Isra 10 - Hanunuu

Itinultul manga Israilita Kanda manga Kasalanan

¹ Habang maluhudan magdarangin si Isra sa atubangan Balay Diyus, maglumi siya, magpahayag manga kasalanan nasakupan Israil, mayamu pag manga Israilita lalaki, babayi, hanggan manga kalay-awan ti nagtiripun sa kay palibut. Maglulumian diman sida mabaskug.

² Bag-u nagsabi sa kanya si Sikanyas anak ni Hiyil, linahi ni Ilam, “Unman kami nagmatinupadun sa kanta Diyus dahil nangasawa kami sa manga babayi balaw Israilita ginan sa kalibut nita pag kalamalayan. Dapat madi katida may pag-asa waya ti nasakupan Israil.

³ Nakan taynguna, sundun nimi ti paanyu nimu hanggan iba waya maggalang sa sugu nita Diyus. Mamuwat kami kasunduan sa kanmi Diyus palayasun inda pag manga babayi hanggan kanda manga anak. Sundun nimi ti pagsabihun Kasuguan.

⁴ Pagtindug yi kawu, dahil katungkulan nimu giyahan kami sa inda pag manga bagay. Pagpakabisug kawu ag buwata ti kailangan buwatun. Mangawat di kami sa kanmu.”

⁵ Nakan tinmindug si Isra, ipinataratu niya ti manga takinan pag manga manughandug, ti manga Libita, hanggan ti tanan Israilita, kuntay buwatun nida ti sinabi ni Sikanyas. Ag nanaratu ngani sida.

⁶ Bag-u nighit si Isra ginan sa Balay Diyus, nag-ati siya sa sulud-sulud ni Hihuhanan anak ni Ilyasib. Pagka siya ati yi, unman siya nangaun ag nanginum, dahil magruku siya balaw nagmatinupadun ti manga Israilita binmalik ginan sa pagkabihag.

^7-8 Ipinaalam manga takinan hanggan manga paggurangunun manga Israilita sa buu Huda ag Hirusalim kuntay ti tanan binmalik ginan sa pagkabihag mantiripun sa Hirusalim. Una si unu ti dayu umati sa sulud tulu ka sirang bul-un ti tanan niya manga kasiyunan ag balaw yi siya ibilang sa manga tawu binmalik ginan sa pagkabihag.

⁹ Nakan sa sulud tulu ka sirang nagtiripun ti tanan manga tawu sa Huda ag Binhamin, nanukawan sida ati sa may sugkadan Balay Diyus sa Hirusalim. Nangyari inda sa ika-20 pag sirang sa ikasiyam pag bulan. Pagtakigan ti manga tawu dahil urungdan kanda harampangan ag dahil diman sa mabaskug pag uran.

¹⁰ Bag-u nagtindug si Isra imaw ti manughandug, magkun tag sa kanda, “Nagkasala kamu dahil nangasawa kamu manga balaw Israilita. Dinugangan waya gid niyu ti kasalanan Israil.

¹¹ Nakan ngani kainda, iampu yi niyu kanyu manga kasalanan sa Panginuun, ti Diyus niyu manga ginurang, sunda niyu kay kagustuhan. Ipablag niyu kanyu sadili sa manga tawu sa kanyu palibut, tayaki niyu kanyu manga asawa balaw Israilita.”

¹² Nagsagut ti buu kapulungan magkun, “Tama gid kawu! Sundun nimi ti pagsabihun nimu.

¹³ Dapat inda pag harampangan dayu matapus sa usa ngatay duwa lang ka sirang, dahil mayamu sa kanmi ti nagbuwat inda pag kasalanan. Mauran waya taynguna, ag balaw nimi maagwanta manpabasa sa uran sitay sa luwas.

¹⁴ Ti manga takinan yi lang nimi ti manpatayak sitay, man-asikasu para sa buu nasakupan. Paluwangun lang sitay ti manga nangasawa sa balaw Israilita sa itinagka pag udas kaibahan ti manga paggurangunun hanggan ti manga talaghusay sa kanda banwa. Sundun nimi inda hampay madura ti masyadu pag pangagalit Diyus sa kanmi dahil sa nabwat nimi kasalanan.”

¹⁵ Unman may iba nan-ampara sa inda pag gayak purya lang sa kan Hunatan anak ni Asahil hanggan ni Hasiya anak ni Tikba. Inawatan diman sida ni Misulam ag ni Sabitay usa ka Libita.

