Isra 5 - Hanunuu

¹ Taynguna, sinugu Diyus Israil ti manga purupita sida ni Hagay ni Sakaryas kay laki ni Idu kuntay tultulan kay sabihun sa manga Hudiyu sa Huda hanggan sa Hirusalim.

² Nagpatingi sa kanda si Surubabil anak ni Salatyil ag si Hisuwa anak ni Husadak. Nakan ipinarargu nida ti pagbungsud Balay Diyus sa Hirusalim. Inawatan sida duwa ka purupita Diyus.

³ Dapat unman nagdugay, nagras-ug sa Hirusalim si Tatinay ti gubirnadur purubinsiya sa isalpan Iyupratis, si Sitar Businay, hanggan kanda manga kaibahan. Nagpaingana sida sa manga Hudiyu, “Si unu ti may sugu sa kanyu kuntay bungsudan maan inda pag Balay Diyus?”

⁴ Nagpaingana waya gid sida, “Hintay kanda ngaran ti manga magtarabahu sitay?”

^5-7 Dapat inalagaan di Diyus ti manga takinan Hudiyu, nakan naggayak si Tatinay, hanggan si Sitar Businay, hanggan kanda kaibahan manga takinan sa purubinsiya sa isalpan Iyupratis balaw dapu nida amparahun ti pagbungsud Balay Diyus tugka sa udwaya makabarita sida ginan sa kan Hari Daryu tungkul siti ag makatanggap kay sagut. Inda ti pagsabihun sa surat ipinadara nida sa kan Hari Daryu: “Mahal Hari Daryu, “Mana mayad kanmu kahamtangan.

⁸ “Pag-ipaalam duy nimi sa kanmu, Mahal Hari, nag-ati kami sa purubinsiya Huda, nu naan pag pag-ibungsud ti Balay Makamaskihan pag Diyus. Daraka pag manga batu ti paggamitun sa pagbungsud Balay Diyus, ag kay alad batu inda pinaulian manga pinlud batang hampay pumag-un. Masipag sida magtarabahu, nakan madali tunda maibungsud.

⁹ Pinaingana duy nimi kanda manga takinan nu si unu ti nagsugu sa kanda kuntay bungsudan maan ti Balay Diyus.

¹⁰ Ag pinaingana diman nimi kanda manga ngaran hampay maipaalam nimi sa kanmu nu si unu ti manga magpanguna sa pagbungsud.

¹¹ “Inda duy kanda sagut sa kanmi: ‘Manga suruguun kami Diyus sa langit ag sa kalibutan, ag pag-ibungsud maan nimi ti Balay Diyus, ti ibinungsud kaybi usa ka makapangyarihan pag hari Israil.

¹² Dapat dahil ginalit nimi manga ginurang ti Diyus sa langit, pinabay-anan niya sida sakupun ni Nabukudunusur usa ka Kaldiyu, hari Babilunya. Dinaut ni Nabukudunusur inda pag Balay Diyus ag binihag niya kanmi manga ginurang tabug sa Babilunya.

¹³ Dapat sa un-an pag timpu sa kay paghari ni Sayrus sa Babilunya, nagsugu siya bungsudan maan ti Balay Diyus.

¹⁴ Iinuli diman niya ti manga gintu ag pilak pag manga kagamitan sa Balay Diyus. Inda pag manga kagamitan bin-ul ni Nabukudunusur kaybi sa Balay Diyus Hirusalim ag ipinauli niya sa balay diyus-diyusan sa Babilunya. Ipiniyar ni Hari Sayrus inda pag manga kagamitan sa kan Sisbasar ti pinili niya gubirnadur Huda.

¹⁵ Sinabi hari sa kan Sisbasar kuntay bungsudan maan ti Balay Diyus sa Hirusalim sa kay daan diman nagkabungsudan, bag-u paulian ati kay manga kagamitan.

¹⁶ Nakan nag-ati ngani si Sisbasar sa Hirusalim ag ibinungsud niya ti manga paratukawan Balay Diyus. Tugka kainda pag-ibungsud waya ti Balay Diyus; udwaya inda natapus.’

¹⁷ “Taynguna, nu mahimu, Mahal Hari, ipausisa nimu ti manga kasuratan ipinatagu manga hari Babilunya nu tutuu ngani nagsugu si Hari Sayrus bungsudan maan ti Balay Diyus sa Hirusalim. Ag paalami kami nu hintay kanmu pasya tungkul siyun.”