Isra 3 - Hanunuu

Ti Pagpatindug Bag-u pag Harandugan

¹ Pagka nagras-ug yi ti ikapitu pag bulan, katpung mag-ulian yi ti manga Israilita sa kanda manga banwa, nagtiripun sida tanan sa Hirusalim may pagkarausa.

² Pagkalawuy ipinatindug maan ti harandugan Diyus Israil hampay masagdahan inda manga handug pagsunugun angay sa isinurat sa Kasuguan ni Muysis kay suruguun. Ti nagpatindug inda sida ni Hisuwa anak ni Husadak ag kay kaibahan pag manga manughandug, hanggan si Surubabil anak ni Salatyil ag kay manga katawuhan.

³ Una magkadala sida sa manga tawu daan yi mag-uli sa tunda pag daga, ipinatindug di nida ti harandugan sa kay daan nagkabungsudan. Pagkalawuy nagsagda sida sa Panginuun manga handug pagsunugun sa surip hanggan sa malambung.

⁴ Idinaus diman nida ti Pista sa Pagpatindug manga Payag angay sa nisurat sa Kasuguan ni Muysis. Ag nagsagda sida manga handug pagsunugun angay sa itinagka pag handug kada sirang.

⁵ Bukud waya sa manga handug pagsunugun, maghandug diman sida manga handug sa kada Pista Lapus Lati, ag sa iba waya pag manga pista sa pagsamba sa Panginuun. Ag maghandug diman sida buluntad pag handug para sa Panginuun.

⁶ Una balaw waya naumpisahan ti pagbungsud uman sa Balay Diyus Panginuun, nag-umpisa yi ti manga Israilita maghandug manga handug pagsunugun sa un-an sirang sa ikapitu pag bulan sa tunda pag timpu.

Ipinatindug Uman ti Balay Diyus

⁷ Nagpakaun ti manga Israilita kuwarta pamayad sa manga manugbagasbas batu hanggan sa manga manugpanday. Namakaun diman sida manga karan-unun, irinmun, hanggan lana ulibu pamayad sa manga taga Sidun ag taga Tiru para sa manga kayu sidru ginan sa Libanun. Inda pag manga kayu ikarga sa manga barku ag daran-un sa Hupa. Pinahintulutan inda ni Hari Sayrus taga Pirsiya.

⁸ Inumpisahan ti pagbungsud sa Balay Diyus sa ikadwa pag bulan sa ikadwa pag timpu ginan sa nakabalik ti manga Israilita sa Hirusalim. Nangarawatan sa pagtarabahu ti tanan nakabalik sa Hirusalim ginan sa pagkabihag, kaibahan yi sitay sida ni Surubabil anak ni Salatyil, ni Hisuwa anak ni Husadak ag kay kaibahan pag manga manughandug, hanggan ti manga Libita. Ti pinayaran sa magpamahala sa pagpatindug Balay Diyus Panginuun ti manga Libita may idad 20 ka timpu paabwat.

⁹ Sida si Hisuwa hanggan kay manga anak ag manga katawuhan, ag si Kadmiyil hanggan kay manga anak. Sida tanan ginan sa linahi ni Hudabyas. Nangawat diman sa kanda ti manga linahi ag manga katawuhan ni Hinadad manga Libita diman.

¹⁰ Pagka natapus yi manga manugpanday ti paratukawan Balay Diyus Panginuun, tinmindug ti manga manughandug hampay patunugun ti manga budyung. Inda sida nakasulung kanda manga rutay bilang manga manughandug. Tinmindug diman ti manga Libita hanggan ti manga linahi ni Asap, hampay patunugun ti manga pumpiyang hampay dayawun ti Panginuun angay sa paraan itinudlu kaybi ni Hari Dabid sa Israil.

¹¹ Bag-u nagdayaw ag nagpasalamat sida sa Panginuun habang magkanta, “Mayad gid ti Panginuun, dahil kay pagmahal sa Israil unman may katapusan.” Bag-u mabisug ti tanan tawu sa pagdayaw sa Panginuun dahil natapus yi ti paratukawan Balay Diyus.

¹² Mayamu ati ti manga gurangun pag manga manughandug, manga Libita, hanggan manga paggurangunun sa manga magtal-anakan ti nakakit kaybi sa un-an pag Balay Diyus. Nanlumi sida mabisug pagka nakitan nida ti paratukawan bag-u pag Balay Diyus. Ag mayamu diman ti nanhuyaw sa kabayaan.

¹³ Udyi magkaalaman ti ringgit kabayaan ag ti wawaw dahil masyadu gid matnug ti iringayan manga tawu, ag mag-adnugan di inda ginan sa arayu.