Isra 8 - Hanunuu

Ti manga Nagbalik ginan sa Pagkabihag Kaibahan ni Isra

¹ Nagsabi si Isra: Inda ti manga takinan sa manga magtal-anakan nagkuyug sa kangku tabug sa Hirusalim ginan sa Babilunya, katpung kaybi maghari si Artasirsis:

² si Girsum, ginan sa magtal-anakan ni Piniis; si Danyil, ginan sa magtal-anakan ni Itamar;

³ si Hatus anak ni Sikanyas, ginan sa magtal-anakan ni Dabid; si Sakaryas ag ti manga kaibahan niya 150 ka lalaki, ginan sa magtal-anakan ni Parus (may imaw listahan nida manga ginurang);

⁴ si Ilyunay anak ni Siraya ag ti manga kaibahan niya 200 ka lalaki, ginan sa magtal-anakan ni Pahat Muab;

⁵ si Sikanyas anak ni Yahasyil ag ti manga kaibahan niya 300 ka lalaki, ginan sa magtal-anakan ni Satu;

⁶ si Ibid anak ni Hunatan ag kay manga kaibahan niya 50 ka lalaki, ginan sa magtal-anakan ni Adin;

⁷ si Hisayas anak ni Atalya ag kay manga kaibahan niya 70 ka lalaki, ginan sa magtal-anakan ni Ilam;

⁸ si Sibadyas anak ni Mikail ag kay manga kaibahan niya 80 ka lalaki, ginan sa magtal-anakan ni Sipatyas;

⁹ si Ubadyas anak ni Hiyil ag kay manga kaibahan niya 218 ka lalaki, ginan sa magtal-anakan ni Huab;

¹⁰ si Silumit anak ni Husipiya ag kay manga kaibahan niya 160 ka lalaki, ginan sa magtal-anakan ni Bani;

¹¹ si Sakaryas anak ni Bibay ag kay manga kaibahan niya 28 ka lalaki, ginan sa magtal-anakan ni Bibay;

¹² si Huhanan anak ni Hakatan ag kay manga kaibahan niya 110 ka lalaki, ginan sa magtal-anakan ni Asgad;

¹³ si Ilipilit, si Hiwil, ag si Simaya ag kay manga kaibahan nida 60 ka lalaki, imaw ti nasawad sa Babilunya ginan sa magtal-anakan ni Adunikam;

¹⁴ si Utay ag si Sakur ag kanda manga kaibahan 70 ka lalaki, ginan sa magtal-anakan ni Bigbay.

Ti Pagbalik Nida ni Isra sa Hirusalim

¹⁵ Tinipun niku ti kumuyug sa kangku tabug sa Hirusalim ati sa sapa magbulus tabug sa rugar Ahaba. Nagkampu kami ati tulu ka sirang. Pagka binantayan niku ti manga tawu hanggan manga manughandug kinmuyug sa kangku, naalaman niku unman maaw lagan ti manga Libita.

¹⁶ Nakan ipinatawag niku ti manga takinan kaban sida ni Iliyisir, ni Aryil, ni Simaya, ni Ilnatan, ni Harib, ni Ilnatan, ni Natan, ni Sakaryas, ag ni Misulam, ag ti duwa ka madunung pag tawu sida ni Huyarib ni Ilnatan.

¹⁷ Pinaati niku sida sa kan Idu takinan sa rugar Kasipiya hampay hagadan siya ag kay manga katawuhan suruguun sa Balay Diyus pagpadara sida manga tawu magsirbi sa Balay Diyus.

¹⁸ Dahil inawatan kami Diyus, ipinadara nida sa kanmi si Siribya, kaibahan kay manga anak ag manga patar-ari manga lalaki 18 tanan. Si Siribya may kadunungan pag tawu ag linahi siya ni Mali lahi ni Libi. Si Libi anak ni Israil.

¹⁹ Ipinadara diman nida si Hasabiya, kaibahan si Hisayas ginan sa magtal-anakan ni Mirari, sida tanan, 20 ka lalaki.

²⁰ Ipinadara waya gid nida ti 220 ka suruguun sa Balay Diyus. Ti manga suruguun sa Balay Diyus pinili kaybi ni Hari Dabid ag kay manga may kangaranan mangawat sa manga Libita. Nakalista tanan kanda manga ngaran.

