Isra 7 - Hanunuu

Rinmas-ug si Isra sa Hirusalim

^1-6 Pagkalawuy mayamu pag manga timpu, pagka si Artasirsis ti hari sa Pirsiya, nagras-ug si Isra sa Hirusalim ginan sa Babilunya. Si Isra anak ni Siraya. Si Siraya anak ni Asariyas. Si Asariyas anak ni Hilkiyas. Si Hilkiyas anak ni Salum. Si Salum anak ni Saduk. Si Saduk anak ni Ahitub. Si Ahitub anak ni Amaryas. Si Amaryas anak ni Asariyas. Si Asariyas anak ni Mirayut. Si Mirayut anak ni Siraya. Si Siraya anak ni Usi. Si Usi anak ni Buki. Si Buki anak ni Abisuwa. Si Abisuwa anak ni Piniis. Si Piniis anak ni Iliyasar. Si Iliyasar anak ni Aarun pangulu manughandug. Si Isra usa ka manugtudlu mahusay sa Kasuguan ni Muysis ipinakaun Panginuun, ti Diyus Israil. Ipinakaun hari ti tanan hinagad ni Isra dahil pag-awatan siya Panginuun niya Diyus.

⁷ May nagkuyug diman sa kanya manga Israilita sa pagbalik niya sa Hirusalim kaybi sa ikapitu pag timpu kay maghari ni Artasirsis. Kaibahan sa manga nagkuyug ti manga manughandug, manga Libita, manga manugkanta, manga guwardiya sa manga sabian Balay Diyus, ag manga suruguun sa Balay Diyus.

^8-9 Nagginan si Isra sa Babilunya sa un-an pag sirang katpung sa un-an pag bulan. Ag sa awat Diyus, nakaras-ug siya sa Hirusalim sa un-an pag sirang katpung sa ikalima pag bulan, kaybi sa ikapitu pag timpu kay maghari ni Artasirsis.

¹⁰ Inawatan siya Diyus dahil itinigana niya kay sadili sa pag-adal hanggan sa pagtupad sa Kasuguan Panginuun, ag sa pagtudlu manga surundanun hanggan manga sugu sa manga Israilita.

Ti Surat ni Artasirsis sa kan Isra

¹¹ Inda ti pagsabihun sa surat ni Hari Artasirsis tabug sa kan Isra pag manughandug ag manugtudlu, ti may kaalaman gid sa manga sugu hanggan manga surundanun ipinakaun Panginuun sa manga taga Israil:

¹² “Aku si Hari Artasirsis ti hari manga hari. Magpangumusta aku sa kanmu, Isra, manughandug ag manugtudlu sa Kasuguan Diyus sa kalangitan.

¹³ “Pag-isugu niku una si unu sa manga Israilita atay sa kang kaharian, hanggan sa manga manughandug ngatay sa manga Libita, ti magkaibug kumuyug sa kanmu pagbalik sa Hirusalim mahimu di kumuyug.

¹⁴ Pagsuguun niku kawu hanggan kang pitu ka manugpatigayun usisaa nimu ti manga magpangyari sa Huda hanggan sa Hirusalim nu ungud pagsundun ngani nida ti Kasuguan nimu Diyus, kuntay lubus nimu magkaalaman.

¹⁵ Daran-a diman nimu ti manga gintu ag pilak kang pag-ipakaun buluntadan hanggan niku manga manugpatigayun sa Diyus Israil mag-uli sa Hirusalim.

¹⁶ Daran-a diman ti tanan matanggap nimu pag pilak ag gintu ginan sa banwa Babilunya, hanggan diman ti buluntadan pag awat taga Israil hanggan nida manga manughandug para sa Balay nida Diyus sa Hirusalim.

¹⁷ Siguraduhun nimu inda pag kuwarta gamitun sa pagbili sa tudu manga baka, tudu manga karanidu, hanggan anak karanidu lalaki, manga uyas, ag intus, ihandug sa harandugan sa Balay niyu Diyus sa Hirusalim.

¹⁸ Ti masawad pag gintu hanggan pilak mahimu niyu gamitun hanggan nimu manga kasimanwa sa una hintay kanyu pagkaibgan angay sa nabubut-un niyu Diyus.

¹⁹ Dapat ti ipinakaun pag manga kagamitan sa kanmu gamitun sa pagsirbi sa Balay nimu Diyus ipasakup nimu tanan sa Diyus Hirusalim.

²⁰ Nu may iba waya kawu kailangan para sa Balay Diyus, pagbuul lang kawu panggastus ginan sa pundu kaharian.

²¹ “Aku, si Hari Artasirsis, may sugu sa tanan manughamnu kayamanan sa purubinsiya isalpan Iyupratis ipakaun gid niyu una hintay ti hagadun sa kanyu ni Isra manughandug ag manugtudlu Kasuguan Diyus sa langit.

²² Ayawi niyu siya tugka sa 3,500 ka kilu pilak, 300 ka saku tirigu, 550 ka galun intus, 550 ka galun lana ulibu, ag una kabitay kayamu pag asin kailangan.

²³ Ipakaun gid niyu ti tanan kailangan sa Balay Diyus angay sa pag-isugu Diyus sa langit. Dahil nu balaw, magalit siya sa kang kaharian ag sa kang manga anak.

²⁴ Pag-ipaalam diman nimi sa kanyu danga niyu pagpabayada buwis ag iba waya baraydan ti manga manughandug, manga Libita, manga manugkanta, manga guwardiya sa manga sabian Balay Diyus, manga suruguun sa Balay Diyus, ag iba waya pag manugsirbi siyun pag Balay Diyus.

²⁵ “Kawu, Isra, angay sa ipinakaun Diyus pag kadunungan sa kanmu, pagpili kawu manga takinan hanggan manughusay may alam sa Kasuguan nimu Diyus. Manpatigayun sida sa tanan tawu sa purubinsiya isalpan Iyupratis. Ag ti manga tawu balaw nakaalam sa Kasuguan tudluan niyu.

²⁶ Una si unu balaw sumunud sa Kasuguan nimu Diyus ngatay sa kasuguan hari parusahan gid kamatayan, ngatay palayasun sa kay rugar, ngatay bul-un kay kasiyunan, ngatay pirisuhun.”

Dinayaw ni Isra ti Diyus

²⁷ Nagsabi si Isra: Dayawun ti Panginuun, ti Diyus nita manga ginurang, ti nag-ayuhap sa tagipusuun hari kuntay kilalahun niya ti Balay Diyus Panginuun sa Hirusalim.

²⁸ Dahil sa kaayadan Panginuun sa kangku, mayad kay magpakiusa sa kangku hari hanggan manugpaanyu niya, kaibahan yi ti tanan makapangyarihan niya pag takinan. Ag dahil pag-awatan aku Panginuun niku Diyus, nagkaimaw aku kabisugan agud tipunun ti manga takinan Israil hampay kumuyug sa kangku sa Hirusalim.