaan ti binwat rayna. Nakan udyi galangun asawa babayi kanda asawa lalaki, ag mangisug sida sa kanda asawa babayi.

¹⁹ “Nakan nu gustu nimu Mahal Hari, kanmi masabi pagbuwat yi lang kawu usa ka kasuguan kuntay danga yi magpakakit sa kanmu si Rayna Basti, bag-u ilisi yi nimu siya tuhay pag rayna tunda mayad man sa kanya. Isurat nimu inda pag kasuguan iminsan sa manga kasuguan kaharian Pirsiya hanggan Midya hampay balaw yi mauman.

²⁰ Nu maipabantala yi inda sa buu kaharian pihu gid galangun manga babayi kanda manga asawa ginan sa manga mayaman tugka sa manga pugri.”

²¹ Kinaibgan gid hari hanggan manga takinan kay paanyu ni Mimukan, nakan sinunud gid hari inda.

²² Ipinasurat niya inda ag ipinadara sa tanan purubinsiya sakup kaharian niya angay sa kanda sadili manga pamagaw. Ti pagsabihun ati sa surat ti lalaki imaw gid ti dapat pumangulu sa kanda magtal-anakan.