Nagpauray ag Nandarangin Sida ni Isra

²¹ Ati sa saruy sapa Ahaba, nagsabi aku sa gurupu kuntay unman manhandum karan-unun kami ag mamakumbaba kanmi sadili sa atubangan nimi Diyus hampay hagadun sa kanya bantayan niya kami sa kanmi lakawanun, hanggan kanmi manga anak ag manga kasiyunan.

²² Dahil magkay-a aku manhagad sa hari manga sundalu ag manga manugkabayu mangalaga sa kanmi laban sa manga kalaban habang maglakaw kami, dahil nagsabi yi kami sa hari awatan nimi Diyus ti tanan magsarig sa kanya, dapat magkagalit gid ti Diyus sa manga magdayu sa kanya.

²³ Nakan nagpauray ag nandarangin kami sa kanmi Diyus bantayan niya kami, ag sinagut niya kanmi darangin.

Ti manga Panagda para sa Balay Diyus

²⁴ Nagpili aku 12 ka tawu ginan sa manga nagpanguna sa manga manughandug, balaw kaibahan sa kan Siribya, Hasabya, ag sa sampulu ka katawuhan nida.

²⁵ Pagkatapus ipiniyar niku sa kanda unman may kurang ti manga pilak, gintu, ag manga kagamitan ipinakaun hari, hanggan niya manugpaanyu, kay manga may kangaranan, ag mayamu manga Israilita para awat sa Balay Diyus sa kanmi Diyus.

^26-27 Imaw inda ti kang ipiniyar sa kanda: 22 ka tunilada pilak 3 ka tunilada kagamitan pilak 3 ka tunilada gintu 20 ka malukung gintu manga walu may tunga ka kilu 2 ka malukung tumbaga pinakintab, kay kahalaga parihu sa manga malukung gintu.

²⁸ Nagsabi aku sa manga manughandug, “Kamu hanggan inda pag manga kagamitan ipinablag para sa Panginuun. Ti manga pilak hanggan ti manga gintu buluntad pag handug para sa Panginuun, ti Diyus niyu manga ginurang.

²⁹ Dahani niyu inda mayad hanggan sa madara niyu inda sa manga sulud haramnuan sa Balay Diyus sa Hirusalim unman may kurang, sa atubangan manga pangulu manughandug, manga Libita, ag sa manga takinan magtal-anakan manga Israilita.”

³⁰ Nakan pinanbuul manga manughandug ag manga Libita ti manga pilak, manga gintu, ag ti manga kagamitan unman may kurang, hampay daran-un sa Balay nimi Diyus sa Hirusalim.

Ti Pagbalik sa Hirusalim

³¹ Nighit kami sa sapa Ahaba ag naglakaw tabug sa Hirusalim katpung ika-12 pag sirang sa un-an bulan. Inawatan kami nimi Diyus ag iningatan niya kami laban sa manga kalaban ag manga tulisan habang maglakaw kami.

³² Pagras-ug nimi sa Hirusalim, nagpahari kami dapu tulu ka sirang.

³³ Sa ikap-at pag sirang, nag-ati kami sa Balay Diyus nimi Diyus ag ipinabahala nimi ti manga pilak, manga gintu, ag ti manga kagamitan unman may kurang sa kan Miramit manughandug anak ni Uryas. Kaibahan niya si Iliyasar anak ni Piniis ag ti duwa ka Libita sida ni Husabad anak ni Hisuwa ag Nuwadyas anak ni Binuwi.

³⁴ Binilang ag kinilu tunda tanan, ag ilinista.

³⁵ Nakan ti tanan nagbalik ginan sa pagkabihag nagsagda sa Diyus sa Israil manga handug pag sunugun: 12 ka tudu baka para sa buu Israil, 96 ka tudu karanidu, ag 77 ka anak karanidu lalaki. Nagsagda diman sida 12 ka tudu kambing bilang handug sa pagpakalumpiyu. Inda tanan manga handug pag sunugun para sa Panginuun.

³⁶ Ipinakaun diman nida sa manga gubirnadur ag manga takinan sa purubinsiya isalpan Iyupratis ti kasuratan nu naan isinurat ti sugu hari. Ag inda pag manga takinan nag-awat sa nasakupan Israil ag sa Balay Diyus.