Isikil 9 - Hanunuu

Pinanmatay ti manga Magsamba sa manga Diyus-diyusan

¹ Bag-u nadnugan niku ti Diyus nagbagaw sa mabaskug pag busis, “Abala kamu sa Hirusalim, kamu pag manga tawu pumarusa sa inda pag banwa ag daran-a kanyu armas.”

² Bag-u may unum ka tawu nagsulud sa salatan pag sabian Balay Diyus ti kada usa may dara armas. May kaibahan sida tawu nakarutay linu ag sa kay awak may hawud panurat. Nagtindug sida sa saruy harandugan galang.

³ Ginan sa un-an ti kadayawan Diyus Israil asan sa tungud manga kirubin sa sulud Balay Diyus, dapat kainda inmighit inda ati ag nagsalyu sa sabian Balay Diyus. Bag-u tinawag Panginuun ti tawu nakarutay linu ag sa kay awak may hawud panurat,

⁴ ag sinabihan, “Palibuta ti Hirusalim ag markahi ti bangas manga magpanruku dahil sa tanan mayagting pag pagbuwatun sa banwa.”

⁵ Bag-u nadnugan niku ti Diyus magkun sa unum ka tawu, “Sundi niyu siya sa banwa ag matya ti manga tawu balaw may marka sa bangas. Danga gid sida pagkaawai.

⁶ Panmatya niyu ti manga gurangun, ti manga kalay-awan lalaki ag manga babayi, ti manga ina, ag ti manga anak, dapat danga paglabuta ti may manga marka. Pag-umpisa kamu sa kang Balay.” Nakan inuna nida pinanmatay ti manga paggurangunun ati sa atubangan Balay Diyus.

⁷ Bag-u magkun ti Diyus sa kanda, “Uringi niyu kang Balay sa panab-anan pagtumpuk manga bangkay sa manga sugkadan, ag paglakaw rargu kamu.” Nakan naglakaw sida ag nanmatay sa buu banwa.

⁸ Habang magpanmatay sida, natayak aku usa-usa. Napadapa aku ag nagtawag sa Diyus, “Panginuun Diyus, tabuhun aw lugud nimu matyun ti manga nasawad sa Israil dahil sa kanmu pangagalit sa Hirusalim?”

⁹ Nagsagut siya sa kangku, “Masyadu yi gid ti kasalanan nasakupan Israil ag Huda. Masyadu yi ti maratyan ag unman yi may katadlungan sa banwa. Magkun waya sida, ‘Unman magbantay ti Panginuun sa kanta; binugyahan yi niya ti Israil.’

¹⁰ Nakan unman gid niku sida kaawaan bagkus buwatun diman niku sa kanda ti binwat nida sa iba.”

¹¹ Bag-u binmalik ti tawu nakarutay linu ag sa kay awak may hawud panurat magkun sa Panginuun, “Natupad yi niku kanmu isinugu sa kangku.”