Isra 9 - Hanunuu

Nangasawa sa manga Day-uhan ti manga Israilita

¹ Magkun waya si Isra: Pagkatapus inda pag nangyari, nag-ati sa kangku ti manga takinan pag manga Hudiyu ag nagsabi, “Mayamu sa nasakupan Israil, hanggan yi ti manga manughandug ag ti manga Libita, ti mag-ugali parihu sa manga tawu sa kanda sangput. Pagbuwatun nida ti manga mayagting pag manga ugali manga Kananiyu, Hitiyu, Pirisiyu, Hibusiyu, Amuniyu, Muabita, Ihipsiyu, ag Amuriyu.

² Nangasawa waya sida hanggan kanda manga anak sa manga babayi ginan sa tunda pag manga nasakupan. Nakan ti nasakupan pinili Diyus naamutan iba manga linahi. Ag kanta manga may kangaranan ag manga takinan sida waya ti nanguna sa pagbuwat inda.”

³ Pagka nadnugan niku inda, ginisi niku kang rutay sa karukuan rinabnut niku kang buhuk ag bungut, bag-u nanukawan aku may kabuyatan.

⁴ Naniripnan sa kang atubangan ti manga tawu may kadalaan sa pagsabihun Diyus Israil tungkul sa panguragin nida kaparihu manga Israilita nakauli ginan sa pagkabihag. Nanukawan lang aku may kabuyatan tugka sa nagras-ug ti udas pagsagda sa malambung.

⁵ Igu rinmas-ug tunda pag udas, inmapas aku sa kang magpanrukuan. Linmuhud aku gitas-gitas kang rutay, ag nandarangin maabwatan kang manga kamang sa Panginuun, kang Diyus.

⁶ Magkun aku, “Diyus niku, magkay-a gid aku. Unman aku makatangda sa kanmu sa masyadu pag kay-a, dahil masyadu gid kanmi manga kasalanan; ga lapaw yi inda sa kanmi manga ulu ag nag-aput yi sa langit.

⁷ Ginan waya duy sa kaudasan nimi manga ginurang tugka taynguna, masyadu gid kanmi kasalanan; ag dahil siyun, kami ag kanmi manga hari hanggan manga manughandug pirmi pagsakupun manga hari iba manga nasyun. Pinanmatay nida ti iba sa kanmi, ag ti iba binihag, tinakawan ag pinakay-a, parihu sa nangyari sa kanmi taynguna.

⁸ “Ag taynguna, sa dag-ud pag panahun, kinaawaan nimu kami, Panginuun kanmi Diyus. Pinahintulutan nimu may masawad sa kanmi, ag ipinauli nimu kami may kasiguraduhan sa inda pag rugar kanmu pinili. Pinakan-an nimu kami pag-asa ag pinagaan nimu kanmi kahamtangan sa kanmi pagkapanawuhun.

⁹ Una manga panawuhun kami, unman nimu kami pagbay-anan sa kanmi pagkapanawuhun, bagkus ngap pag-ipakakit di nimu kanmu pagmahal sa kanmi sa panab-anan mayad pagpasunaid sa kanmi manga hari sa Pirsiya. Binuwat nimu inda hampay mapakan-an nimu kami bag-u pag buhi, hampay maibungsud maan nimi kanmu nadaut pag Balay, hanggan hampay maalagaan nimu kami sa Huda ag Hirusalim.

¹⁰ “Dapat taynguna, Diyus nimi, nagkasala kami. Unu waya ti masabi nimi? Dahil pag-ipalawuy nimi kanmu manga sugu

¹¹ ipinakaun nimu sa kanmi sa panab-anan nimu manga manugsirbi pag manga purupita. Magkun sida sa kanmi, ti atihan nimi pag daga agud apuun mayagting pag daga dahil sa kadautan manga tawu mag-ulian siti. Yinagtingan nida una naan pag bahagi daga sa panab-anan nida mahalay pag manga buruwatun.

¹² Nagsabi diman ti manga purupita sa kanmi danga gid kami mag-asawa sa kanda, danga gid kami mag-awat sa kanda agud umalwan sida, hampay kami rumig-un ag umalwan, hampay ti kaalwanan pumirmaminti inda sa manga linahi nimi hanggan aban.

¹³ Pinarusahan nimu kami, Diyus nimi, dahil sa kanmi manga kasalanan. Dapat ti parusa nimu sa kanmi kurang waya sa dapat nimi tanggapun, ag pinasnuan nimu waya may masawad buhi sa kanmi.

¹⁴ Madi katida, linabag maan nimi kanmu manga sugu, ag nangasawa kami sa manga tawu magbuwat mayagting pag manga buruwatun. Ungud gid magalit kawu sa kanmi ag duraun nimu kami tugka unman yi may masawad sa kanmi.

¹⁵ Panginuun, Diyus Israil, matadlung kawu. Dahil pinasnuan nimu may masawad sa kanmi buhi hanggan taynguna. Pag-akuun nimi kanmi manga kasalanan, nakan unman kami makaatubang sa kanmu atubangan dahil sa kanmi manga kasalanan.”