Isikil 8 - Hanunuu

Ti Pagsamba sa manga Diyus-diyusan sa Hirusalim

¹ Pagka sa ikalima pag sirang sa ikan-um pag bulan, sa ikan-um pag timpu sa kanmi pagkabihag, sinakup aku Panginuun Diyus. Matukawan aku ati katpung sa kang balay ag maghampang sa kangku ti manga paggurangunun sa Huda.

² May nakitan aku ga tawu. Ginan sa kay awak tag sirung parihu siya sa apuy, ag ginan sa kay awak tag tungud parihu siya sa magsinglaw pag galang.

³ Ihinunat niya kay ga kamang ag hiniyaptan niya aku sa buhuk. Ipinaabwat aku Ispiritu sa kapawaan ag dinara sa Hirusalim, sa salatan baliwa pag sabian sa sulud sugkadan Balay Diyus, nu naan nakapauli ti usa ka diyus-diyusan nakapagalit gid sa Diyus.

⁴ Bag-u nakitan niku ati ti kadayawan Diyus Israil, parihu sa nakitan niku sa pangakakitun sa ratag.

⁵ Bag-u magkun ti Diyus sa kangku, “Anak tawu, pagbantay kawu sa salatan.” Nakan nagbantay aku, ag nakitan niku sa tupad sabian arani sa harandugan ti diyus-diyusan nakapagalit gid sa Diyus.

⁶ Magkun ti Diyus sa kangku, “Anak tawu, nakitan aw nimu ti pagbuwatun nasakupan Israil? Nakitan aw nimu ti mayagting gid pagbuwatun nida sitaay agud palayasun aku sa kang Balay? Dapat makitan waya gid nimu ti mas subra waya pag kayagtingan.”

⁷ Bag-u dinara niya aku sa sabian sa sugkadan Balay Diyus, nagbantay aku, may nakitan aku buslut sa alad batu.

⁸ Nagbagaw siya sa kangku, “Anak tawu, padakaa ti buslut sa alad batu.” Nakan dinaka ngani niku inda, ag nakitan niku ti usa ka sabian.

⁹ Nagbagaw maan siya sa kangku, “Pagsulud ag bantayi ti mayagting gid nida pagbuwatun.”

¹⁰ Nakan nagsulud ngani aku, nakitan niku ti alad batu punu tuhay-tuhay pag manga kinurtihan hayup magyapang ag iba waya pag manga hayup pagkilalan-un mauring. Nakitan diman niku ati ti tanan pag diyus-diyusan nasakupan Israil.

¹¹ Matindugan ati ti 70 ka paggurangunun sa Israil, usa sa kanda si Haasanyas anak ni Sapan. Ti kada usa may paghiyaptan sukadan kamangyan, ag ti anus kamangyan magtalimbuuk.

¹² Bag-u magkun ti Diyus sa kangku, “Anak tawu, malu nakitan yi nimu nu hintay ti pagbuwatun sa lihim manga paggurangunun sa Israil? Kada usa sa kanda asan sa sulud-sulud niya diyus-diyusan. Magkun sida, ‘Unman magbantay ti Panginuun sa kanta; binugyahan yi niya ti Israil.’ ”

¹³ Nagbagaw waya gid ti Diyus, “Makitan waya gid nimu ti mas subra waya mayagting pag pagbuwatun nida.”

¹⁴ Bag-u dinara niya aku sa salatan baliwa pag sabian Balay Diyus Panginuun, ag ati nakitan niku ti manga babayi matukawan ag maglumi para sa diyus-diyusan nida si Tamus.

¹⁵ Nagbagaw siya sa kangku, “Anak tawu, nakitan aw nimu inda? Makitan waya gid nimu ti mas higit waya siyun kay kayagting.”

¹⁶ Bag-u dinara niya aku sa sulud sugkadan Balay Diyus Panginuun. Ag ati sa sabian Balay Diyus, sa tab-anan sarakahan ag harandugan, may manga 25 ka tawu. Matlikudan sida sa Balay Diyus bag-u masranguhan sa butlakan ag maluhudan magsamba sa magbutlak init.

¹⁷ Bag-u magkun ti Diyus sa kangku, “Anak tawu, nakitan yi aw nimu inda? Kaugalian lang aw para sa nasakupan Huda ti pagbuwat inda pag mayagting pag manga bagay sitay? Purya sa inda, pagpuyaan waya nida ti buu nasyun, nakan paggalitun gid nida aku. Bantayi nu kabitay kanda paglabag sa kangku!

¹⁸ Nakan masamitan nida kang pangagalit. Balaw gid niku sida kaawaan. Una manringgit waya sida mabisug sa paghagad awat sa kangku, balaw niku sida patingihan.”