Isra 1 - Hanunuu

Ipinabalik ni Hari Sayrus ti manga Hudiyu sa Kanda Kadagaan

¹ Sa un-an timpu kay maghari ni Sayrus sa Pirsiya, tinandug Panginuun kay tagipusuun ni Sayrus sa pagsurat usa ka paalam ipabantala sa buu niya kaharian. Nangyari inda hampay matupad ti sinabi Panginuun sa panab-anan ni Hirimyas.

² “Inda kay pagsabihun ni Hari Sayrus taga Pirsiya: “Ipinakaun sa kangku Panginuun, Diyus kalangitan, ti tanan pag kaharian sitay sa kalibutan, ag ikinatiwala niya sa kangku ti pagpatindug Balay Diyus para sa kanya ati sa Hirusalim sakup Huda.

³ Kamu tanan pag nasakupan Diyus, pagbalik yi kamu sa Hirusalim ag patindugan maan niyu ati ti Balay Diyus Panginuun, Diyus Israil, ti mag-ulian sa tunda pag banwa. Ag mana ibahan kamu niyu Diyus!

⁴ Ti manga nasawad pag tawu sa kanyu pag-ulian pag manga rugar kailangan umawat sa kanyu magpanlakawun. Mangayaw sida manga pilak ag gintu, manga kailangan pag manga bagay hanggan manga hayup, hanggan ti buluntad pag pakaun para sa Balay Diyus sa Hirusalim.”

⁵ May manga Israilita tinandug Diyus hampay bumalik sa Hirusalim. Nakan nag-alistu sida umatag hampay ipatindug ti Balay Diyus Panginuun. Kaibahan nida ti manga takinan magtal-anakan sa lahi ni Huda hanggan sa lahi ni Binhamin. Kaibahan diman nida ti manga manughandug sa Balay Diyus, hanggan ti manga Libita.

⁶ Ti iba ka manga tawu nag-awat sa kanda sa panab-anan pagpakaun manga gamit human sa pilak ag gintu, manga kailangan pag bagay hanggan manga hayup, ag manga mahalaga pag bagay hanggan ti pag-awat buluntadan para sa Balay Diyus.

⁷ Iinuli diman sa kanda ni Hari Sayrus ti manga kagamitan sa Balay Diyus Panginuun, ti pinanbuul ni Hari Nabukudunusur sa Hirusalim ag dinara sa balay niya manga diyus-diyusan.

⁸ Ipiniyar inda ni Hari Sayrus sa kan Mitridat ti taga hamnu niya kaharian. Binilang inda ni Mitridat ag ipinakaun ti listahan sa kan Sisbasar, ti gubirnadur sa Huda.

^9-10 Inda ti bilang manga kagamitan: gintu pag manga dinulang 30 pilak pag manga dinulang 1,000 manga siyaw 29 gintu pag manga malukung 30 pilak pag manga malukung 410 iba waya pag manga kagamitan 1,000

¹¹ Tanan-tanan, manga 5,400 ka kagamitan gintu ag pilak. Dinara inda tanan ni Sisbasar pagka nagbalik siya sa Hirusalim ginan sa Babilunya kaibahan ti iba manga nabihag.