^16-17 Sinunud manga binmalik ginan sa pagkabihag tunda pag gayak. Nakan nagpili si Isra manga lalaki ag ilinista kanda ngaran. Sida manga takinan manga magtal-anakan. Ag sa un-an pag sirang sa ikasampulu pag bulan, nanukawan sida ag inumpisahan nida ti pag-usisa tungkul sa pagpangasawa manga Israilita sa manga babayi balaw Israilita. Natapus nida ti pag-usisa sa tanan kasaba sa un-an pag sirang sa un-an pag bulan, sa kasunud pag timpu.

Ti manga Lalaki Nag-arasawa sa manga Balaw Israilita

^18-19 Inda ti manga lalaki nangasawa sa manga balaw Israilita, ag nanaratu sida tayakan nida kanda manga asawa: (Ti kada usa sa kanda nansagda lalaki pag karanidu bilang bayad sa kanda kasalanan.) Sa manga manughandug: sida ni Maasiyas, ni Iliyisir, ni Harib, ag ni Gidalyas, ginan sa magtal-anakan ni Hisuwa anak ni Husadak ag kay manga patar-ari;

²⁰ sida ni Hanani, ni Sibadyas, ginan sa magtal-anakan ni Imir;

²¹ sida ni Maasiyas, ni Ilyas, ni Simaya, ni Hiyil, ni Usyas, ginan sa magtal-anakan ni Harim;

²² sida ni Iliwinay, ni Maasiyas, ni Ismail, ni Natanyil, ni Husabad, ag ni Ilasa, ginan sa magtal-anakan ni Pasur.

²³ Sa manga Libita: sida ni Husabad, ni Simay, ni Kilaya (pag-ingarnan diman si Kilita), ni Pitahiya, ni Huda, ag ni Iliyisir.

²⁴ Sa manga manugkanta: si Ilyasib. Sa manga guwardiya manga sabian Balay Diyus: sida ni Salum, ni Tilim, ag ni Uri.

²⁵ Sa iba waya pag manga Israilita: sida ni Ramiya, ni Isiya, ni Malkiya, ni Miyamin, ni Iliyasar, ni Hasabiya, ag ni Binaya, ginan sa magtal-anakan ni Parus;

²⁶ sida ni Mataniya, ni Sakaryas, ni Hiyil, ni Abdi, ni Hirimut, ag ni Ilyas, ginan sa magtal-anakan ni Ilam;

²⁷ sida ni Iliwinay, ni Ilyasib, ni Mataniya, ni Hirimut, ni Sabad, ag ni Asisa, ginan sa magtal-anakan ni Satu;

²⁸ sida ni Hihuhanan, ni Hananiyas, ni Sabay, ag ni Atlay, ginan sa magtal-anakan ni Bibay;

²⁹ sida ni Misulam, ni Maluk, ni Adayas, ni Hasub, ni Siyal, ag ni Hirimut, ginan sa magtal-anakan ni Bani;

³⁰ sida ni Adnak, ni Kilal, ni Binaya, ni Maasiyas, ni Matanyas, ni Bisalil, ni Binuy, ag ni Manasis, ginan sa magtal-anakan ni Pahat Muab;

^31-32 sida ni Iliyisir, ni Isya, ni Malkiya, ni Simaya, ni Simyun, ni Binhamin, ni Maluk, ag ni Simarya, ginan sa magtal-anakan ni Harim;

³³ sida ni Matinay, ni Matata, ni Sabad, ni Ilipilit, ni Hirimay, ni Manasis, ag ni Simay, ginan sa magtal-anakan ni Hasum;

^34-37 sida ni Maaday, ni Amram, ni Uwil, ni Binaya, ni Bidiya, ni Kiluhi, ni Banya, ni Mirimut, ni Ilyasib, ni Matanyas, ni Matinay, ag ni Haasu, ginan sa magtal-anakan ni Bani;

^38-42 sida ni Simay, ni Silimya, ni Natan, ni Adayas, ni Maknadibay, ni Sasay, ni Saray, ni Asaril, ni Silimya, ni Simarya, ni Salum, ni Amarya, ag ni Husi, ginan sa magtal-anakan ni Binuy;

⁴³ sida ni Yiil, ni Matitiya, ni Sabad, ni Sibina, ni Haday, ni Huwil, ag ni Binaya, ginan sa magtal-anakan ni Nibu.

⁴⁴ Inda sida tanan ti nangasawa sa manga babayi balaw Israilita, ti iba sa kanda may manga anak sa siyun pag manga babayi.