Isra 6 - Hanunuu

Nagpasnu si Hari Daryu sa Pagbungsud uman sa Balay Diyus

¹ Nakan nagsugu si Hari Daryu kuntay usisaun ti manga kasuratan itinagu sa burutangan kasuratan sa Babilunya.

² Dapat ati di pag nakitan sa balay hari sa Ikbatana, sakup purubinsiya Midya, ti usa ka malulunan pag kasuratan may nakasurat:

³ “Inda pag kasuratan magpaalaala sa un-an pag timpu paghari ni Sayrus, nagsugu siya bungsudan uman ti Balay Diyus sa Hirusalim nu naan pag pag-isagda ti manga handug. Kailangan mapag-un kay paratungtungan balay inda. Ag kailangan 60 ka luk-an siku kay abwat ag 60 diman ka luk-an siku kay kaluang.

⁴ Ti kada tulu ka daraka binagasbasan pag manga batu tungbawan usa ka tablun. Ti tanan pag manga gastusun bul-un ginan sa kuwarta kaharian.

⁵ Ti gintu ag pilak pag manga kagamitan sa Balay Diyus ti dinara ni Hari Nabukudunusur sa Babilunya kailangan iuli sa kay palaulian ati sa Balay Diyus sa Hirusalim.”

⁶ Nakan nagpadara si Hari Daryu kaindaay pag tultulanun sa kanda ni Tatinay ti gubirnadur purubinsiya sa isalpan Iyupratis, hanggan sa kan Sitar Businay, ag sa kaparihu nida manga takinan siyun pag purubinsiya: “Pagpakarayu kamu siyun ginan sa Balay Diyus.

⁷ Danga niyu paglabuta ti pagbungsud inda. Pabay-ani lang niyu ti gubirnadur ag ti iba pag manga takinan manga Hudiyu sa pagbungsud sa kay daan diman nagkabungsudan.

⁸ “Pag-isugu diman niku pag-awat kamu sa manga takinan manga Hudiyu sa pagbayad kadali sa tanan gastusun hampay balaw mabalag kanda tarabahu. Ti panmayad bul-un niyu sa kuwarta kaharian ginan sa buhis niyu purubinsiya.

⁹ Kailangan niyu ayawan kanda pangailangan sirang-sirang ti manga manughandug sa Hirusalim tulad sa turiti baka, tudu karanidu, hanggan anak karanidu lalaki surunugun bilang handug para sa Diyus kalangitan, hanggan diman tirigu, asin, pin-ga ubas ag lana ulibu. Kailangan balaw gid kamu magpalamada sa pag-ayaw,

¹⁰ hampay makahandug sida manga handug pag-ikabaya Diyus kalangitan, ag maidarangin nida aku hanggan kang manga anak.

¹¹ “Pag-isugu diman niku una si unu ti dayu sumunud, tuhugun siya kayu tinangkas ginan sa kay balay, ag kay balay dautun tugka sa unman yi may masawad matindugan.

¹² Mana ti Diyus ti nagpili sa Hirusalim bilang rugar nu naan siya pag dayawun, imaw ti pumarusa sa una si unu pag hari ngatay nasyun ti lumabag sa inda pag sugu ag mandaut sa inda pag Balay Diyus Hirusalim. “Aku, si Daryu, ti may sugu inda. Kailangan gid sundun inda.”

Iinintirga ti Balay Diyus

¹³ Sinunud gid nida ni Gubirnadur Tatinay, ni Sitar Businay, hanggan nida manga kaibahan ti sugu ni Hari Daryu.

¹⁴ Nakan nagparargu sa pagtarabahu ti manga takinan manga Hudiyu habang pagpabisugun sida bagaw manga purupita, nida ni Hagay ni Sakaryas kay laki ni Idu. Natapus nida natarabahu ti Balay Diyus angay sa sugu Diyus Israil. Ipinatupad inda nida ni Sayrus, ni Daryu, ag ni Artasirsis, ti magkasunud-sunud pag manga hari sa Pirsiya.

¹⁵ Namhan ti Balay Diyus sa ikatlu pag sirang sa ikasampulu may duwa pag bulan, imaw ti bulan Adar, katpung ikan-um pag timpu kay maghari ni Daryu.

¹⁶ May kabayaan naghandaan sa pagtalaga Balay Diyus ti nasakupan Israil — ti manga manughandug, ti manga Libita, ag ti iba waya nakabalik ginan sa pagkabihag.

¹⁷ Sa kanda pagtalaga Balay Diyus, nagsagda sida 100 tudu baka, 200 tudu karanidu, ag 400 turiti karanidu. Nagsagda diman sida 12 ka tudu kambing bilang handug sa paglumpiyu kada linahi Israil.

¹⁸ Itinigana nida ti manga manughandug ag manga Libita sa kanda katungkulan sa Balay Diyus Hirusalim angay sa nakasurat sa Ribru ni Muysis.

Ti Pista Pag-alaala sa Karibrihan

¹⁹ Sa ika-14 pag sirang sa un-an pag bulan, sa sunud pag timpu, idinaus manga nakabalik ginan sa pagkabihag ti Pista Pag-alaala sa Karibrihan.

²⁰ Linumpiyu manga manughandug hanggan manga Libita kanda manga sadili agud mahimu di sida pumanguna sa kanda buruwatun. Bag-u iniyaw manga Libita ti manga karanidu handug sa pagdaus Pista Pag-alaala sa Karibrihan. Binuwat nida inda para sa tanan manga binmalik ginan sa pagkabihag, para sa manga katawuhan nida manughandug, ag para diman sa kanda sadili.

²¹ Inda pag manga handug kinaun manga Israilita nagbalik ginan sa pagkabihag hanggan diman ti iba pag manga tawu mag-uli ati nagpatlikud yi sa manga buruwatun manga tawu unman magkilala sa Diyus. Nagpatlikud sida sa tunda pag manga bagay hampay sambahun ti Panginuun, ti Diyus Israil.

²² Sa sulud pitu ka sirang idinaus nida may kabayaan ti Pista Tinapay Unman may Pamadaka. Dahil pinakan-an sida Panginuun kabayaan pagka kay binag-u ti tagipusuun hari Asirya hampay awatan sida sa pagbuwat Balay Diyus, ti Diyus Israil.